فوتو: kaz.inform.kz
وڭىرلىك ۆەتەريناريا باسقارماسى ەپيزووتياعا قارسى ءىس-شارالار ءبولىمىنىڭ باسشىسى سامات ماجيروۆ حابارلاعانداي, ەپيزووتيالىق ليمفانگيت ەكىباستۇزعا قاراستى بەسقاۋعا اۋلىنداعى «قۋانىش» شارۋا قوجالىعىندا تىركەلگەن.
«بيىل 14 اقپاندا ەكىباستۇز اۋىلدىق ايماعىنىڭ قوياندى اۋىلدىق وكرۋگىنە قاراستى بەسقاۋعا اۋلىندا 1 باس جىلقى ولگەنى تىركەلدى. جىلقىلار اراسىندا ەپيزووتيالىق ليمفانگيت جانە ساقاۋ اۋرۋلارىن بولدىرماس ءۇشىن پاتولوگيالىق ماتەريال ىرىكتەلىپ, زەرتحاناعا جىبەرىلدى. 19 اقپان كۇنى زەرتحانالىق زەرتتەۋلەر ولگەن جانۋاردا ەپيزووتيالىق ليمفانگيت دەرتى بولعانىن انىقتادى. تابىندا شامامەن 624 جىلقى بولعان, ونىڭ 223-ءى – بيەلەر», دەپ مالىمدەدى ۆەتەريناريا باسقارماسىنىڭ وكىلى.
ەلدى مەكەندە ليمفانگيت اۋرۋىنىڭ راستالۋىنا بايلانىستى قوياندى اۋىلدىق وكرۋگى اكىمىنىڭ قاۋلىسىمەن 20 اقپاننان جىلقىلارعا ەپيزووتيالىق كارانتين سالىندى. كارانتيندىك جاعدايلاردا اۋرۋ جانۋارلاردان الىنعان ونىمدەردى ساتۋعا, تاسىمالداۋعا, اكەلۋگە, اكەتۋگە جانە پايدالانۋعا تىيىم سالىنادى.
«ۆەتەريناريالىق-سانيتارلىق ەرەجەلەرگە سايكەس اۋرۋ مال قان شىعارىلماي جويىلۋى كەرەك. ولگەن جانۋارلاردىڭ ۇشاسى تەرىسىمەن بىرگە جويىلادى. ەكىباستۇز قالاسىندا جانۋارلاردىڭ ولىكتەرىن ورتەۋ ءۇشىن جىلجىمالى ءورت ءسوندىرۋ قوندىرعىسى جۇمىس ىستەيدى. جانۋارلاردى ساۋىق- تىرۋ شارالارى, سونداي-اق شارۋاشىلىقتان الىپ قويىلعان جانە جويىلعان اۋرۋ جانۋارلاردىڭ قۇنىن وتەۋدى رەسپۋبليكالىق ەپيزووتياعا قارسى جاساق جۇزەگە اسىرادى. ال كارانتين سوڭعى اۋرۋ مال جويىلعاننان كەيىن, جىلقىلاردى قورىتىندى كلينيكالىق تەكسەرۋدەن, ءۇي-جايلاردى تازالاۋدان جانە دەزينفەكتسيالاۋدان وتكىزگەن سوڭ, ءۇش ايدان كەيىن الىنادى», دەپ ءتۇسىندىردى س.ماجيروۆ.
ماماننىڭ سوزىنشە, ەپيزووتيالىق ليمفانگيت – ليمفا تامىرلارى مەن ليمفا تۇيىندەرىنىڭ زاقىمدالۋىنان تەرىنىڭ, تەرىاستى تىندەرىنىڭ ءىرىڭدى قابىنۋىمەن سيپاتتالاتىن تاقتۇياقتىلاردىڭ سوزىلمالى جۇقپالى اۋرۋى. ينفەكتسيا قوزدىرعىشىنىڭ كوزى – اۋرۋ مال. تارالۋ فاكتورلارى – ات ابزەلدەرى, بايلاۋ باعاندارى, كۇتىم زاتتارى (ماتالى كورپەلەر, سومكەلەر, شەلەكتەر, تاراقتار جانە ت.ب.), توسەك-ورىن جابدىقتارى, كوڭ, اۋرۋ جانۋارلاردىڭ سەكرەتسياسىمەن لاستانعان قۇرالدار. ينفەكتسيا نەگىزىنەن اۋرۋ جانۋارلارمەن بايلانىس ارقىلى جۇرەدى. دەرتكە ۇرىنعان مالدىڭ ەتىن جەۋگە جانە جانۋارلارعا بەرۋگە تىيىم سالىنادى. اۋرۋ انىقتالعان ءۇي-جايلار دەزينفەكتسيالانادى.
وڭىرلىك ۆەتەريناريا باسقارماسى قازىر قاراعاندى وبلىسىمەن شەكارالاس اۋدانداردىڭ (ماي, باياناۋىل اۋداندارى مەن ەكىباستۇز قالاسى) اكىمدەرىنە مالداردىڭ قوزعالىسىنا, شالعايداعى مال ايداۋ پۋنكتتەرىنە باقىلاۋدى كۇشەيتۋ, ۆەتەريناريا ماماندارىنا حالىقپەن ءتۇسىندىرۋ جۇمىستارىن جۇرگىزۋگە كومەكتەسۋ تۋرالى حاتتار جولداعان.
قوياندى اۋىلدىق وكرۋگىنىڭ اكىمى ەرجان ءۋرازاليموۆتىڭ ايتۋىنشا, بۇگىنگە دەيىن «قۋانىش» شارۋا قوجالىعىندا جۇقپالى دەرتتەن 3 باس مال ولگەن. شارۋاشىلىقتاعى وزگە جانۋارلار ۆەتەريناريالىق دارىگەرلەردىڭ باقىلاۋىندا.
پاۆلودار وبلىسى,
ەكىباستۇز اۋىلدىق ايماعى
