وقۋشىلار سارايى سالىنسا يگى
وتكەن جىلدىڭ 15 قاراشاسى كۇنى «Egemen Qazaqstan» گازەتىندە جۋرناليست تابيعات مۇسىلمانقۇلدىڭ ء«وڭىر مادەنيەتىنە تىڭ سەرپىلىس كەرەك» دەگەن تاقىرىپپەن ماقالاسى جاريالاندى. ماسەلە دۇرىس كوتەرىلگەندىكتەن, قولىمىزعا قالام الىپ, ءۇن قوسقاندى ءجون كوردىك.
ماقالادا اتاپ كورسەتىلگەندەي, وبلىستىق ءماسليحات توراعاسىنىڭ وكىمىمەن قۇرىلعان دەپۋتاتتىق جۇمىس توبى تارازداعى مادەنيەت سالاسىنا قاتىستى مەكەمەلەردىڭ قىزمەتىمەن تانىسقان. وسىعان وراي, ياعني زەردەلەۋ جۇمىستارى بارىسىندا مەملەكەتتىك شىعارماشىلىق تاپسىرىس اياسىندا بالالار مەن جاسوسپىرىمدەرگە ارنالعان جەكە شىعارماشىلىق ۇيىرمەلەرگە جەرگىلىكتى بيۋدجەتتەن 2023 جىلعا 1 112 500 مىڭ تەڭگە بولىنگەنى بەلگىلى بولعان. سول جىلدىڭ 1 شىلدەسىندەگى دەرەككە سۇيەنسەك, قىزمەت كورسەتۋشى سانى 48-ءدى قۇراپ, 4 – 17 جاس ارالىعىنداعى 5 626 بالاعا قىزمەت كورسەتىلدى دەگەن اقپارات بەرىلىپتى.
ارينە, قالادا وتە ساپالى قىزمەت اتقارىپ وتىرعان ۇيىرمەلەر دە جوق ەمەس. دەگەنمەن ولاردىڭ قىزمەتىمەن تانىسپاق بولعان جۇمىس توبىنىڭ مۇشەلەرى كوپ جاعدايدا ۇيىرمەگە قاتىسۋشىلار تۇرماق, ۇيىرمە جۇرگىزىلەتىن عيماراتتاردى دا تابا الماي قالعان. ماسەلەن, ۇيىرمەلەر جۇمىس ىستەيدى دەپ كورسەتىلگەن ءتورت عيماراتتىڭ ەسىگى تارس جابىق تۇرعان. بۇدان قازىنادان قوماقتى قاراجات بولىنەتىنىنە قاراماستان, ۇيىرمەلەر جۇمىسى ءوز دەڭگەيىندە جۇرگىزىلمەيتىنىن انىق اڭعارۋعا بولادى. ال بالالاردىڭ بوس ۋاقىتتارىن ءتيىمدى پايدالانۋلارى ءۇشىن ۇيىرمە جۇمىستارىن بارىنشا ۇتىمدى ويلاستىرۋدىڭ ماڭىزى زور ەمەس پە؟
ۇيىرمە تالاپقا ساي جابدىقتالماسا, بولمەلەر جەتىسپەي جاتسا, مۇنىڭ دا ۇلكەن پربلەما ەكەنى ءسوزسىز. مۇنداي جاعدايدا وقۋشىلار شىعارماشىلىقپەن ساپالى تۇردە اينالىسا الا ما دەپ ماسەلە كوتەرۋدىڭ ءوزى ورىنسىز بولىپ شىقپاق.
سوندىقتان ءبىر سوزبەن ايتقاندا, وبلىس ورتالىعىنا بالالار مەن جاسوسپىرىمدەر بوس ۋاقىتتارىن ءتيىمدى وتكىزىپ قانا قويماي, ءتۇرلى ونەرگە ماشىقتانا الاتىن وقۋشىلار سارايى سالىنسا دەگەن ۇسىنىس, تىلەگىمىز بار. ءتيىستى ورىندار مۇنى تەك ءبىزدىڭ عانا ەمەس, بۇكىل تارازدىق بالالار مەن جاسوسپىرىمدەردىڭ ءوتىنىش, تىلەگى دەپ قابىلداسا قۇبا-قۇپ.
