كەيىنگى كەزدەرى رۋحانيات ورداسىنا مەملەكەت تاراپىنان ءجىتى كوڭىل ءبولىنىپ, وقىرماندارعا قاجەتتى قۇرال-جابدىقتارمەن قامتاماسىز ەتىلىپ, ماتەريالدىق جاعىنان دا, مورالدىق جاعىنان دا جاعدايلار جاسالىپ كەلەدى. جاسوسپىرىمدەردى ەڭبەككە ءارى ونەرگە باۋلۋ ماقساتىندا كىتاپحانالار ىشىنەن ءتۇرلى ۇيىرمە مەن شەبەرحانا اشىلىپ, جۇمىس ىستەپ جاتىر. سولاردىڭ ءبىرى – باتىس قازاقستان وبلىستىق حامزا ەسەنجانوۆ اتىنداعى بالالار جانە جاسوسپىرىمدەر كىتاپحاناسىنىڭ ونەر بولىمىندە 2022 جىلى اشىلعان «قولونەر – ءداستۇر تىرەگى» اتتى ۇيىرمە.
جاس وقىرمانداردىڭ بوس ۋاقىتىن ءتيىمدى پايدالانۋ ءۇشىن تالانتتى, ون ساۋساعىنان ونەرى تامعان قىز بالالاردى ىسكەرلىككە, يكەمدىلىككە, دالدىككە باۋلۋمەن قاتار, ەرەكشە قاسيەتتەرىن ەرتە كەزەڭنەن انىقتاۋعا ىقپال ەتەتىن, ۇلتتىق قۇندىلىقتاردى دامىتۋعا نەگىزدەلگەن بۇل ۇيىرمەدە 10 مەن 15 جاس ارالىعىنداعى جەتكىنشەكتەر ءدارىس الادى. ءبىرىنشى جارتىجىلدىقتا بولىمگە كەلىپ تۇسكەن قولونەر سالاسىنا قاتىستى ادەبيەتتەرمەن تانىسىپ, ءىس ماشيناسىنىڭ قۇرىلىسىن, تىگىستەردىڭ بىرنەشە ءتۇرىن ۇيرەنەدى. ءارى قاراي جۇمىستارى كۇردەلەنىپ, قۇراقكورپە, قازاقتىڭ ويۋ-ورنەكتەرى بەينەلەنگەن بۇيىمدار جاساۋمەن جالعاسىن تابادى.
بۇل ۇيىرمەنى اشۋداعى ماقسات – بولاشاق ۇرپاققا رۋحاني قۇندىلىقتاردى, ۇلتتىق قولونەردى ناسيحاتتاۋ. ول ءۇشىن جەتەكشىلەرمەن بىرگە ءار اتا-انا بالاسىنىڭ دامۋىنا, جەتىستىكتەرگە جەتۋىنە اتسالىسۋدان ايانباۋى كەرەك. بالانىڭ بوس ۋاقىتىن ءتيىمدى پايدالانىپ, تالانتىن اشۋعا جاۋاپكەرشىلىكپەن قاراسا, شىعارماشىلىق قابىلەتى شىڭدالعان جاستىڭ بولاشاعىنان زور ءۇمىت كۇتۋگە بولادى. قازىر يننوۆاتسيالىق دامۋ كەزەڭىندە بارلىق بالا تەلەفون, ينتەرنەت ارقىلى نەبىر ءتۇرلى پايدالى-پايداسىز اقپاراتتاردى سانالارىنا ءسىڭىرىپ جاتىر. قولىنداعى سمارتفونىندا اقپاراتتىڭ تىم كوپتىگىنەن بالا ءوزىنىڭ باعىتىن تابا الماي قالۋى دا مۇمكىن. ساباقتى ينە ساتىمەن دەمەكشى, بولام دەگەن جاستى بەتىنەن قاقپاي, ۇلتتىق قۇندىلىقتار مەن مادەني مۇرالارىمىز جولىندا تاربيەلەسەك, كەلەشەك ۇرپاعىمىز ۇلاعاتتى بولارىنا سەنىم مول.
اينۇر ءشارىپوۆا,
ح.ەسەنجانوۆ اتىنداعى بالالار جانە جاسوسپىرىمدەر كىتاپحاناسىنىڭ كىتاپحاناشىسى
