تالعار اۋدانى قىزىل قايرات اۋىلىندا مۇگەدەك بالالاردى ەمدەۋگە ارنالعان «اق جول-م» وڭالتۋ ورتالىعىنىڭ جاڭا عيماراتى پايدالانۋعا بەرىلدى. جاڭا ورتالىقتىڭ اشىلۋ سالتاناتىنا الماتى وبلىسى اكىمىنىڭ ءبىرىنشى ورىنباسارى نۇرلان ءابدىراحىم, «قازاقستان حالقىنا» قق توراعاسى بولات جامىشەۆ, «نۇر مۇباراك» ۋنيۆەرسيتەتى مەن مەشىتىنىڭ باس يمامى, «اق جول-م» قامقورشىلىق كەڭەسىنىڭ مۇشەسى قايرات جولدىباي ۇلى, مەتسەناتتار مەن دەمەۋشىلەر, وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ, الەۋمەتتىك قورعاۋ سالاسىن دامىتۋدىڭ ۇلتتىق عىلىمي ورتالىعىنىڭ, دەنساۋلىق ساقتاۋ باسقارماسىنىڭ وكىلدەرى مەن اتا-انالار قاتىستى.
«جاڭا ورتالىقتا 200-دەي ەرەكشە بالاعا ارناۋلى الەۋمەتتىك قىزمەتتەر كورسەتىلەدى. قوردىڭ باسشىلىعى مەتسەناتتاردىڭ قولداۋىمەن بۇرىنعى عيماراتتىڭ جانىنا جەرتولەسى بار جاڭا ءۇش قاباتتى عيمارات سالدى. ەندىگى جەردە وڭالتۋ ورتالىعى ەكى ەسە كەڭەيىپ, ياعني 400-گە جۋىق بالانى قابىلداۋ مۇمكىندىگىنە يە. قازىرگى ۋاقىتتا بۇل ورتالىق وبلىستىق اكىمدىكتىڭ مەملەكەتتىك الەۋمەتتىك تاپسىرىسى شەڭبەرىندە مۇگەدەكتىگى بار 58 بالاعا ارناۋلى الەۋمەتتىك قىزمەتتەر كورسەتىپ جاتىر. بولاشاقتا مەملەكەتتىك تاپسىرىس كولەمىن ارتتىرىپ, كوپ بالانى قامتۋعا مۇمكىندىك بولادى», دەگەن نۇرلان ەرعالي ۇلى مەملەكەت باسشىسىنىڭ باستاماسىمەن قۇرىلعان «قازاقستان حالقىنا» قورىنىڭ ازاماتتارعا كومەك كورسەتۋدەگى جۇمىستارىنا العىسىن ءبىلدىردى.
جاڭا عيماراتتى زاماناۋي قۇرىلعىلارمەن جابدىقتاۋدى قور ءوز موينىنا العان. جالپى قۇنى 950 ملن تەڭگەگە جۋىق قارجىعا شۆەيتساريالىق روبوتتى وڭالتۋ كەشەنى, كورەيالىق جۇرۋگە ۇيرەتۋ كەشەنى, رەسەيلىك لوكوموتورلى تەراپيا جۇيەسى سىندى 80-نەن اسا قۇرىلعى الىنىپ, تۇزدى شاحتا, سەنسورلىق بولمەلەر جانە ارنايى كابينەتتەر جابدىقتالعان.
«بۇل «قازاقستان حالقىنا» قورىنىڭ قولداۋىمەن وڭىرىمىزدە ىسكە اسقان العاشقى جوبا ەمەس. وسىعان دەيىن الماتى وبلىسىنىڭ ونكولوگيالىق ورتالىعىنا كومپيۋتەرلىك توموگراف, مامموگراف جانە ساراپتامالىق دەڭگەيدەگى ۋلترادىبىستىق جۇيەسى بار جىلجىمالى مەديتسينالىق كەشەندەر تابىستالعان بولاتىن. قازىر ولار ەل يگىلىگىنە قىزمەت ەتىپ جاتىر», دەدى ول.
اتاپ ايتساق, قوردىڭ قولداۋىمەن سيرەك اۋرۋلارى بار 11 پاتسيەنت 1,2 ملرد تەڭگەدەن اسا سوماعا ءدارى-دارمەكپەن قامتاماسىز ەتىلگەن. ۇرىقتىڭ دامۋ اقاۋلارىن ەرتە انىقتاۋ بويىنشا شەتەلدە ەكى دارىگەر وقىتىلسا, ءمۇيىز قابىعىن ترانسپلانتاتسيالاۋدى قاجەت ەتەتىن كوزى ناۋقاس 9 پاتسيەنتكە 9,1 ملن تەڭگە سوماسىندا قايىرىمدىلىق كومەك كورسەتىلگەن.
الداعى ۋاقىتتا قورمەن بىرلەسىپ دەنساۋلىق ساقتاۋ سالاسىنا قاتىستى تاعى 3 جوبانى ىسكە اسىرۋ قاراستىرىلىپ وتىر. اتاپ ايتقاندا, كەگەن اۋدانىندا 2 بالالاردى وڭالتۋ ورتالىعىن, «كاۋسار» وبلىستىق وڭالتۋ ورتالىعىن اشۋ جانە وبلىستىق بالالار كلينيكالىق اۋرۋحاناسىن نەيروحيرۋرگيالىق جابدىقتارمەن قامتاماسىز ەتۋ جوسپارلانعان.
جاڭا ورتالىقتا بىلىكتى دارىگەرلەر, نۇسقاۋشىلار, لوگوپەد, رەابيليتولوگتەردەن قۇرالعان 68 ماماننىڭ كومەگىمەن 200-گە جۋىق بالا كەشەندى ەم الادى. وعان تولىق مۇمكىندىك بار. وڭالتۋ شارالارى كۇندىزگى ۋاقىتتا جۇرگىزىلەدى. اپتاسىنا بەس كۇن جۇمىس ىستەيتىن ورتالىقتىڭ بىرەگەيلىگى – ءار بالاعا جەكە ءمان بەرىلىپ, اتا-اناسىنىڭ بالاسىمەن بىرگە بولۋىنا قولايلى جاعداي جاسالىنعان. ورتالىقتىڭ اشىلۋ بارىسىندا قايىرىمدى ازاماتتار Neuro-MSX TMS (ترانسكرانيالدى ماگنيتتىك ستيمۋلياتور), مۇعالىمدەرگە ارنالعان جيھازدار, وتتەگى كونتسەنتراتتارى مەن زاماناۋي كومپيۋتەرلەردى سىيعا تارتتى.
بۇدان كەيىن «قازاقستان حالقىنا» قق وكىلدەرى تالعار قالاسىنداعى س.سەيفۋللين اتىنداعى №2 ورتا مەكتەپكە بارىپ, وقىتۋدىڭ جاڭا يننوۆاتسيالىق ادىستەرىمەن تانىستى.
الماتى وبلىسى
