- الماتىداعى بالۋان شولاق اتىنداعى سپورت سارايىندا كاسىپقوي بوكستان جارىس ءوتتى. تانىمال بوكسشى قانات يسلام جەتەكشىلىك ەتەتىن «قازاق پروموۋشەن» كومپانياسى ۇيىمداستىرعان تۋرنيردە قازاقستاننان بولەك وزبەكستان, ءۇندىستان, تاجىكستان, تۇركيا, يندونەزيا جانە قىتايدىڭ سپورتشىلارى قاتىستى. وسى كەشتىڭ باستى جەكپە-جەگىندە التى جىلعا سوزىلعان ۇزىلىستەن كەيىن شارشى الاڭعا قايتا ورالعان رۋسلان مىرساتاەۆ تۇركيالىق حامزا گيۋنەشتى ءبىرىنشى راۋندتا ۇرىپ جىقتى.
- 15-16 ناۋرىز ارالىعىندا قىتايدىڭ تايان قالاسىندا تاەكۆوندودان اسا ءىرى حالىقارالىق تۋرنير وتەدى. پاريج وليمپياداسىنىڭ جولدامالارى ساراپقا سالىناتىن بايراقتى باسەكەدە ماريا سەۆوستيانوۆا (57 كگ), جانسەل دەنيز (+67 كگ), ساميرحون اباباكيروۆ (58 كگ) جانە باتىرحان تولەۋعالي (80 كگ) تاتاميدە ايقاسادى.
- 11-13 ناۋرىزدا استاناداعى جەكپە-جەك سارايىندا وليمپيادا جانە الەم چەمپيونى, قازاقستاننىڭ ەڭبەك ەرى جاقسىلىق ۇشكەمپىروۆتىڭ ەسكە الۋعا ارنالعان جاستار (U-20) اراسىنداعى حالىقارالىق ءتۋرنيردىڭ شىمىلدىعى تۇرىلەدى. وسى باسەكەدە ەلىمىزدىڭ ەڭ دارىندى جاستارىمەن قاتار 10-نان اسا شەت مەملەكەتتەردەن كەلگەن بالۋاندار كۇش سىناسادى دەپ كۇتىلىپ وتىر.
- كەشە فرانتسيادا ۆەلوشاباندوزداردىڭ پاريج-نيتستسا كوپكۇندىگى باستالدى. 10 ناۋرىزعا دەيىن سوزىلاتىن ءداستۇرلى جارىستا سامۋەلە باتتيستەللا, الەكسەي لۋتسەنكو, دميتري گرۋزدەۆ, انتون چارميگ, كريستيان سكاروني ريۋديگەر زەليگ جانە حارولد تەحادا سىندى سپورتشىلار «استانا» كلۋبىنىڭ نامىسىن قورعاپ جاتىر.
- 31 ناۋرىز بەن 11 ءساۋىر ارالىعىندا تايلاندتىڭ پحۋكەت قالاسىندا اۋىر اتلەتيكادان الەم كۋبوگىنىڭ جالاۋى جەلبىرەيدى. بۇل باسەكەدە بەس جەرلەسىمىز كۇش سىناسادى. ولار – اينۇر ابدىحالىقوۆا (45 كگ), ەرناز الپىسوۆ (55 كگ), داريا بالابيۋك (59 كگ), ايسامال سانسىزباەۆا (+87 كگ) جانە مەيرام سۇلتان (109 كگ). وسى دودادا باستى ءۇمىت ايسامالعا ارتىلىپ وتىر. ول – جاسوسپىرىمدەر مەن جاستار اراسىنداعى الەم جانە ازيا چەمپيونى, الەم بىرىنشىلىگىنىڭ قولا جۇلدەگەرى جانە الەم كۋبوگىنىڭ يەگەرى.
- بوكستان يتاليانىڭ بۋستو-ارسيتسيو قالاسىندا وتەتىن ليتسەنزيالىق تۋرنيردە قىتايدىڭ قانداي قۇرامدا ونەر كورسەتەتىنى بەلگىلى بولدى. ءبىر قۋانتارلىعى, سول الپاۋىت مەملەكەتتىڭ ۇلتتىق قۇراماسىنىڭ كاپيتانى بولىپ دانابەك بايعازى تاعايىندالدى. اسا اۋىر سالماقتا كۇش سىناسىپ جۇرگەن قانداسىمىز بىلتىر حانچجوۋداعى ازيا ويىندارىندا قولا مەدالدى يەلەنىپ, تاشكەنتتەگى الەم چەمپيوناتىنىڭ شيرەك فينالىنا دەيىن جەتتى.
