«پرەزيدەنت قاسىم-جومارت توقاەۆتىڭ ەل جاستارىنا زور ءۇمىت ارتىپ, مەملەكەت تاراپىنان جان-جاقتى قولداۋ كورسەتىلىپ جاتقانىن سەزىنەتىن اۋدان جاستارى ءار سالادا بەلسەندىلىك تانىتىپ كەلەدى. وتكەن جىلى ءوڭىر جاستارىنىڭ تەڭ جارىمىنىڭ بەلسەنە قاتىسۋىمەن 130-عا جۋىق ءتۇرلى تاقىرىپتا ءىس-شارا وتكىزىلدى. سونداي-اق 167 جاس تۇراقتى جۇمىسپەن قامتىلدى», دەيدى «كەگەن اۋدانىنىڭ جاستار رەسۋرستىق ورتالىعىنىڭ» جەتەكشىسى توعجان قاناتقىزى.
ورتالىق جەتەكشىسىنىڭ ايتۋىنشا, «ديپلوممەن – اۋىلعا!» جوباسىمەن بىلتىر 78 مامان 27 ملن تەڭگە كوتەرمە جاردەماقى العان. «تۇرعىن ءۇي ساتىپ الۋعا بەرىلەتىن نەسيە بويىنشا 30 جاس مامانعا 155 ملن تەڭگە نەسيە بەرىلدى. جاستار ەڭبەك جاساقتارىن ۇيىمداستىرۋ تاجىريبەسى دە ۇتىمدى جالعاسىپ كەلەدى. «جاسىل ەل» باعدارلاماسىن ىسكە اسىرۋ ماقساتىندا 45 جاس جۇمىسقا تارتىلدى. مۇنىڭ بارلىعى – جاستارعا جاسالعان قامقورلىقتىڭ ايقىن كورىنىسى, ال ەڭسەلى عيماراتتىڭ ەسىك اشۋى قۋانىشىمىزدى تىپتەن ەسەلەي ءتۇستى», دەيدى ول.
اۋدان جاستارىنىڭ مەرەيىن اسىرىپ, قۋانىشىن تاسىتقان جاعىمدى جاڭالىق – اۋدان ورتالىعى كەگەن اۋىلىنان بوي كوتەرگەن «جاستار رەسۋرستىق ورتالىعى» عيماراتىنىڭ پايدالانۋعا بەرىلۋى ەدى. جالپى قۇنى 260,1 ملن تەڭگەنى قۇرايتىن نىساننىڭ لەنتاسىن قيۋ راسىمىنە الماتى وبلىسىنىڭ اكىمى مارات سۇلتانعازيەۆ قاتىسىپ, اۋدان جاستارىنىڭ الداعى ىستەرىنە ساتتىلىك تىلەدى.
كەڭ دە ساۋلەتتى ەتىپ سالىنعان ورتالىقتا جاستار جۇمىسقا ورنالاسۋ, ءوز كاسىبىن باستاۋ, مەملەكەتتىك باعدارلامالار بويىنشا كەڭەس الا الادى. جاڭا الاڭدا تەگىن بيزنەس-ترەنينگ, شەبەرلىك ساباعى مەن كەزدەسۋ, كورمە, ۇيىرمە جانە باسقا دا ءىس-شارا ۇيىمداستىرۋ جوسپارلانعان.
الماتى وبلىسى
