فوتو: ۇكىمەتتىڭ ءباسپاسوز قىزمەتى
اۋدانى 7,2 مىڭ شارشى مەتر بولاتىن زاماناۋي ورتالىق بالالاردى ساپالى قوسىمشا بىلىممەن قامتۋدى كەڭەيتۋ ماقساتىندا سالىنىپ جاتىر. اتالعان نىساننىڭ قۇرىلىسىنا 5,8 ملرد تەڭگە كولەمىندە دەمەۋشىلەر قاراجاتى تارتىلدى.
بالالار شىعارماشىلىعى سارايى ەڭ جوعارى تەحنولوگيالىق قۇرالدارمەن جابدىقتالاتىن بولادى. مۇندا عارىشتىق راديوبايلانىس كلۋبى, روبوتتەحنيكا ستۋدياسى, ونەركاسىپتىك ساۋلەت جانە ديزاين ستۋدياسى, عىلىمي-بيولوگيالىق زەرتحانا, كوۆوركينگ-ايماق, دىبىس جازۋ ستۋدياسى, فوتوگرافيا اكادەمياسى, كوركەم-ەستەتيكالىق شەبەرحانا, سپورتزال جانە تاعى باسقا اشىلادى دەپ كوزدەلىپ وتىر.
بۇگىنگى تاڭدا عيماراتتىڭ ىرگەتاسى قۇيىلىپ, ەڭ استىڭعى قابات پەن مەتالل قۇرىلىمدار ورناتىلدى. بيىلعى كۇزدە پايدالانۋعا بەرۋ جوسپارلانعان.
پرەمەر-مينيستر اكىمدىككە جوبانىڭ ۋاقتىلى ىسكە قوسىلۋىن قامتاماسىز ەتۋدى تاپسىردى.
«بۇل – مەملەكەت باسشىسىنىڭ تىكەلەي تاپسىرماسى بويىنشا سالىنىپ جاتقان وبەكت, سوندىقتان ساپاسى دا وتە جوعارى دەڭگەيدە بولۋى كەرەك. مۇنداي ورتالىقتار بالالاردىڭ بوس ۋاقىتىن قامتىپ, ولاردىڭ شىعارماشىلىق قابىلەتتەرىن دامىتۋعا, قوسىمشا ءبىلىم الۋىنا مۇمكىندىك بەرەدى. ورتالىق ىسكە قوسىلعاننان كەيىن قالادا قوسىمشا بىلىممەن قامتۋ دەڭگەيى 70%-دى قۇراماق. جوبا مەنىڭ جەكە باقىلاۋىمدا بولادى», دەدى ولجاس بەكتەنوۆ.
ەكىباستۇز اكىمى ايان بەيسەكيننىڭ ايتۋىنشا, بۇگىنگى تاڭدا قالادا 3 ۇيىم قوسىمشا ءبىلىم بەرۋمەن اينالىسادى. قامتۋ كورسەتكىشى شامامەن 7 مىڭ بالانى نەمەسە 31%-دى قۇرايدى. سونداي-اق جاڭا ورتالىق ەرەكشە ءبىلىم بەرۋ قاجەتتىلىكتەرى بار بالالارعا بەيىمدەلمەك.
