دۇنيەجۇزىنىڭ 50 ەلىنەن 300 جوبانىڭ ىشىندە اتالعان جوبانى بىرىككەن ۇلتتار ۇيىمىنىڭ دامۋ باعدارلاماسى, Public Digital جانە AWS ينستيتۋتى ەرەكشە اتاپ ءوتىپ, ونى باسقا مەملەكەتتەرگە پايدالانۋعا ۇسىندى. بۇل ەلىمىز ءۇشىن ۇلكەن جەتىستىك قانا ەمەس, ول الەمدىك يننوۆاتسياعا قوسقان ۇلەسىمىزدى كورسەتتى. The Future of Government Awards تسيفرلىق شەشىمدەر مەن تەحنولوگيالار ارقىلى ادامداردىڭ ءومىرىن وزگەرتەتىن پراكتيكتەردى, توپتاردى جانە كوشباسشىلاردى ايرىقشا اتايدى. اتالعان جۇلدە بار يدەيانى قايتا پايدالانۋ مەن بەيىمدەۋدىڭ ماڭىزىن كورسەتىپ, باستاپقى اشىق كودتى شەشىمدى جاڭا تاسىلدەرمەن ءساتتى پايدالانعان ۇيىمعا بەرىلەدى. اسىرەسە مۇندا باسقالاردان ۇيرەنىپ, باستاپقى اشىق كودتى شەشىمدەر تاجىريبەسىنە سۇيەنەتىن ۇكىمەتتىڭ كوشباسشىلىعىنا باسا نازار اۋدارىلدى.
ايتا كەتەيىك, «Smart Data Ukimet» – 87 دەرەك بازاسى بىرىكتىرىلگەن مەملەكەتتىك دەرەكتەر قورى. وندا ۆەدومستۆوارالىق ساراپتامانى وتە جىلدام قۇرۋعا مۇمكىندىك بەرەتىن دەرەكپەن جۇمىس ىستەيتىن كوپتەگەن قۇرال بار. اتالعان قور ۇلكەن دەرەك بويىنشا شەشىم قابىلداۋدىڭ تەحنولوگيالىق نەگىزىن جاسادى.
سونداي-اق جاقىندا «وتباسىنىڭ تسيفرلىق كارتاسى» جوباسى دۋبايدا وتكەن دۇنيەجۇزىلىك ۇكىمەتتىك ءسامميتتىڭ الەمدىك ارەناسىندا 1 300 ءوتىنىمنىڭ ىشىنەن «ينكليۋزيۆتى تسيفرلىق ترانسفورماتسيا» ساناتىندا لايىقتى دەپ تانىلدى. بۇل ماراپات مەملەكەتتىك قىزمەتتەردىڭ ساپاسىن جاقسارتۋ مەن وتباسىلاردىڭ ءال-اۋقاتىن قامتاماسىز ەتۋگە ارنالعان يننوۆاتسيالىق ءتاسىلدىڭ ماڭىزىن ايشىقتادى.
وتباسىنىڭ تسيفرلىق كارتاسى – 40-تان استام مەملەكەتتىك دەرەكقوردان ازاماتتار تۋرالى اقپاراتتى ەسكەرەتىن بىرەگەي سكورينگتىك مودەل. جوبا 100-دەن استام كريتەريگە سۇيەنە وتىرىپ, وتباسىلاردىڭ ءال-اۋقاتىنىڭ ساناتىن انىقتاپ, مۇقتاج ادامدارعا كومەك كورسەتۋگە مۇمكىندىك بەرەدى. مەرەيلى ماراپات ەڭبەك جانە الەۋمەتتىك قورعاۋ مينيسترلىگىنىڭ ەلىمىزدەگى بىرىككەن ۇلتتار ۇيىمىنىڭ دامۋ باعدارلاماسىمەن بىرلەسىپ اتقارعان جۇمىسىنىڭ تابىستى ناتيجەسى دەپ ايتامىز.
ءباا قۇرعان GovTech Prize باستاماسى مەملەكەتتىك سالاداعى يننوۆاتسيالىق شەشىمدەردى تانۋ مەن ىنتالاندىرۋدا ماڭىزدى ءرول اتقارادى. بۇل تاجىريبە الماسۋعا جانە الەمدەگى مەملەكەتتىك ورگاندار اراسىندا وزىق دۇنيەنى تاراتۋعا ىقپال ەتىپ قانا قويماي, حالىقتىڭ ءومىر ءسۇرۋ ساپاسىن جاقسارتادى.
