قاريانىڭ احۋالىن جاقسارتقان وپەراتسيا

مي تامىرلارىنىڭ انەۆريزماسىنا وتە بىلىكتى, تاجىريبەسى تولىسقان ماماندار عانا وپەراتسيا جاساي الادى. سەبەبى بۇل زاماناۋي مەديتسينالىق جابدىقتاردى قاجەت ەتەتىن ەڭ كۇردەلى حيرۋرگيالىق ارالاسۋلاردىڭ ءبىرى سانالادى. مامانداردىڭ ايتۋىنشا, مۇنداي كۇردەلى وپەراتسيالار اقىلى تۇردە جۇرگىزىلسە, ونىڭ قۇنى شامامەن 10 ملن تەڭگەدەن اسادى ەكەن. ناۋقاس وپەراتسياعا كۆوتا بويىنشا كەلىپ, حيرۋرگتەر مىندەتتى الەۋمەتتىك مەدي­تسينا­لىق ساقتاندىرۋ اياسىندا وپەراتسيانى تەگىن جاساعان.

تەمىرتاۋدان كەلگەن پاتسيەنتتىڭ ايتۋىنشا, 2023 جىلدىڭ جازىنان بەرى باسى قاتتى اۋىرىپ, كورۋى السىرەپ, سول كوز­دەگى قوزعالىستىڭ شەكتەلۋى ما­زا­­لا­عان. سونداي-اق جوعارى قاباعى ءتۇسىپ كەتىپتى. دارىگەرلەر مرت جانە سەلەك­­تيۆتى تسەرەبرالدى انگيوگرافياعا ءتۇسى­رىپ, پاتسيەنتتە ميدىڭ كوپتەگەن انەۆريز­مالارىن, سول جاق ىشكى ۇيقى ارتەريا­سىنىڭ كاۆەرنوزدى-پاراكلي­نويدتى سەگمەنتىنىڭ 50,3-48,2 مم كولەم­دەگى فۋزيفورمدى انەۆريزماسىن, وڭ جاق ىشكى ۇيقى بەزىنىڭ پاراكلينويدتى سەگ­مەنتى ارتەريالاريالارىنىڭ 16,5-14,5 مم كولەمدەگى كەزدەيسوق فۋزيفورمدى انەۆريزماسىن انىقتاعان.

وتە كولەمدى انەۆريزما بار پاتسيەنت­تىڭ كلينيكالىق جانە نەۆرولوگيالىق س­تاتۋسىن ەسكەرگەندە, انەۆريزمانىڭ جا­­رىلۋ قاۋپى وتە جوعارى بولىپتى. سون­­داي-اق انەۆريزمانىڭ ەمبوليزاتسيا­سى كە­زىندە تامىردىڭ وككليۋزياسىنىڭ قاۋپى جوعارى ەدى. كونسيليۋم كەزىندە وسى­نىڭ بارلىعىن قاپەرگە العان ۇلتتىق نەيروحيرۋرگيا ورتالىعىنىڭ تامىرلى جانە فۋنكتسيونالدى نەيروحيرۋرگيا بولىمشەسىنىڭ دارىگەرلەرى وپەراتسيانى ەكى كەزەڭدە جۇرگىزۋ تۋرالى شەشىم قابىلدايدى.

وپەراتسيانىڭ ءبىرىنشى كەزەڭى بىل­تىر قاراشادا وتكەن. ول كەزدە دارى­گەر­لەر سول جاق ورتاڭعى مي ارتەريالا­رى­نىڭ فرونتالدى جانە پاريەتالدى تار­ماقتارى مەن م3-م4 سەگمەنتتەرى ارا­سىن­دا پروتەكتيۆتى ەكستراكرانيال­دى ميكروۆاسكۋليارلىق اناستوموز جۇر­گىزگەن. بۇل – سول جاق ىشكى ۇيقى ارتە­رياسىن ميكرو سپيرالمەن ءوشىرۋ­دىڭ رەنتگەندىك-تامىرلى ءادىسى. وپەرا­تسيا­­دان كەيىن پاتسيەنتتىڭ جوعارى قاباعى­نىڭ تۇسىڭكىرەگەنى (پتوز) قايتىپ, نەۆرو­لوگيالىق ستاتۋس جاقسارعان.

بىرنەشە كۇن بۇرىن پاتسيەنتكە وپە­راتسيانىڭ ەكىنشى كەزەڭى – وڭ جاق ىش­كى كاروتيد ارتەرياسىنىڭ پاراك­لي­نويد­­تى سەگمەنتىنىڭ فۋزيفورم­دى انەۆ­ريز­ماسىنىڭ رەنتگەندىك ەندو­ۆاسكۋليار­لىق ەمبوليزاتسياسى تەلەس­كوپيالىق اعىندى قايتا باعىتتاۋشى ستەنتتەردى قولدانۋ ارقىلى جۇرگىزىلدى.

پاتسيەنت قازىر ءوزىن الدەقايدا جاقسى سەزىنەدى. وپەراتسيا ناتيجەسىنە ريزا.

– ماعان وپەراتسيا جاساعان بارلىق دارىگەرگە العىس ايتامىن. قاراعاندىدا ماعان وپەراتسيا جاسالمادى. جاعدايىم اۋىر بولعان سوڭ وسى ورتالىققا جىبەردى. مەن وسى جەردە ەم قابىلداعانىما ريزامىن. قازىر ءبارى جاقسى. ءمامس جۇيەسىنىڭ ارقاسىندا بارلىق ەمشارا, تەكسەرۋ-زەرتتەۋلەر, وپەراتسيا تەگىن جاسالدى. بارىنە العىسىم شەكسىز, – دەيدى پاتسيەنت ناقىپبەك دانباەۆ.

وپەراتسيانى تامىرلى جانە فۋنكتسيونالدى نەيروحيرۋرگيا بولىمشەسىنىڭ جەتەكشى نەيروحيرۋرگ دارىگەرى شىڭ­عىس نۇريمانوۆ جاساعان. نەيروحيرۋرگ دارىگەر ش.نۇريمانوۆتىڭ ايتۋىنشا, كوپ جاعدايدا انەۆريزما بايقالمايدى. ءارى ادام كەز كەلگەن ۋاقىتتا ءولىپ كەتۋى مۇمكىن ەكەنىن بىلمەي, جىلدار بويى ءومىر سۇرە الادى ەكەن.

– انەۆريزما جارىلعانعا دەيىن ادام قولايسىزدىق پەن مازاسىزدىق بەل­گىلەرىن سەزىنبەيدى. سوندىقتان اۋرۋدى ەرتە ساتىسىندا انىقتاۋ ءۇشىن ادام كەم دەگەندە ءبىر رەت مسكت, ياعني مۋل­­تي­­سپيرالدى كومپيۋتەرلىك توموگرا­فيا جاساتۋ قاجەت, – دەپ كەڭەس ايتتى نەيرو­حيرۋرگ-دارىگەر.

مي تامىرلارىنىڭ انەۆريزماسىنا وپەراتسيا جاساۋ مامانداردىڭ جوعارى بىلىكتىلىگىن جانە زاماناۋي مەديتسينالىق جابدىقتى قاجەت ەتەتىن ەڭ كۇردەلى حي­رۋر­گيالىق ارالاسۋلاردىڭ ءبىرى سانالاتىنىن ايتتىق. بۇل كۇن سايىن ءمامس شەڭبەرىندە جاسالىپ جاتقان كۇردەلى وپەراتسيالاردىڭ ءبىرى عانا.