«قازاۆتوجولدىڭ» سوڭعى بەرگەن ۋادەسى بويىنشا, بىلتىر مامىر ايىندا «قاراعاندى – الماتى» تاسجولى تولىعىمەن ءبىتىپ, جولاۋشىلار اۆتوبانمەن قاتىناۋى كەرەك-ءتىن. بىراق قۇرىلىس جۇمىسىنا قاجەت ماتەريال باعاسىنىڭ كۇرت ءوسىپ كەتۋىنە بايلانىستى مەرزىمى تاعى كەشەۋىلدەدى. ەندى بيىل قاراشاعا دەيىن ءتامام بولۋعا ءتيىس.
شىنىمەن, تاسجولعا توسەلەتىن ماتەريالدىڭ باعاسى ەكى ەسە شارىقتاپ كەتىپتى. ماسەلەن, پتس 400-د0 ماركىلى پورتلاندتسەمەنتتىڭ قۇنى سمەتالىق قۇجاتتا – 16 330 تەڭگە بولعاندا بەكىتىلگەن ەكەن. قازىرگى قۇنى – 35 897 تەڭگە تۇرادى. جول قۇرىلىس بيتۋمى 100/130 ماركىسىنىڭ جوبالىق-سمەتالىق قۇجاتتاعى قۇنى – 106 230 تەڭگە بولسا, بۇگىنگى باعاسى – 210 146 تەڭگەگە قىمباتتاعان. ودان بولەك, ارماتۋرانىڭ جوبالىق-سمەتالىق قۇجاتتاعى قۇنىن 170 310 تەڭگەمەن ەسەپتەسە, ول 376 202 تەڭگەگە كۇرت كوتەرىلگەن.
«وسىعان بايلانىستى جوبالاۋ-سمەتالىق قۇجاتقا تۇزەتۋلەر ەنگىزىلدى. سونىڭ سالدارىنان جۇمىس جوسپارىن تاعى ءبىر جىل شەگەرۋگە تۋرا كەلدى. بۇل جاعدايدى «قازاۆتوجول» ۇق اكتسيونەرلىك قوعامى مەن يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتى بىرلەسە وتىرىپ قاراستىردى. جوبانىڭ باستاپقى قۇنى 248 ملرد تەڭگە بولسا, قازىر باعانىڭ شارىقتاۋىنان 317 ملرد تەڭگەگە جەتىپ وتىر», دەيدى «قازاۆتوجول» ۇق اكتسيونەرلىك قوعامىنىڭ ءباسپاسوز قىزمەتى.
بۇگىنگى كۇنگە دەيىن جۇمىستىڭ 85 پايىزى ورىندالعان. قۇرىلىس باستالعالى جولدىڭ استىڭعى توپىراق قاباتى ءۇشىن 36,4 ملن تەكشە مەتر ماتەريال توسەلگەن.
«ياعني 714,8 شاقىرىم استىڭعى جانە 719,3 شاقىرىم ۇستىڭگى توپىراقتى, قيىرشىق تاستى قاباتتار. قازىر جولدىڭ 701 شاقىرىمىنا (قاراما-قارسى باعىتتاردى ەسەپتەگەندە) اسفالت جابىندىسىنىڭ ءبىرىنشى قاباتى توسەلگەن. بارلىعى 720 شاقىرىم بولۋعا ءتيىس. ال اسفالت جابىندىسىنىڭ ەكىنشى قاباتى جولدىڭ 158,6 شاقىرىمىنا توسەلگەن. جول بويىندا 4 شاقىرىم اينالما جولدار عانا قالدى. دەگەنمەن اۆتوباننىڭ قاراما-قارسى باعىتتارىن ءبولىپ تۇراتىن قورشاۋ مەن جول بەلگىلەرىنىڭ جوقتىعىنا بايلانىستى كولىك قوزعالىسى ءۇشىن بارلىق ءتورت جولاعى بىردەن اشىلمادى. تەك ەكى جولاعىنا عانا جۇرۋگە رۇقسات ەتىلگەن. وسى كۇنگە دەيىن 11 كوپىر سالىنعان. ال سۋ وتكىزۋ قۇبىرلارىنىڭ جالپى سانى 311 بولسا, سونىڭ 309-ى سالىنعان. قالعان جۇمىستار بيىل اياقتالۋعا ءتيىس. قىس بويى قۇرىلىسقا قاجەتتى ماتەريالداردى دايىندادىق», دەيدى «قازاۆتوجول» ۇق اكتسيونەرلىك قوعامىنىڭ قاراعاندى وبلىستىق فيليالىنىڭ رەسمي وكىلدەرى.
بىلۋىمىزشە, الداعى قۇرىلىس ماۋسىمىنا دايىندىق جۇمىستارى جۇيەلى ءجۇرىپ جاتىر. بيىل جۇمىستى مەجەسىنە جەتكىزۋ ءۇشىن 795 جول مامانى مەن 610 تەحنيكا جۇمىلدىرىلادى.
اۋىل شارۋاشىلىعى تەحنيكاسىنا ارنالعان 32 جول وتكەلى بويىنشا جۇمىس 97 پايىزعا جۇزەگە استى. بالقاش قالاسىنداعى جولايرىق اياقتالىپ, اقسۋ-ايۋلى ەلدى مەكەنىنەن اينالىپ وتەتىن جولايرىق دايىندالىپ جاتىر. مۇنىمەن قوسا, بالقاش قالاسىنىڭ اينالما جولىندا تەمىرجول ارقىلى وتەتىن جول وتپەسى دە دايىن. كەلىسىمشارتتا قۇرىلىستىڭ اياقتالۋ مەرزىمى 2024 جىلدىڭ 30 قاراشاسى دەپ كورسەتىلگەن.
ەندى جىل سوڭىنا دەيىن جوبانىڭ ورىندالۋ مەرزىمىنە جانتالاساتىن جاۋاپتىلار ساپا جاعىن جىلى جاۋىپ تاستاماسا دەيمىز. دەگەنمەن مۇنى «جول اكتيۆتەرىنىڭ ۇلتتىق ساپا ورتالىعى» ءجىتى نازارىندا ۇستايدى. جاۋاپتى كومپانيا ءتورت جولاقتى اۆتوباندى جىل سوڭىنا دەيىن اياقتاماي جىر قىلسا, وندا كوپتىڭ كوكەيىندە «جولعا بولىنگەن قىرۋار قارجى قولعا كەتتى مە؟» دەگەن كولەڭكەلى وي تۋادى.
قاراعاندى وبلىسى
