فوتو: Ukimet
كەلىسسوزدەر بارىسىندا ۇكىمەتتەر باسشىلارى اعىمداعى ساۋدا-ەكونوميكالىق ىنتىماقتاستىق ماسەلەلەرىن جانە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن رەسەي فەدەراتسياسىنىڭ پرەزيدەنتى ۆلاديمير پۋتين اراسىندا جاسالعان ۋاعدالاستىقتاردىڭ ىسكە اسىرىلۋ بارىسىن تالقىلادى.
تاراپتار ساۋدا جانە ينۆەستيتسيا, ونەركاسىپ كووپەراتسياسى, ەنەرگەتيكا, اۋىل شارۋاشىلىعى, ازاماتتىق اۆياتسيا, سونداي-اق ترانزيتتىك-كولىك سالالارىنداعى بىرلەسكەن ءىس-قيمىلداردى ايقىندادى. سونىمەن قاتار مادەني-اعارتۋ سالاسىنداعى ءوزارا ءىس-قيمىل ماسەلەلەرى تالقىلاندى.
ولجاس بەكتەنوۆ ونەركاسىپ كووپەراتسياسىن نىعايتۋ جانە ساۋدا-ساتتىقتاعى ءوزارا ءىس-قيمىلىن دامىتۋدىڭ وڭ قارقىنىن اتاپ ءوتتى. قازىرگى تاڭدا ەكى ەلدىڭ بيزنەس سۋبەكتىلەرى قۇنى $26,5 ملرد بولاتىن 135 جوبانى ىسكە اسىرۋدا. سونىمەن قاتار ەكونوميكانىڭ نەگىزگى سالالارىندا, اتاپ ايتقاندا, ماشينا جاساۋ, مەتاللۋرگيا جانە حيميا ونەركاسىبىندە جالپى قۇنى $14 ملرد-تى قۇرايتىن قوسىمشا 67 بىرلەسكەن جوبا پىسىقتالۋدا. بىرلەسكەن كۇش-جىگەردىڭ ارقاسىندا 11 مىڭنان استام جۇمىس ورنى اشىلماق.
«ەلدەرىمىز اراسىنداعى قارىم-قاتىناستار جانە مادەني ىنتىماقتاستىقتىڭ بارلىق سپەكترى بويىنشا جەمىستى دامىپ كەلەدى. ماڭىزدى باعىت – ونەركاسىپ كووپەراتسياسى. ول قازىردىڭ وزىندە ءوزارا تابىستى ەكىجاقتى ءىس-قيمىلدىڭ ناقتى كورىنىسىنە اينالىپ وتىر. ەكى ەل ۇكىمەتتەرى ەلدەرىمىزدىڭ كوشباسشىلارى قول جەتكىزگەن بارلىق ۋاعدالاستىقتاردى ىسكە اسىرۋ ءۇشىن بار كۇش-جىگەرىن سالادى», دەدى قازاقستان پرەمەر-ءمينيسترى ولجاس بەكتەنوۆ.
قر ۇكىمەتىنىڭ باسشىسى قازاقستان-رەسەي مەملەكەتتىك شەكاراسىنداعى وتكىزۋ بەكەتتەرىن جاڭعىرتۋ جۇمىستارىن جەدەلدەتۋ جانە ۇيلەستىرۋ قاجەتتىگىن اتاپ ءوتتى.
كەزەڭدى جۇمىس شەڭبەرىندە 2027 جىلدىڭ سوڭىنا دەيىن جۇمىس كولەمىن ەسكەرە وتىرىپ ايقىندالعان 30 وتكىزۋ بەكەتىنىڭ 29-ى كۇردەلى جوندەۋدەن وتەدى. اتالعان شارالار ءترانزيتتى جەڭىلدەتۋگە جانە جالپى شەكارا بويىندا وتكىزۋ قابىلەتىن ارتتىرۋعا مۇمكىندىك بەرەدى. سونداي-اق «سولتۇستىك – وڭتۇستىك» حالىقارالىق ءدالىزىنىڭ الەۋەتىن كەڭەيتۋگە, «قازاقستان – تۇركىمەنستان – يران» تەمىرجول ۋچاسكەسىن قارقىندى پايدالانا وتىرىپ, كولىك ارتەرياسىن دامىتۋعا باسا نازار اۋدارىلدى.
سونىمەن قاتار قازاقستاندىق تاراپ اۋىل شارۋاشىلىعى ونىمدەرىن تەرەڭ وڭدەۋگە باسىمدىق بەرە وتىرىپ, اوك سالاسىنداعى ىنتىماقتاستىقتى جانداندىرۋدىڭ پەرسپەكتيۆتى باعىتتارىن اتاپ ءوتتى.
