قابىلداۋلار بارىسىندا اۋىل تۇرعىندارى قاراباستىڭ قامى ەمەس, حالىققا ورتاق وتكىر دە وزەكتى ماسەلەلەردى كوتەردى. ماسەلەن, قاينازار اۋىلىندا كوممۋنالدىق ماسەلەلەردىڭ كوپتىگى ايتىلدى. تۇرعىندار جىلدار بويى ەلدى مەكەنگە اۋىل مارتەبەسىن الا الماي جۇرگەندەرىن جەتكىزدى. «سونىڭ كەسىرىنەن بارلىق ماسەلەنى ءوز بەتىمىزشە شەشۋگە ءماجبۇرمىز», دەيدى كۇيىنگەن جۇرت.
راحات اۋىلدىق وكۋرگىنىڭ تۇرعىنى تاسباي جانىبەكوۆ اۋىل ماڭىنداعى ساياجاي حالقىنىڭ بەلگىلى ستاتۋسى بولماعاندىقتان, زيراتقا ءتيىستى جەر بولىنبەيتىنىن ايتتى. «اۋىلدا زيرات جوق. بۇل ماسەلەنى كوتەرىپ جۇرگەنىمىزگە 2 جىل بولدى. سونىڭ سالدارىنان حالىق وزگە اۋىلدارداعى زيراتقا جاقىنىن جەرلەپ, سابىلىپ ءجۇر. وسى كۇنگە دەيىن قولدانعان جەرلەر سانيتارلىق نورمادان اسىپ كەتكەن. ەندى ءبىز وندا ادام جەرلەي المايدى ەكەنبىز. ماسەلەنىڭ قاشان شەشىلەتىنى بەلگىسىز. بىراق ءولىم كۇتىپ وتىرمايدى عوي. ءبىز «انە-مىنە شەشىلەدى» دەگەن جاتتاندى جاۋاپتان, شىنى كەرەك, شارشادىق», دەيدى اۋىل تۇرعىنى.
اۋىل حالقىنىڭ باسىم بولىگى جاڭا مەكتەپتەر مەن سپورت الاڭدارىن سالۋ, ىشكى جول قۇرىلىسى, كوشەلەردى جارىقتاندىرۋ, اۋىل شارۋاشىلىعى, سۋبسيديا الۋ, اعىن سۋ, جايىلىم جەر, ۇيالى بايلانىس پەن ينتەرنەت ساپاسىنىڭ ناشارلىعى, دارىگەرلىك امبۋلاتوريانىڭ جوقتىعى, تۇرعىن ءۇي-كوممۋنالدىق شارۋاشىلىق, جۇمىسسىزدىق سىندى تىزە بەرسەك, شەشىلگەنىنەن شەشىمىن كۇتكەنى كوپ الەۋمەتتىك ماسەلەنى كوتەردى.
وتكەن جىلى مۇنداي ءموبيلدى قوعامدىق قابىلداۋلار اياسىندا اماناتتىقتار 18 اۋىل حالقىمەن كەزدەسۋ وتكىزگەن. بيىل 20-عا جۋىق ەلدى مەكەندى قامتىماق.
«وتكەن جىلى پارتياعا تۇرعىنداردان 3 546 ءوتىنىش ءتۇستى. بۇل ماسەلەلەردىڭ 65 پايىزى قازىرگى ۋاقىتتا شەشىمىن تاپتى. الايدا شالعايدا ورنالاسقان حالىق پارتيانىڭ اۋداندىق نەمەسە وبلىستىق فيليالىنا جول ۇزاقتىعىنا بايلانىستى ءاردايىم كەلە بەرمەيدى. سوندىقتان ءبىز تۇرعىنداردىڭ ءتۇيىندى ماسەلەلەرىن العا تارتىپ كەلۋىن كۇتىپ وتىرماي, ءوزىمىز بارۋعا تىرىسامىز. مۇنداي كەزدەسۋلەر حالىققا ءتيىمدى. ويتكەنى بۇل ءموبيلدى قوعامدىق قابىلداۋدىڭ باستى ماقساتى – شالعاي ورنالاسقان ەلدى مەكەندەردەگى تۇرعىنداردى قابىلداپ, ولاردىڭ الەۋمەتتىك, قوعامدىق جانە وزگە دە ورتاق تۇيتكىلدى ماسەلەلەرىنىڭ شەشىلۋىنە ىقپال ەتۋ, باعىت-باعدار مەن كەڭەستەر بەرۋ», دەيدى وبلىستىق پارتيا فيليالى توراعاسىنىڭ ورىنباسارى اسلان كوبەنتاەۆ.
وسى ورايدا توپ وكىلدەرى اۋىل تۇرعىندارى كوتەرگەن ءاربىر ماسەلەنى نازارعا الىپ, ولاردىڭ زاڭ اياسىندا شەشىلۋىنە جۇمىس ىستەلەتىنىن جەتكىزدى. كەيبىر سۇراققا ناقتى كەڭەستەر بەرىپ, ماسەلەنى سول جەردە شەشۋگە ىقپال ەتتى.
قوعامدىق قابىلداۋعا وبلىستىق اكىمدىكتىڭ جەر قاتىناستارى, تسيفرلىق تەحنولوگيالار, مەملەكەتتىك ساۋلەت-قۇرىلىس باقىلاۋ, ەنەرگەتيكا جانە تۇكش باسقارمالارىنىڭ وكىلدەرى دە قاتىستى.
الماتى وبلىسى
