سۋرەتتى تۇسىرگەن – يگور بۋرگاندينوۆ
ءىس-شاراعا مادەنيەت جانە اقپارات ءمينيسترى ايدا بالاەۆا, پارلامەنت دەپۋتاتتارى, حالىقارالىق ۇيىمدار مەن ازاماتتىق سەكتور وكىلدەرى قاتىسىپ, وتباسىلىق-دەموگرافيالىق ساياسات, ايەلدەردىڭ قازىرگى قوعامداعى ءرولى, وتباسىلاردى الەۋمەتتىك جانە ەكونوميكالىق قولداۋ, بالالاردىڭ قۇقىقتارى جانە باسقا دا كوپتەگەن ماڭىزدى ماسەلەلەردى تالقىلادى.
مەملەكەت باسشىسى قاسىم-جومارت توقاەۆ ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەلەرىنە مەرەيتويعا وراي قۇتتىقتاۋ حات جولدادى.
«كوميسسيا گەندەرلىك تەندىكتى قامتاماسىز ەتۋ, وتباسى ينستيتۋتىن نىعايتۋ جانە انا مەن بالانى قورعاۋ ىسىندە ەرەكشە ءرول اتقارىپ كەلەدى. بۇل قۇرىلىم ۋاكىلەتتى ورگانداردىڭ, ازاماتتىق سەكتوردىڭ جانە بيزنەستىڭ كۇش-جىگەرىن توعىستىراتىن ءتيىمدى مىنبەرگە اينالدى. ۇلتتىق كوميسسيانىڭ ساراپشىلارى زاڭداردى جانە مەملەكەتتىك باعدارلامالاردى ازىرلەۋگە بەلسەندى اتسالىسىپ, ماڭىزدى الەۋمەتتىك جوبالار مەن باستامالاردى جۇزەگە اسىرىپ كەلەدى. كەيىنگى كەزدە ەلىمىزدە ايەلدەر ءۇشىن تىيىم سالىنعان ماماندىقتار ءتىزىمى جويىلدى, سايلاۋ كۆوتالارى ەنگىزىلدى, ىشكى ىستەر ورگاندارى جۇيەسىندە ايەل قۇقىقتارىن قورعاۋ جونىندەگى ارناۋلى بولىمدەر قۇرىلدى. سىزدەردىڭ ەسەلى ەڭبەكتەرىڭىزدىڭ ارقاسىندا قازاقستان بىرقاتار حالىقارالىق كونۆەنتسيانى راتيفيكاتسيالاپ, گەندەرلىك تەڭسىزدىكتى جويۋ جونىندەگى بارلىق مىندەتتەمەلەرىن ورىنداپ كەلەدى. ءبىز ايەلدەردىڭ قوعامداعى مارتەبەسىن كوتەرۋ جانە وتباسى قۇندىلىقتارىن دارىپتەۋ ءۇشىن جۇيەلى شارالاردى جالعاستىرىپ, بارشاعا بىردەي مۇمكىندىك بەرەتىن مەملەكەت – ادىلەتتى قازاقستاندى قۇرۋ جولىندا ناقتى قادامدار جاسايمىز», دەلىنگەن پرەزيدەنتتىڭ قۇتتىقتاۋ سوزىندە.
25 جىل ىشىندە ۇلتتىق كوميسسيا وتباسىلىق جانە گەندەرلىك ساياساتتاعى وزەكتى ماسەلەلەر بويىنشا ءتيىمدى جۇمىس جۇيەسىن قۇرا الدى. كوميسسيا مەن سەرىكتەستەردىڭ بىرگە اتسالىسۋىنىڭ ارقاسىندا ايەلدەر, وتباسى جانە بالالار قۇقىقتارىن قورعاۋعا باعىتتالعان جۇزدەگەن تابىستى جوبالار مەن باستامالار جۇزەگە اسىرىلدى. كوميسسيا وسى سالادا ماڭىزدى شەشىمدەر شىعارىپ, ولاردى ىسكە اسىرۋعا بەلسەندى ارالاساتىن بىرەگەي ورگانعا اينالدى.
«Amanat» پارتياسىنىڭ حاتشىسى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى شولپان كارينوۆا, بۇۇ-نىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري جانە باسقا دا سپيكەرلەر كوميسسيانىڭ ءرولى ايتارلىقتاي ەرەكشە ەكەنىن اتاپ ءوتتى. ءىس-شاراعا قاتىسۋشىلار ايەلدەر قۇقىقتارى مەن وتباسىلىق قۇندىلىقتاردى قورعاۋ سالاسىنداعى ودان ءارى ىنتىماقتاستىق ورناتىپ, بىرلەسىپ جۇمىس اتقارۋعا دايىن ەكەندىگىن جەتكىزدى.
فورۋمدى قورىتىندىلاعان ايدا بالاەۆا بۇگىنگى جيىن وتباسى مارتەبەسىن ارتتىرۋعا, گەندەرلىك تەڭدىكتى ساقتاۋ جۇمىستارىن ودان ءارى دامىتۋعا, جەتىستىكتەر مەن پەرسپەكتيۆالارعا جول اشىپ, بىرلەسكەن جۇمىسقا جاڭا سەرپىن بەرەتىنىنە سەنىم ءبىلدىردى.
