جەڭىس ساياباعىنداعى ەڭسەلى ەسكەرتكىشكە جينالعان اۋعان سوعىسىنىڭ ارداگەرلەرى مەن اسكەريلەر, اقساقالدار مەن قالا تۇرعىندارى القىزىل گۇل شوقتارىن قويىپ, قان مايداندا ەرلىك كورسەتكەن, سوعىستىڭ زاردابىن تاتىپ, ومىردەن وتكەن جاۋىنگەرلەردىڭ رۋحىنا تاعزىم ەتتى.
بۇدان سوڭ مادەنيەت ۇيىندە جالعاسىن تاپقان جيىنعا قوناەۆ قالاسى اكىمىنىڭ ورىنباسارى ساۋلە نۇرسولتانوۆا قاتىسىپ, لەبىزىن ءبىلدىردى.
«9 جىل 10 ايعا سوزىلعان اۋعان سوعىسى تۋرالى دەرەكتەرگە سۇيەنسەك, كەڭەس وداعىنان 600 مىڭنان استام ادام اتتانىپتى. وسىدان 35 جىل بۇرىن اۋعان سوعىسىنان 21 371 قازاقستان ارداگەرى امان-ەسەن وتانىنا ورالعان ەكەن. ولاردىڭ قاتارىنداعى 91 ارداگەر بۇگىندە قوناەۆ قالاسىنىڭ تۇرعىنى», دەگەن قالا اكىمىنىڭ ورىنباسارى بۇل ءىس-شارانىڭ وسكەلەڭ ۇرپاققا بەرەر تاربيەلىك ءمانى زور ەكەنىن اتاي كەلە, قايسارلىق پەن ەرلىكتىڭ ۇلگىسىن كورسەتكەن اۋعان سوعىسى ارداگەرلەرىنە العىسىن ءبىلدىردى.
سالتاناتتى جيىندا اۋعان ارداگەرى مارات قالعۇلوۆقا قوناەۆ قالاسىنىڭ قۇرمەتتى ازاماتى اتاعى بەرىلدى. سونداي-اق ارداگەرلەرگە 35 جىلدىق مەرەكەلىك مەدالى مەن العىسحات تابىس ەتىلدى. باسقوسۋدىڭ سوڭى پاتريوتتىق اندەر ورىندالعان كونتسەرتتىك باعدارلاماعا ۇلاستى.
الماتى وبلىسى
