فوتو: قر ۇلتتىق ۇلانىنىڭ ءباسپاسوز قىزمەتى
مودۋلدىك كازارمانىڭ قىزىل لەنتاسىن قر ىشكى ىستەر ءمينيسترىنىڭ ورىنباسارى – ۇلتتىق ۇلان باس قولباسشىسى گەنەرال-لەيتەنانت ەركىن بوتاقانوۆ پەن «شىعىس» وڭىرلىك قولباسشىلىعىنىڭ قولباسشىسى گەنەرال-مايور ارمان جۇماعاليەۆ قيدى.
«بۇگىن ءبىز مودۋلدىك ۇلگىدەگى جاڭا كازارمالاردىڭ عيماراتتارىن سالتاناتتى جاعدايدا اشتىق. بۇل ساربازدارعا دەگەن قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ باستاعان ەل باسشىلىعىنىڭ, سونداي-اق ىشكى ىستەر مينيسترلىگى مەن ۇلتتىق ۇلان باس قولباسشىلىعى جانە «شىعىس» وڭىرلىك قولباسشىلىعىنىڭ قامقورلىعى دەپ بىلگەيسىزدەر.
ۇلتتىق ۇلاننىڭ اسكەري قىزمەتشىلەرى ارقاشان جەكە ادامنىڭ, قوعامنىڭ جانە مەملەكەتتىڭ قاۋىپسىزدىگىن قورعايدى. وسى باعىتتا ابىرويلى قىزمەت ەتە بەرىڭىزدەر.
5512 اسكەري بولىمىندە قوعامدىق ءتارتىپتى ساقتاۋ بويىنشا جەدەل ماقساتتاعى باتالون عانا ەمەس, سونىمەن قاتار ارنايى ماقساتتاعى بولىمشەلەر دە بار. مۇنداي جاڭاشىلدىقتار الداعى ۋاقىتتا دا جالعاسىن تابادى», دەدى ۇلتتىق ۇلان باس قولباسشىسى گەنەرال-لەيتەنانت ەركىن بوتاقانوۆ.
جاڭادان سالىنعان مودۋلدىك عيماراتتار ءارتۇرلى ماقساتتا قولدانۋعا ارنالعان بولمەلەردەن تۇرادى. اتاپ ايتقاندا, مودۋلدىك كازارما كەزەكشى بولمەلەردەن, دەمالۋعا, وق-دارىلەردى, قارۋدى ساقتاۋعا, قارۋدى تازارتۋعا, جەكە بروندى قورعانىس جانە بەلسەندى قورعانىس قۇرالدارىن ساقتاۋعا ارنالعان بولمەلەردەن قۇرالعان. سونداي-اق مۇندا كەزەكشى بولىمشەنىڭ دەمالىس, جاتىن بولمەلەرى, كيىم اۋىستىراتىن, جۋىناتىن بولمەلەر, سانيتارلىق توراپ, دۋش بولمەسى, سپورت زال, جاتتىعۋ زالى, جاۋىنگەرلىك دايىندىق سىنىبى, ارنايى دايىندىق تاكتيكاسى سىنىبى, اقپاراتتىق-تاربيە سىنىبى, كيىم-كەشەك پەن اياق كيىمدى كەپتىرۋگە ارنالعان بولمە, قويما, اۆتوتەحنيكانى ساقتاۋعا ارنالعان بوكستار بار.
«ۇلتتىق ۇلان ساربازدارىنا ارنالعان جاڭا نىسان ساپالى سالىنعان. سوندىقتان قۇقىقتىق ءتارتىپ اسكەرىنىڭ پاۆلودار وبلىسىنىڭ ورتالىعىندا قىزمەت ەتىپ جۇرگەن اسكەري قىزمەتشىلەرىن قۇتتىقتايمىن! وسىنداي مودۋلدىك عيماراتتار كوبىرەك سالىنۋىنا تىلەكتەسپىز. ءبىز ۇلتتىق ۇلانمەن بىرلەسىپ جۇمىس ىستەۋگە ارقاشان دايىنبىز», دەدى پاۆلودار وبلىسى اكىمىنىڭ ورىنباسارى داۋرەن جابايبەك.
سونداي-اق سالتاناتتى ءىس-شاراعا قازاقستان حالقى اسسامبلەياسىنىڭ مۇشەسى سۆەتلانا شين جانە «نۇر انا» قوعامدىق بىرلەستىگى ءتورايىمىنىڭ ورىنباسارى تالجىبەك اتامبەك قاتىسىپ, ءسوز سويلەدى. ال ءوز كەزەگىندە «انالار جۇرەگى» كوميتەتىنىڭ جەتەكشىسى ليليا حايرۋللينا مودۋلدىك كازارمانىڭ كوڭىلىنەن شىققانىن اتاپ ءوتتى.
