فوتو: news.arsu.kz
قازاقستاندا ۋاقىت بەلدەۋى اۋىسادى
1 ناۋرىزدان باستالاتىن ەلدەگى, ەڭ باستى, وزگەرىس قازاقستاننىڭ ءبىرتۇتاس ۋاقىت بەلدەۋىنە وتۋىمەن بايلانىستى. ۇكىمەت وسى جىلدىڭ قاڭتار ايىندا «استانا, الماتى, شىمكەنت قالالارىنىڭ, اباي, اقمولا, الماتى, جامبىل, جەتىسۋ, قاراعاندى, قوستاناي, پاۆلودار, سولتۇستىك قازاقستان, تۇركىستان, ۇلىتاۋ, شىعىس قازاقستان وبلىستارىنىڭ اكىمدىكتەرى 2024 جىلدىڭ 29 اقپانىنان 2024 جىلدىڭ 1 ناۋرىزىنا قاراعان ءتۇنى (ساعات 00:00-دە) جەرگىلىكتى ۋاقىتتى 1 ساعات ارتقا اۋىستىرسىن», دەگەن قاۋلى قابىلدادى. وسىلايشا, قازاقستان بىرىڭعاي UTC+5 ۋاقىت بەلدەۋىنە اۋىسادى.
ناماز ۋاقىتى وزگەرەدى
قازاقستان مۇسىلماندارى ءدىني باسقارماسى قازاقستاندا ۋاقىت بەلدەۋىنىڭ اۋىسىنا سايكەس ناماز ۋاقىتى دا وزگەرەتىنىن حابارلادى. اتاپ ايتقاندا, استانا, الماتى, شىمكەنت, اباي, اقمولا, جامبىل, جەتىسۋ, قاراعاندى, قوستاناي, پاۆلودار, سولتۇستىك قازاقستان, تۇركىستان, ۇلىتاۋ جانە شىعىس قازاقستان وبلىستارىندا ناماز ۋاقىتى وزگەرەدى. مۋفتيات بەلگىلەگەن جاڭا ناماز ۋاقىتىن مىنا جەردەن كورۋگە بولادى. سونداي-اق 11 ناۋرىز كۇنى قاسيەتتى رامازان ايى باستالادى.
بلوگەرلەر ونلاين-جارنامانى تاڭبالاۋعا ءتيىس
2 ناۋرىزدان باستاپ ينفليۋەنسەرلەر (بلوگەرلەر) كوممەرتسيالىق نەمەسە شارتتىق نەگىزدە ورنالاستىراتىن ونلاين-جارنامانى تاڭبالاۋعا ءتيىس. «بىلتىر 10 شىلدەدە مەملەكەت باسشىسى «ونلاين-پلاتفورمالار جانە ونلاين-جارناما تۋرالى» زاڭعا قول قويدى. زاڭ جوباسى قازاقستاندا قاۋىپسىز ونلاين ورتا قۇرۋعا باعىتتالعان. قۇجاتتاعى كورسەتىلگەن نەگىزگى قۇقىقتىق تەتىكتەردىڭ ءبىرى – جەلىدەگى جارنامانى تاڭبالاۋ مىندەتتەمەسى. ءبىز زەرتتەگەن حالىقارالىق تاجىريبە كورسەتكەندەي, جەتەكشى ەلدەر ونلاين-جارنامانىڭ ماڭىزدى ءرولىن جانە ونى ونلاين-پلاتفورمالاردا كورسەتۋ تەتىكتەرىنە ەرەكشە نازار اۋدارادى. سونىمەن قاتار ونلاين-جارنامانىڭ اشىقتىعىن ارتتىرۋعا باعىتتالعان تالاپتاردى كوزدەيدى», دەپ جازدى مادەنيەت جانە اقپارات ءمينيسترى ايدا بالاەۆا الەۋمەتتىك جەلىدەگى پاراقشاسىندا.
