دەپۋتاتتارعا كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ءبىرىنشى وقىلىمدا قاراۋ ۇسىنىلادى. قۇجاتتى پارلامەنت دەپۋتاتتارى مەملەكەت باسشىسىنىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن ىسكە اسىرۋ ماقساتىندا ازىرلەگەن.
ۇسىنىلىپ وتىرعان نورمالار ازاماتتاردىڭ شامادان تىس نەسيەسىن تومەندەتۋگە, قارىز الۋشىلاردىڭ قۇقىقتارىن قورعاۋدى ارتتىرۋعا, ازاماتتاردىڭ بانكروتتىق راسىمگە قول جەتكىزۋىن جەڭىلدەتۋگە, سونداي-اق كرەديت بەرۋ كەزىندە الاياقتىق ارەكەتتەردى ازايتۋعا باعىتتالعان. اتاپ ايتقاندا, كرەديتتەر بويىنشا 90 كۇننەن ارتىق مەرزىمى وتكەن جاعدايدا ازاماتتارعا جاڭا تۇتىنۋشىلىق نەسيە بەرۋگە تىيىم سالۋ ۇسىنىلادى. بۇدان باسقا كامەلەتكە تولماعان بالالارى بار وتباسىلاردى جىلىتۋ ماۋسىمىندا جالعىز تۇرعىن ۇيىنەن شىعارۋعا تىيىم سالاتىن نورما, سونداي-اق قارىز الۋشىنىڭ بانك شوتىندا كرەديتتەر بويىنشا بەرەشەكتى ءوندىرىپ الۋ ۇدەرىسىنە كەمىندە 2 كۇنكورىس مولشەرىندە اقشانىڭ ساقتالۋىن قامتاماسىز ەتەتىن تۇزەتۋلەر كوزدەلگەن.
دەپۋتاتتار الداعى جالپى وتىرىستا «عىلىم جانە تەحنولوگيالىق ساياسات تۋرالى» زاڭ جوباسىن ءبىرىنشى وقىلىمدا ىلەسپە تۇزەتۋلەرمەن تالقىلايدى. ولار عىلىمي قىزمەتتىڭ ستراتەگيالىق, كاسىبي جانە الەۋمەتتىك ماسەلەلەرىن شەشۋگە باعىتتالعان جانە عىلىمنىڭ ەل ەكونوميكاسىن دامىتۋعا قوسقان ۇلەسىن جاقسارتۋعا, عىلىمي الەۋەتتىڭ باسەكەگە قابىلەتتىلىگىن ارتتىرۋعا ىقپال ەتەتىن بولادى.
سونىمەن قاتار «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىنە (سالىق كودەكسى) عىلىم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا قارالادى. بۇل زاڭ جوباسىنا پارلامەنت دەپۋتاتتارى باستاماشىلىق ەتتى. ول سالىقتىق پرەفەرەنتسيالار بەرۋ ارقىلى عىلىمنىڭ دامۋىن ىنتالاندىرۋعا باعىتتالعان.
