سۋرەتتە: دوپ ويناعان دەپۋتاتتار
«بارلىق دەڭگەيدەگى ءماسليحاتتاردىڭ دەپۋتاتتارى مەن قىزمەتكەرلەرى, پارتيا فيليالدارىنىڭ وكىلدەرىنەن قۇرالعان 10 كوماندا باس جۇلدە ءۇشىن باسەكەگە ءتۇستى. تارتىستى ويىننىڭ كۋاسى بولدىق. ءاربىر ويىندا باسەكەلەستىك جوعارى بولدى. بىرىنشىدەن, بۇل قاتىسۋشىلار ءۇشىن جۇمىستان تىس ۋاقىتتا پايدالى باسقوسۋ ءارى دەپۋتاتتار اراسىندا دوستىق قارىم-قاتىناس ورناتۋ بولسا, ەكىنشىدەن, سالاماتتى ءومىر سالتىن قالىپتاستىرۋعا باعىتتالعان. بۇدان بولەك, كوكتەمدە ۆولەيبولدان تۋرنير ۇيىمداستىرۋدى جوسپارلاپ وتىرمىز», – دەيدى وبلىستىق پارتيا فيليالىنىڭ توراعاسى قۋات بايعوجاەۆ.
جارىس قورىتىندىسى بويىنشا باس جۇلدەنى قاراساي اۋداندىق ءماسليحات دەپۋتاتتارى جەڭىپ السا, ەكىنشى ورىندى ەڭبەكشىقازاق, ال جۇلدەلى ءۇشىنشى ورىندى كەگەن اۋداندىق ءماسليحات دەپۋتاتتارىنان قۇرالعان كوماندالار يەلەندى.
بۇدان بولەك, 5 اتالىم بويىنشا ۇزدىك ويىنشىلار ماراپاتتالدى. جالپى ويىننىڭ قورىتىندىسى بويىنشا قاراساي اۋداندىق ءماسليحات دەپۋتاتى بەكجان سۇنبەكوۆ قارسىلاستار قاقپاسىنا 13 گول سوعىپ, ءتۋرنيردىڭ «ۇزدىك سۇرمەرگەنى» اتاندى. ال 62 جاستاعى ەڭبەكشىقازاق اۋداندىق ءماسليحات توراعاسى بەكەت احمەتوۆ «ۇزدىك ويىنشى» اتالىمى بويىنشا ماراپاتتالدى.
«ادەمى, اسەرلى, قىزىقتى ويىن بولدى. ءبىز وتە مىقتى قارسىلاستارمەن باق سىناستىق. ويىن كوماندالىق رۋحتى كوتەردى. چەمپيونات سالاماتتى ءومىر سالتىن ۇستانىپ, سپورتپەن شۇعىلدانۋعا شاقىرادى. دەپۋتاتتاردىڭ ءوزارا ىنتىماقتاستىعىنا ىقپال ەتەدى», – دەيدى بەكەت احمەتوۆ.
سونىمەن قاتار «ۇزدىك قاقپاشى» اتالىمى رايىمبەك اۋداندىق ءماسليحاتى اپپاراتىنىڭ قىزمەتكەرى راشيد زوردينوۆقا, «ۇزدىك قورعاۋشى» – قاراساي اۋداندىق ءماسليحات دەپۋتاتى ابىلاي زۋايداعا جانە «ۇزدىك شابۋىلشى» – كەگەن اۋداندىق ءماسليحاتى اپپاراتىنىڭ قىزمەتكەرى ەرنۇر سابىربەكوۆتىڭ ەنشىسىنە ءتيدى.
الماتى وبلىسى