قازاقستاننىڭ جەتى وڭىرىندە اۋىر جۇك كولىكتەرى قوزعالىسىنا ۋاقىتشا شەكتەۋ ەنگىزىلەدى
جىل سايىن كوكتەم ۋاقىتىندا قىس مەزگىلىنەن كەيىن جولداردى ساقتاۋ ءۇشىن ءبىر وستىك جۇكتەمەسى 8 توننادان اساتىن كولىكتەردىڭ جۇرۋىنە ۋاقىتشا شەكتەۋ ەنگىزىلەدى. «بەسىنشى جول-كليماتتىق دەپ اتالاتىن ايماققا» الماتى, اتىراۋ, جامبىل, قاراعاندى (جەزقازعان), قىزىلوردا, ماڭعىستاۋ جانە تۇركىستان وبلىستارى كىرىپ وتىر. شەكتەۋ توتەنشە جاعدايلاردىڭ الدىن الۋ جانە جويۋ جونىندەگى ءىس-شارالارمەن اينالىساتىن, جۇكتەر مەن جولاۋشىلاردى حالىقارالىق تاسىمالداۋدى جۇزەگە اسىراتىن, زارداپ شەككەندەرگە گۋمانيتارلىق كومەك كورسەتەتىن, ازىق-ت ۇلىك, جولاۋشىلار, جولجۇك, ءدارى-دارمەك تاسىمالدايتىن, سونداي-اق, جول-قۇرىلىس جۇمىستارىمەن اينالىساتىن كولىك قۇرالدارىنا قولدانىلمايدى.
«وتاۋ» جاڭا تۇرعىن ءۇي باعدارلاماسى ىسكە قوسىلادى
ەلىمىزدە 1 ناۋرىزدان باستاپ «وتاۋ» اتتى جاڭا تۇرعىن ءۇي باعدارلاماسى ىسكە قوسىلادى. يپوتەكالىق جوباعا 18 بەن 63 جاس ارالىعىنداعى كەز-كەلگەن ەل ازاماتى قاتىسا الادى. جاڭا باعدارلاما بويىنشا وتباسى بانكىندە جيناعان دەپوزيتى بار تۇلعالار عانا ءۇي الا الادى. باعدارلاماعا قاتىسامىن دەۋشىلەر وسى قارجى ينستيتۋتىنىڭ پورتالى ارقىلى 30 ساۋىرگە دەيىن ءوتىنىش بەرۋى ءتيىس.
الماتىدا ەلەكتر ەنەرگياسى ءتاريفى قىمباتتايدى
تاريفتەر كەلەسىدەي بولادى:
- ورتاشا ساتۋ ءتاريفى ققس-سىز 28 تەڭگە/كۆتساع قۇرايدى;
- حالىق ءۇشىن تاريف ققس-سىز 25,55 (+10%) تەڭگە/كۆتساع;
- زاڭدى تۇلعالار ءۇشىن ققس-سىز 29,73 (+11%) تەڭگە/كۆتساع;
- بيۋدجەتتىك ۇيىمدار ءۇشىن ققس-سىز 32,73 (-10%) تەڭگە/كۆتساع;
- سزپت وندىرۋشىلەرى ءۇشىن ققس-سىز 28 تەڭگە/كۆتساع.
وڭىرلىك كادر رەزەرۆىنە ىرىكتەۋ باستالادى
1 ناۋرىزدان باستاپ ەلىمىزدىڭ بارلىق وڭىرلەرى مەن رەسپۋبليكالىق ماڭىزى بار قالالارىندا وڭىرلىك كادر رەزەرۆتەرىنە ىرىكتەۋ باستالادى. ىرىكتەۋگە 35 جاستان اسپاعان, جوعارى ءبىلىمدى جəنە 3 جىلدان كەم ەمەس ەڭبەك ءوتىلى بار ەل ازاماتتارى قاتىسا الادى. وڭىرلىك رەزەرۆكە الىنعان ازاماتتار سايلاناتىن لاۋازىمداردى قوسپاعاندا, جەرگىلىكتى اتقارۋشى ورگانداردا «ب» كورپۋسىنىڭ مەملەكەتتىك اكىمشىلىك لاۋازىمدارىنا ورنالاسادى.
