فوتو: elements.envato.com
كوميتەت توراعاسى سۇلتانبەك ماكەجانوۆ كەزدەسۋدە 2023 جىلعى ناۋرىزدان باستاپ جۇمىس ىستەپ كەلە جاتقان «قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى» زاڭ ءوز قارىزدارى بويىنشا ەسەپ ايىرىسا المايتىن ازاماتتاردىڭ تولەم قابىلەتتىلىگىن قالپىنا كەلتىرۋگە باعىتتالعانىن اتاپ ءوتتى. الايدا راسىمدەر بارىسىندا ازاماتتارعا بەرىلگەن مۇمكىندىكتەردى پايدالانۋعا كەدەرگى كەلتىرەتىن كەمشىلىكتەر بار.
«زاڭدا سوتتان تىس جانە سوت ارقىلى بانكروت بولۋ, سونداي-اق تولەم قابىلەتتىلىگىن قالپىنا كەلتىرۋ راسىمدەرى كوزدەلگەن. بۇل ءۇش راسىمگە بورىشكەردىڭ ءوزى باستاپ كىرىسۋگە ءتيىس. بىراق تاجىريبە كورسەتىپ وتىرعانداي, بۇل راسىمدەردە ازاماتتاردىڭ تولەم قابىلەتتىلىگى مەن بانكروتتىعىن قالپىنا كەلتىرۋگە تولىق مۇمكىندىك بەرمەيتىن بەلگىلى ءبىر كەمشىلىكتەر بار. وعان نەسيە بەرۋشىلەر مەن كوللەكتورلاردىڭ بورىشكەر تۋرالى نەسيە بيۋروسىنا بەرگەن ءۇستىرت دەرەكتەرى نەگىزگى سەبەپ بولىپ تۇر. «كرەديتورلار تىزىمىندە كەيبىر قارجى ۇيىمدارىنىڭ بولماۋى, سونداي-اق راسىمدەردى قولدانۋ تۋرالى ءوتىنىش تۋرالى كرەديتورلاردى حاباردار ەتۋ مەرزىمىنىڭ تىم شولاقتىعى دا بار», دەدى سۇلتانبەك ماكەجانوۆ.
جيىندا قارجى مينيسترلىگىنىڭ وكىلى قايرات مياتوۆ تولەم قابىلەتتىلىگىن قالپىنا كەلتىرۋ راسىمدەرى تۋرالى ايتتى. ماسەلەن, سوتتان تىس بانكروتتىق راسىمىندە 9 841 ازامات 19,8 ملرد تەڭگەدەن استام بورىش سوماسى بويىنشا بانكروت دەپ تانىلدى, سوت ارقىلى بانكروت بولۋ ءراسىمىن قولدانۋ ءۇشىن سوتقا 2 مىڭعا جۋىق ازامات جۇگىندى, ال 4 ازاماتقا قاتىستى تولەم قابىلەتتىلىگىن قالپىنا كەلتىرۋ ءراسىمى قولدانىلدى.
سونىمەن قاتار ءىس-شاراعا ادىلەت مينيسترلىگى, سوت اكىمشىلىگى, قارجى نارىعىن رەتتەۋ جانە دامىتۋ اگەنتتىگى, سونداي-اق «قازاقستان قارجىگەرلەرى قاۋىمداستىعى», «بورىشكەرلەردىڭ قۇقىقتارىن قورعاۋ قاۋىمداستىعى» زاڭدى تۇلعالار بىرلەستىگىنىڭ وكىلدەرى قاتىستى.
