سۋرەتتى تۇسىرگەن – داستان جاناسىل
سالتاناتتى شارانىڭ شىمىلدىعى ۇلى تۇلعانىڭ ءومىر جولىنان سىر شەرتەتىن «بەردىبەك الەمىنە ساياحات» اتتى دەرەكتى ءفيلمنىڭ كورسەتىلۋىمەن اشىلدى. اۋدان باسشىلىعىنىڭ شاقىرۋىمەن العاش رەت بەردىبەكتىڭ تۋعان اۋىلىندا تۇساۋى كەسىلىپ, كورەرمەنگە جول تارتقان ءفيلمدى حالىق ىستىق ىقىلاسپەن قابىلدادى.
«بەردىبەك اۋىلىنا ساياحات» دەرەكتى ءفيلمى – «قوڭىر Media Group» كومپانياسىنىڭ ءتول تۋىندىسى. يدەيا اۆتورى ءارى رەجيسسەرى – اتالعان ۇجىمنىڭ جەتەكشىسى, بەلگىلى پروديۋسەر سەرجان مولداسان ۇلى. بۇعان دەيىن اقيىق اقىن مۇقاعالي ماقاتاەۆتىڭ 90 جىلدىعىنا ارناپ «قاراساز كوشەلەرى» اتتى ادەبي دەرەكتى فيلم ءتۇسىرىپ, كورەرمەننىڭ العىسىن العان شىعارماشىلىق توپ بيىل بەردىبەكتىڭ رۋحىنا وسىلايشا ەسكەرتكىش قويدى. شىعارماشىلىق ۇجىمنىڭ دەمەۋشىسى – توقتار مۇحامەدي ەسىمدى ازامات باسقاراتىن «ىنتىماق Corporation» كومپانياسى.
«اۋدانىمىزداعى اياداي عانا قوستوبە اۋىلىندا دۇنيەگە كەلىپ, ەڭبەك جولىن تۋعان ولكەسى نارىنقولدا باستاعان جەرلەسىمىزدىڭ حالىقارالىق جۇلدە يەلەنگەن «مەنىڭ اتىم – قوجا» ءفيلمى ارقىلى تۋعان ەلىمىزدىڭ كوركەم تابيعاتىن, حالقىنىڭ بوياماسىز بولمىسىن دۇنيە جۇزىنە تانىتتى. ءفيلمنىڭ شىققانىنا جارتى عاسىردان اسسا دا, كورەرمەنىن ءالى جالىقتىرعان جوق. مۇنىڭ ءوزى بەردىبەك سوقپاقباەۆتىڭ دارا تالانت يەسى ەكەنىنىڭ انىق دالەلى», – دەدى رايىمبەك اۋدانىنىڭ اكىمى بەرىك دۇيسەنباەۆ.
ءىس-شارا بارىسىندا وبلىستىق مادەنيەت, ارحيۆتەر جانە قۇجاتتاما باسقارماسىنىڭ ءبولىم باسشىسى, اقىن تولەۋجان ءنۇسىپجان ۇلى, قوجانىڭ ءرولىن سومداعان اكتەر نۇرلان سانجار ۇلى, قازاقستان جازۋشىلار وداعىنىڭ الماتى وبلىستىق فيليالىنىڭ توراعاسى, جازۋشى قانات ابىلقايىرلار سانالى عۇمىرىن ادىلدىك پەن ادەبيەتكە ارناعان كورنەكتى قالامگەردىڭ شىعارماشىلىعىنان سىر شەرتتى. سونداي-اق مەرەيتويى يۋنەسكو كولەمىندە تويلاناتىن جازۋشىنىڭ جەرلەستەرىن عاسىر تويىمەن قۇتتىقتادى.
«ورالحان بوكەي دەسە, ەسىمىزگە بىردەن قاسيەتتى التاي تۇسەدى. ورالحاندى جانىنا جاقىن تۇتقان ءار ادام التايدىڭ توپىراعىن باسىپ, تاۋىنا شىققىسى كەلەدى. ال مۇقاعالي مەن قاراساز ەگىز. اقيىق اقىننىڭ ولەڭدەرىن جاتقا بىلەتىن اۋىلعا ولەڭسۇيەر قاۋىمنىڭ اتباسىن بۇرماعانى كەمدە-كەم شىعار. سول سياقتى قازاق ادەبيەتىنىڭ كلاسسيگى بەردىبەك سوقپاقباەۆتىڭ قوستوبەسى قانداي؟ ورنىندا تۇر ما ەكەن؟ بەردىبەكتى ءسۇيىپ وقىعان ءار ادامنىڭ كوكەيىنە وسى سۇراق كەلەرى انىق. «بەردىبەك اۋىلىنا ساياحات» – ەڭ الدىمەن, بەردىبەگىن ساعىنعان, ونىڭ اۋىلىن كورگىسى كەلىپ اڭسايتىن جىراقتاعى وقىرمانعا جاۋاپ. جارتى الەم ءسۇيىپ كورگەن «مەنىڭ اتىم – قوجانى» دۇنيەگە اكەلگەن سۇيىكتى قالامگەردىڭ رۋحىنا تاعزىم. «بەردىبەك اۋىلىنا ساياحات» الداعى ۋاقىتتا رەسپۋبليكا دەڭگەيىندە قالىڭ كورەرمەنگە جول تارتاتىن بولادى», – دەيدى فيلم اۆتورى سەرجان مولداسان ۇلى.
ايتا كەتۋ كەرەك, «قوڭىر Media Group» شىعارماشىلىق ۇجىمى رۋحانياتىمىزعا تىرەك بولعان تۇلعالارىمىز تۋرالى تىڭ دۇنيەلەر جاساۋدى داستۇرگە اينالدىرىپ كەلەدى. مەملەكەتتىك ەمەس, جەكە دەمەۋشىلەردىڭ قولداۋىمەن جۇزەگە اسىرىلاتىن مۇنداي جوبالار الدا دا جالعاسىن تابا بەرمەك.
الماتى وبلىسى