ء«بىز بالالارىمىزدىڭ وزىق تەحنيكالارمەن جابدىقتالعان وسىنداي تاماشا كازارمادا تۇراتىنىنا قۋانىپ وتىرمىز. عيماراتتى ارالاپ شىقتىم. كازارما وتە جىلى جانە جايلى ەكەن. وسىنداي زاماناۋي كازارمالار ساربازداردىڭ الاڭسىز قىزمەت اتقارۋى ءۇشىن جاسالعان», دەدى ليليا حايرۋللينا.
ءىس-شارانىڭ اشىلۋ سالتاناتىنان كەيىن قۇرمەتتى قوناقتار جاڭا نىسان ىشىنە كىرىپ, ساربازدارعا جاسالعان جاعدايمەن تانىستى.
ء«بىر قاباتتى جاڭا كازارمادا بىزگە بارلىق جاعداي جاسالعان. كۇندەلىكتى تىنىس-تىرشىلىگىمىزگە قاجەتتى زاتتاردىڭ ءبارى بار. بۇل جەردە سپورتتىق دايىندىق تا جاساي الامىز. ساباق وتكىزۋگە ارنالعان سىنىپتار دا كەڭ. سوندىقتان بىزگە الاڭداۋلى اتا-انالارىمىز بەن باۋىرلارىمىزعا جاعدايىمىزدىڭ جاقسى ەكەنىن جەتكىزگىم كەلەدى», دەدى 5512 اسكەري ءبولىمىنىڭ قاتارداعى جاۋىنگەرى نۇرلان ءتاجى.
ايتا كەتەيىك, ەندى جەدەل پولكتىڭ ساربازدارى جيھازدارى مەن جابدىقتارى ورناتىلعان جاڭا مودۋلدىك عيماراتتاردا تۇرادى. ءار كازارما 100 ساربازعا ارنالعان. جاڭا تۇرعىن ۇيلەردىڭ ەرەكشەلىگى كوپ: ولار بلوكتى-ءمودۋلدى, تىكبۇرىشتى ءتيپتى جانە ارقايسىسىنىڭ اۋدانى 1200 شارشى مەتردى قۇرايدى. اۆتوتەحنيكالاردى ساقتاۋعا ارنالعان بوكستارداعى ەدەننەن توبەگە دەيىنگى بيىكتىك – كەمىندە ءتورت مەتر, قالعان ءۇي-جايلاردىڭ بيىكتىگى – كەمىندە ءۇش مەتر.
ەسكە سالايىق, 5512 اسكەري ءبولىمى قازاق كسر مينيسترلەر كەڭەسىنىڭ 1989 جىلعى 23 قازانداعى قاۋلىسىمەن پاۆلودار قالاسىندا جەكە ارنايى موتورلى ميليتسيا باتالونى رەتىندە جاساقتالعان.
2021 جىلدىڭ 9 جەلتوقسانىندا باتالون پولك بولىپ قايتا قۇرىلدى. 5512 اسكەري ءبولىمىنىڭ 200-دەن اسا اسكەري قىزمەتشىسىنەن تۇراتىن جەكە قۇرامى پاۆلودار قالاسىندا 80 جاياۋ پاترۋلدەۋ مارشرۋتتارىندا جانە 6 اۆتوموبيل مارشرۋتتارىندا قىزمەت اتقارادى.
پولكتىڭ قىزمەتتىك-جاۋىنگەرلىك ءىس-قيمىلىنىڭ نەگىزگى باعىتتارى – ىشكى ىستەر ورگاندارىمەن بىرلەسىپ قوعامدىق ءتارتىپتى ساقتاۋ, جاپپاي تارتىپسىزدىكتەردىڭ جولىن كەسۋگە قاتىسۋ, قوعامدىق قاۋىپسىزدىكتى, سونداي-اق توتەنشە جانە سوعىس جاعدايىنىڭ قۇقىقتىق رەجيمدەرىن قامتاماسىز ەتۋدەن تۇرادى. بۇدان بولەك, تەرروريزمگە قارسى وپەراتسيالارعا, تابيعي, تەحنوگەندىك جانە الەۋمەتتىك سيپاتتاعى توتەنشە جاعدايلاردى جانە ولاردىڭ سالدارىن جويۋ جونىندەگى ءىس-شارالارعا قاتىسادى.
