فوتو: ماكسيم زولوتۋحين
ساۋلەتشى جاننا سپۋنەردىڭ ايتۋىنشا, جەر سىلكىنىسى كەزىندە عيماراتتاردىڭ تومەنگى قاباتتارىندا تەربەلىس امپليتۋداسى از بولادى. ال ۇستىڭگى قاباتتاردا ءدىرىل كۇشى كۇشتىرەك سەزىلەدى. دەگەنمەن, قۇرىلىستىڭ سەيسميكالىق توزىمدىلىگى عيماراتتىڭ بيىكتىگىنە بايلانىستى ەمەس.
«كەڭەس وكىمەتى كەزىندە مەن 16-قاباتتا تۇردىم. سول كەزدە تالاي جەر سىلكىنىسىن باستان وتكەردىم. مەن مۇنىڭ ءبارى قالاي بولاتىنىن بىلەمىن. ادامدار قورقادى, ويتكەنى ولارعا جوعارىدا ۇلكەن ماسسا بار سياقتى كورىنەدى. ءبىزدىڭ ەلىمىزدە نەگىزىنەن بارلىق عيماراتتار جەتى-توعىز بالعا ەسەپتەلىپ سالىنعان. سول سەبەپتى, ەگەر ءسىز توعىز بالدىق سەيسميكالىق تۇرعىن ۇيدە تۇرساڭىز, جەكە ۇيگە قاراعاندا اسا قاۋىپسىزدىكتە بولۋىڭىز مۇمكىن», دەدى ساراپشى.
جەكە تۇرعىن ۇيلەردىڭ ارتىقشىلىعى − جەر سىلكىنىسى كەزىندە سىرتقا تەز ارادا جۇگىرىپ شىعۋعا بولادى. دەگەنمەن, ول ءۇي قۇرىلىس نورمالارىنا سايكەس سالىنۋى قاجەت.
«كەز كەلگەن تۇرعىن ءۇي عيماراتى قولدانىستاعى كودەكستەردىڭ تالاپتارىنا سايكەس سالىنباسا, ونىڭ قاتتى زاقىمدانۋى, ءتىپتى قۇلاۋى مۇمكىن. سوندىقتان جەكە تۇرعىن ءۇي سالىپ جاتقان ازاماتتارعا كەڭەس بەرگىم كەلەدى: جەر سىلكىنىسىنە ءتوزىمدى قۇرىلىس تالاپتارىنا ساي ءۇي سالىڭىز. انتيسەيسميكالىق بەلدەۋلەر ورناتىلۋى كەرەك, ال اراقابىرعالاردا ءاربىر ەكى مەتر سايىن تەمىربەتوندى قوسىندىلار بولۋى كەرەك», دەپ كەڭەس بەرەدى «قازقسعزي» اق ءوندىرىس جونىندەگى باسقارۋشى ديرەكتورى ەرالى شوقپاروۆ.
ماماندار الماتىدا ءبىر قاباتتى ۇيلەردى اعاش جاقتاۋمەن سالۋ ءتيىمدى دەپ ەسەپتەيدى. جەڭىل قۇرىلىم جەردەگى تەربەلىس كەزىندە قۇلاپ كەتپەيدى. دەگەنمەن, مۇنداي عيماراتتار دا قۇرىلىس نورمالارىنا سايكەس سالىنۋى كەرەك.
ايتا كەتەيىك, 4 ناۋرىز كۇنى تاڭەرتەڭ الماتىدا قۋاتى 5 بالل بولاتىنداي جەر سىلكىندى. ءزىلزالانىڭ وشاعى الماتىدان وڭتۇستىككە قاراي 31 شاقىرىم جەردە ورنالاسقان.
