كومبينات شيكىزات وندىرۋدەن باستاپ ودان دايىن ءونىم الۋعا دەيىنگى ءوندىرىستىڭ بۇكىل تسيكلىن قامتيتىن كەۋەكتى تيتان, تيتان قۇيمالارى مەن قورىتپالارىن شىعاراتىن الەمدەگى ءبىرتۇتاس كاسىپورىنداردىڭ ءبىرى سانالادى. ءوندىرىس قۇرىلىمى 5 نەگىزگى جانە 6 قوسالقى تسەحتان, سونداي-اق ەنشىلەس ءارى بىرلەسكەن كاسىپورىنداردان تۇرادى. الەمدەگى تيتان نارىعىنىڭ 11 پايىزى قازاقستانعا تيەسىلى, ال اەروعارىش سالاسىنداعى تيتاننىڭ 20 پايىزدان استامىن ءبىزدىڭ ەل قامتاماسىز ەتەدى.
مەملەكەت باسشىسىنا كومبينات ءونىمىن Airbus, Boeing, TIMET, ATI, Safran, UKAD, Pratt&Whitney, General Electric, Dynamet, Howmet, POSCO, Baoti, MIDHANI سەكىلدى الەمدىك ءىرى كومپانيالار سەرتيفيكاتتاعانى تۋرالى باياندالدى. قازاقستان تيتانى كەمە جاساۋ ىسىندە, ەنەرگەتيكا, اەروعارىش سالالارىندا, مۇناي-گاز كاسىپورنىندا جانە مەديتسينادا كەڭىنەن پايدالانىلادى. ءونىم اقش-قا, ۇلىبريتانياعا, فرانتسياعا, وڭتۇستىك كورەياعا, ۇندىستانعا جانە قىتايعا ەكسپورتتالادى.
الداعى ون جىلدا كومبينات جالپى سوماسى 207 ميلليارد تەڭگە بولاتىن 25 ينۆەستيتسيالىق جوبانى جۇزەگە اسىرۋدى جوسپارلاپ وتىر. قاسىم-جومارت توقاەۆ ءوندىرىس تسەحتارىن ارالاپ كورىپ, كومبينات جۇمىسشىلارىمەن اڭگىمەلەستى.
«بۇل كومبينات كوپتەگەن ولشەم بويىنشا وزىق مەكەمە سانالادى. زاماناۋي قۇرالدارمەن جابدىقتالعان. قازاقستان تيتان ءوندىرىسى بويىنشا الەمدىك نارىقتا جەتەكشى ورىن الادى. ەلىمىز ءۇشىن مۇنداي كاسىپورىندار وتە قاجەت. جۇمىستارىڭىز تابىستى بولسىن», دەدى پرەزيدەنت.
