وسى جىلدىڭ باسىنان ەلىمىزدە قازاق بەينەلەۋ ونەرىنىڭ نەگىزىن سالۋشى, قازاقستاننىڭ حالىق سۋرەتشىسى ءابىلحان قاستەەۆ پەن كسرو حالىق سۋرەتشىسى ورال تانسىقباەۆتىڭ 120 جىلدىعى اتالىپ ءوتىپ جاتىر. وسى ورايدا, بۇل شىعارماشىلىق كورمەسىن بالا كۇنىنەن وزىنە ءپىر تۇتقان ايتۋلى قوس تۇلعا رۋحىنا ارناعان سۋرەتشى سەيسەنحان ورىنبەك ۇلى ءار جىلداردا جازعان پەيزاج جانرىنداعى تۋىندىلارىن ونەرسۇيەر قاۋىم نازارىنا ۇسىندى. استاناداعى «ناS SANAT» گالەرەياسىندا اشىلعان كورمەگە بەلگىلى مەملەكەت جانە قوعام قايراتكەرلەرىمەن قاتار قاراپايىم جۇرتشىلىق كوپ جينالدى.
ءىس-شاراعا ارنايى قاتىسقان سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ العاشقى ءسوزدى الىپ, س.ماحانبەتتىڭ قىلقالامىنان تۋىنداعان كارتينالارىنا جوعارى باعا بەردى. سونىمەن بىرگە ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ايگۇل قۇسپان مەن ءماجىلىس دەپۋتاتى قازىبەك يسا ءسوز الىپ, سۋرەتشىگە شىعارماشىلىق تابىس تىلەپ, ونىڭ تۋىندىلارىنا بۇرىننان قىزىعۋشىلىق تانىتاتىنى تۋرالى جىلى لەبىزدەرىن ءبىلدىردى. كورمەگە قويىلعان كارتينالارىنىڭ وزىندىك ەرەكشەلىگى مەن پەيزاج جانرداعى شىنايى دا تابيعي قولتاڭباسىنا توقتالدى.
كورمەنىڭ اشىلۋىندا تۇركسوي-دىڭ باس حاتشىسى سۇلتان راەۆتىڭ سەيسەنحان ماحانبەتكە جولداعان قۇتتىقتاۋ حاتى وقىلدى. «قارىمدى دا تالانتتى قىلقالام شەبەرى رەتىندە شىعارماشىلىعىڭىزدى جوعارى باعالاپ, 2022 جىلى تۇركى الەمى سۋرەتشىلەرى اراسىندا ءسىزدى تۇركسوي-دىڭ ەڭ جوعارى ماراپاتى – التىن مەدال توسبەلگىسىمەن ماراپاتتاعانىمىزدى جۇرتشىلىق جاقسى بىلەدى. ەسىمى كۇللى ەل ەسىندە قالعان, ونەر جولىڭىزدا كۋمير تۇتقان قوس شەبەرگە ارناپ ءوز شىعارماشىلىعىڭىزبەن كورمە اشىپ جاتقانىڭىزعا ماڭىز بەرە وتىرىپ, تۇركسوي ۇيىمى اتىنان شىعارماشىلىق تابىس, زور دەنساۋلىق, تاۋسىلماس قايرات, شالقار شابىت تىلەيمىن» دەلىنگەن قۇتتىقتاۋدا.
سونىمەن بىرگە مادەنيەت جانە اقپارات مينيسترلىگى مادەنيەت كوميتەتىنىڭ باسقارما باسشىسى گۇلزەينەپ اناپياقىزى مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتىن وقىپ, كورمە يەسىنە ءبىر شوق گ ۇلىن تابىستادى. ء«سىزدى قالىڭ جۇرتشىلىق قازاق بەينەلەۋ ونەرىندە وزىندىك قولتاڭباسى بار كەسكىندەمەنىڭ حاس شەبەرى رەتىندە جاقسى تانيدى. «كەسەنەگە كىرەر قاقپا», «جەڭىسپەن ورالۋ» جانە وزگە دە مازمۇندى تۋىندىلارىڭىز قازاقستاندىق بەينەلەۋ ونەرىنىڭ التىن قورىنا ەندى» دەگەن مينيستر قىلقالام شەبەرىنە مارتەبەسى بيىك بەينەلەۋ ونەرىنىڭ ناعىز مايتالمانى رەتىندە ەلىمىزدىڭ اتاق-داڭقىن ودان ءارى ارتتىرا بەرۋىنە تىلەكتەستىگىن ءبىلدىردى. ءىس-شاراعا قاتىسقان قوناقتار اراسىنان «دارىن» مەملەكەتتىك سىيلىعى جازۋشى ايگۇل كەمەلباەۆا دا س.ماحانبەتكە ىزگى تىلەگىن ءبىلدىرىپ, سۋرەتشى مەن ونىڭ كارتينالارى تۋرالى ەسسە جازاتىنىن جەتكىزدى.
ەسكە سالا كەتسەك, ەلوردامىزدىڭ سول جاعالاۋىنداعى «ناS SANAT» گالەرەياسىندا اشىلعان كورمە ناۋرىز ايىنىڭ 15-ىنە دەيىن اشىق بولادى. كورەرمەندەر نازارىنا قىلقالام شەبەرىنىڭ 65 كارتيناسى قويىلعان. كەلەم دەۋشىلەرگە ەسىك اشىق.
