بۇل جوبا مادەنيەت جانە اقپارات مينيسترلىگى مەن ازاماتتىق باستامالاردى قولداۋ ورتالىعىنىڭ تاپسىرىسىمەن ىسكە اسادى. ءار وڭىردە ونىڭ امباسسادورى – جەر-جەردەگى جاستار رەسۋرستىق ورتالىعى.
«قازاقستاننىڭ ەكولوگيالىق قورى» قوعامدىق قورى – جوبانىڭ بيىلعى وپەراتورى. جوبانىڭ بۇل جولعى باستى ەرەكشەلىگى – NEET ساناتىنداعى جاستاردى ىنتالاندىرۋعا باعىتتالعاندىعىندا.
«Zhas Project» الەۋمەتتىك جوبالار مەن بيزنەس-يدەيالاردى قارجىلاندىرۋ ارقىلى NEET ساناتىنداعى 18 جاستان 35 جاسقا دەيىنگى جاس وتانداستارىمىزدى قولداۋعا باعىتتالعان. كونكۋرستىڭ ەرەجەسىمەن zhas-project-karaganda-kostanai.kz ۆەب-پورتالىندا تانىسۋعا بولادى. الەۋەتتى قاتىسۋشىلار ۆەب-رەسۋرستا جەكە تىركەۋدەن ءوتۋى, ساۋالنامانى تولتىرۋى جانە قاجەتتى قۇجاتتاردى تىركەۋگە ءتيىس. 24 ناۋرىزعا دەيىن اقپاراتتىق-ءتۇسىندىرۋ ناۋقانى وتەدى, ال وتىنىمدەردى قابىلداۋ 25 ناۋرىزدان باستالادى», دەيدى «قازاقستاننىڭ ەكولوگيالىق قورى» قوعامدىق قورىنىڭ پرەزيدەنتى ايگۇل ابدۋاليەۆا.
كونكۋرسقا ءوتىنىم بەرۋ ءۇشىن جەكە كۋالىكتىڭ كوشىرمەسىن, ەلەكتروندىق ۇكىمەت پورتالىنداعى جەكە كابينەتتەن وبلىس اۋماعىندا تىركەلگەنىن راستاۋ, قاتىسۋشىنىڭ وسال مارتەبەسىن راستايتىن قۇجاتتاردى تىركەۋ قاجەت.
«قاتىسۋشى NEET ساناتىنا جاتاتىن, ءوتىنىم بەرگەن ۋاقىتتا تۇراقتى نەمەسە ۋاقىتشا 3 اي تىركەۋدە بولعان, جاسى 18–35 ارالىعىنداعى ەل ازاماتى بولۋعا ءتيىس. بىلتىر 23 ءوتىنىش ءتۇستى, ونىڭ 14-ءى قولداۋ تاپتى. بيىلعى كونكۋرسقا قاراعاندى جانە قوستاناي وبلىستارىنىڭ تۇرعىندارى قاتىسا الادى», دەدى قور باسشىسى.
شاعىن گرانتتار كونكۋرسىنا قاتىسۋ تۋرالى قوسىمشا اقپاراتتى سall-ورتالىقتان الۋعا بولادى. كونكۋرستىڭ قورىتىندىسى وسى جىلدىڭ قاراشا ايىندا وتەتىن فورۋمدا جاريالانادى.
جاستارعا جىگەر سىيلايتىن «Zhas Project» جوباسى 2022 جىلى الماتى, جەتىسۋ, قاراعاندى, ماڭعىستاۋ, تۇركىستان جانە ۇلىتاۋ وبلىسىندا قاناتقاقتى رەجىمدە باستالعان ەدى. بىلتىردان باستاپ ەلىمىزدىڭ بارلىق وڭىرىندە ىسكە اسىرىلىپ كەلەدى. NEET جاستارى اراسىندا كاسىپكەرلىك دەڭگەيىن ارتتىرۋدى كوزدەيدى.
قاراعاندى وبلىسى