ساعىن بولاتبەكوۆ,
ماكەن ساياقوۆ
جامبىل وبلىسى
ۇساق-تۇيەك دەپ قارامايىق
انا ءتىلىمىز باي دەپ كەۋدە قاعامىز. الايدا كەيبىر سوزدەر, حالىقارالىق تەرميندەر اۋدارىلماي, سول قالپىندا بەرىلىپ جاتادى. مىسالى, «ۆەدومستۆو», «فۋنكتسيا», «رول», ت.ب. وتكەندە كوشە بويىنان ء«موبيلدى قالا» دەگەن جارناما كوردىم. وسى سياقتى سوزدەردىڭ قازاقشا بالاماسى جوق پا؟
تەلەديداردىڭ جۇگىرتپە جولىندا ءجيى قاتەلەر كەتەدى. ەكراننىڭ سىرتىنداعى قىزمەتكەرلەر سونى كورمەي مە؟ تاياۋدا عانا تۋريزم جانە سپورت ءمينيسترى بۇرىنعى اتاۋىنشا مادەنيەت جانە سپورت ءمينيسترى دەپ جازىلىپ ءجۇر.
جۇگىرتپە جولدى باسىندا ءبىر سالىپ قويادى دا, سودان سوڭ وعان وزگەرىستەر جاسامايدى-اۋ دەيمىن. ولاي دەيتىنىم, قازىر اۋا رايىنا بايلانىستى ونلاين وقىتۋ دەگەن بار. بىردە قاراپ وتىرسام, كەشكى توعىز شاماسىندا «بۇگىن ەكىنشى اۋىسىم ونلاينمەن وقيدى» دەپ جازىپ قويىپتى. ەكىنشى اۋىسىمنىڭ ۋاقىتى ءوتىپ كەتتى ەمەس پە. تاياۋدا ورتالىق گازەتتىڭ بىرىندە «كۇيشى» دەگەن ءسوزدىڭ ءبىر ءارپى ءتۇسىپ قالىپ, «كۇشى» دەپ جازىلىپتى.
تەلەديداردا جارناما وتە كوپ. قارجى تابۋ كەرەك شىعار, بىراق ونىڭ سوڭىنا ءتۇسىپ كورەرمەننەن ايىرىلىپ قالماعان ءجون ەمەس پە؟ تەلەديداردىڭ نەگىزى مىندەتى حالىقتى تاربيەلەۋ عوي, اقشا تابۋ ەمەس.
ايەل باسشىلاردى «توراعا» دەپ جازىپ ءجۇر. وسى دۇرىس پا؟ ايەل ادامدى بۇرىن زايىبى دەيتىن, قازىر كوبىنە جۇبايى دەپ جازادى. ءار اتاۋ ورنىمەن اتالۋى كەرەك ەمەس پە؟
ەسكەرتكىشتەر نە ءۇشىن قويىلادى؟ بەلگىلى ءبىر تۇلعانىڭ ەرلىگىن نەمەسە ەڭبەگىن قادىرلەپ, باعالاپ ەسكەرتكىشتەر ورناتىلادى. ال سونى قاداعالاپ, كۇتىپ ۇستاپ ءجۇرمىز بە؟ جازدا اينالاسى كوبىنە تازالانبايدى, كەيبىرەۋلەرىنىڭ جانىنا تابيعي گۇل ەگىلمەيدى, ال قىستا توبەسىندە, يىعىندا قار جاتادى. ءتىپتى ايايسىڭ, توڭىپ تۇرعان سياقتى كورىنەدى. ەسكەرتكىشتى ءبىر مەكەمەگە بەكىتىپ, قاراپ ءجۇرۋدىڭ نە قيىندىعى بار.
