موگامەد حامادوۆيچ قازىر بۇكىل الەمگە بەلگىلى «ۆولگوگرادحيمماش» زاۆودىنىڭ باس ديرەكتورى بولىپ قىزمەت ىستەيدى. تانىستىعىمىز دوستىققا ۇلاسىپ, جاقسى قارىم-قاتىناستا بولدىق. موگامەد دوسىم كەزدەسكەن سايىن اتاسى ءالي مەن اجەسى بەسيرتتى 1944 جىلعى اقپاننىڭ قاقاعان ايازىندا شيەتتەي بەس بالاسىمەن سەمەي ستانساسىنان ءتۇسىرىپ كەتكەندە ولاردى قازاق اعايىننىڭ قامقورلىعىنا الىپ, وزدەرى دە جوقشىلىقتىڭ تاۋقىمەتىن كورىپ جۇرسە دە بارىمەن بولىسكەنىن ايتىپ وتىراتىن. قازاقتىڭ قۋعىن-سۇرگىنگە ۇشىراعان تالاي ۇلت وكىلىنىڭ ءتىرى قالىپ, ۇرپاعىنىڭ قۇرىپ كەتپەۋىنە جاساعان جاقسىلىعىن تەبىرەنە اڭگىمەلەيتىن ەدى. چەشەن جانە ينگۋش حالقى جوعارعى كەڭەستىڭ شەشىمىمەن 1957 جىلى اقتالىپ, اۆتونوميالىق رەسپۋبليكا قۇرىلعاندا موگامەدتتىڭ اكەسى حاماد پەن اناسى كوكا 1958 جىلى ەلىنە ورالادى. موگامەد حاماد ۇلى 1961 جىلى چەشەنستاندا دۇنيەگە كەلسە دە, بالا كەزىنەن اتا-اناسىنىڭ قازاقتاردىڭ اق پەيىلى, كەڭ داستارقانى مەن دارقان كوڭىلىنە ريزاشىلىعىن ەستىپ وسكەن.
حاماد اتا بالالارىنا كىشكەنتاي كەزىنەن: «ەر جەتىپ, ازامات بولعاندا قولدارىڭنان كەلسە, قازاقستانعا جاقسىلىق جاساڭدار. ويتكەنى ءبىز سول حالىققا قارىزدارمىز», دەپ ايتىپ وتىرادى ەكەن. موگامەد حاماد ۇلى اكە اماناتىن ورىنداۋ ماقساتىندا پاۆلودار وبلىسىنىڭ اۋماعىنان ونەركاسىپ قاۋىپسىزدىگىن ساقتاۋ ماقساتىندا ساراپتاما جۇرگىزەتىن جانە ونەركاسىپكە سەريالى جابدىق, ستاندارتتى ەمەس جابدىقتاردى شىعاراتىن زاۆودتى ءوز قاراجاتىنا سالىپ, 2022 جىلى ىسكە قوسادى. بۇگىندە موگامەد ەلجۋركاەۆ باسقاراتىن «ۆولگوگرادحيمماش» مەكەمەسى – ەلىمىزدىڭ باسقا دا مۇناي, گاز وڭدەۋ زاۋىتىنىڭ تاپسىرىسىمەن ءتيىستى بولشەكتەر مەن جابدىقتاردى دايىندايتىن سەرىكتەس.
ءار ادامنىڭ تاعدىرى – مۇحيت سياقتى تەرەڭ دە الۋان ءتۇرلى. ۇلكەن داستان دەرسىز. سول سياقتى دوسىم موگامەد حاماد ۇلىنىڭ اتا-اجەسىنىڭ, اكە-اناسىنىڭ باسىنان وتكەرگەن قيلى تاعدىرى – جۇرەك تەبىرەنتەتىن, ءوز الدىنا بولەك, ۇلكەن تاريح.
قيىن-قىستاۋ داۋىردە, تار جول تايعاق كەشكەن زاماندا دەمەۋ بولىپ, ۇرپاعى جوق بولىپ كەتۋگە تاياۋ قالعان شاڭىراققا قولۇشىن سوزعان ەلدى, جەردى ۇمىتپاي بالالارىنا قازاق حالقىنىڭ قانداي ەكەنىن قۇلاقتارىنا قۇيىپ, جۇرەكتەرىنە جەتكىزىپ كەتكەن ەلجۋركاەۆ اۋلەتىنە ءبىزدىڭ دە العىسىمىز شەكسىز.
ەرسۇلتان بەكتۇرعانوۆ
قوعام قايراتكەرى