گۇلدەردىڭ قاجەتتىلىگى نە؟ مەنىڭشە, الدىمەن دەنساۋلىققا پايدالى, ەكىنشىدەن, ادەمىلىگىندە, اينالاسىنا ەستەتيكالىق اسەرى مول. ءبىز ادەمىلىگىنە كوڭىل ءبولىپ, كوپ جەردە تابيعي ەمەس, جاساندى گۇلدەر ورنالاستىرىپ قويعانبىز. مەيرامحانا, مەكەمەلەردە, ءتىپتى ءۇي ىشىندە تابيعي گۇلدەر ءوسىرۋدىڭ نە قيىندىعى بار؟ ءمان بەرمەيمىز.
مەنىڭ وسى جازعاندارىم ۇساق-تۇيەك شىعار, بىراق كوڭىلىمىزگە قاياۋ تۇسىرەدى. وعان قوسا, نە نارسە دە ۇساق-تۇيەكتەن باستالىپ, ۇلكەن پروبلەماعا اينالادى عوي, سونى ۇمىتپاساق ەكەن.
ەركىن داۋەش ۇلى,
زەينەتكەر
استانا
ونەردەگى جاراستى جۇپ
تاۋبە دەپ ايتايىق, حالقىمىز قاشاننان تالانتتى دا ونەرلى جاستارعا كەندە بولماعان. سولاردىڭ ارقاسىندا قازاق ەلى ايداي الەمگە تانىلىپ, مەرەيى اسقاقتاعان. بۇل ءۇردىستىڭ قازىر دە ءتىنى ۇزىلگەن ەمەس.
وسى جۋىردا عانا تەلەديداردان ونەرلى جاس قۋانىش قۇرمانباەۆ بالامىزدىڭ «مەنىڭ جۇرەگىم» اتتى شىعارماشىلىق كەشىن تاماشالادىق. بىردەن ايتايىن, كەش ءوزىنىڭ مۇلدە بولەك پىشىمدە, ەرەكشە دە اسەرلى وتۋىمەن جاندى باۋراپ الدى. دارىندى جاستىڭ ەرەكشەلىگى سول, كومپوزيتوردىڭ ارناۋلى مۋزىكالىق ءبىلىمى بولماسا دا بارلىق مۋزىكا اسپاپتارىندا ەركىن ويناي بىلەدى ەكەن. «موتور كەلىن» اتانعان زايىبى قارلىعاش تا ءانشى ءارى وسى اتتاس كىتاپتىڭ اۆتورى كورىنەدى.
كەش بارىسىندا باتىر, اڭىز ادام – باۋكەڭنىڭ كەلىنى, جازۋشى زەينەپ احمەتوۆا اپايىمىز كىتاپتىڭ تۇساۋىن كەسىپ, اقجارما تىلەگىن ءبىلدىردى. بىرگە ءوسىرىپ, تاربيەلەگەن 6 ۇل-قىزىن ساحناعا الىپ شىعىپ, ءان شىرقادى. ءبارى بىردەي زالدا, تىڭدارماندارمەن بىرگە وتىرعان انالارىنا كەلىپ, قۇرمەت كورسەتىپ, قۇشاعىن گۇلگە تولتىردى. 8 ناۋرىز – حالىقارالىق ايەلدەر كۇنى قارساڭىنداعى وسى ءبىر اسەرلى كورىنىس كوڭىلدەردى تولقىتىپ, جانارلارعا جاس ءۇيىردى. انانى قالاي قۇرمەتتەۋدى جاستارىمىز وسىنداي جانداردان ۇيرەنۋگە ءتيىس دەگەن ويدامىز.
قۋانىشتىڭ «ايەلدىڭ باقىتى – وتباسى» سياقتى حيت اندەرىن ءسۇيىپ تىڭدايتىنداردىڭ قاراسى قالىڭ. ال كەشتە سونداي-اق ونىڭ ونەردە بىرگە جۇرگەن دوستارى تورەعالي تورەالى, نۇربولات ابدۋللين, ايگەرىم قالاۋباەۆا, ەرنار ايدار, تاعى باسقالار ءانشى-كومپوزيتور جىگىتتىڭ اندەرىن ورىندادى.
«ەل ءىشى – ونەر كەنىشى» دەگەن وسى دا!
كارىباي امزە ۇلى,
كورەرمەن
تۇركىستان وبلىسى
