مادەنيەت جانە اقپارات مينيسترلىگى قولجازبالار جانە سيرەك كىتاپتار ۇلتتىق ورتالىعى مەن تۇرىكمەنستاننىڭ قازاقستانداعى ەلشىلىگىنىڭ ۇيىمداستىرۋىمەن تۇرىكمەنستان ادەبيەتىنىڭ كلاسسيگى, اقىن, فيلوسوف ماقتىمق ۇلىنىڭ 300 جىلدىق مەرەيتويىنا ارنالعان سالتاناتتى كەش ءوتتى.
ءىس-شاراعا مادەنيەت جانە اقپارات مينيسترلىگى, ارحيۆ, قۇجاتتاما جانە كىتاپ ءىسى كوميتەتى توراعاسىنىڭ ورىنباسارى روللان قۇسپان, وزبەكستان, تۇرىكمەنستان, تاجىكستان, ازەربايجان, بەلارۋس, قىرعىزستان رەسپۋبليكالارىنىڭ توتەنشە جانە وكىلەتتى ەلشىلەرى, پارلامەنت ءماجىلىسىنىڭ دەپۋتاتتارى جانە زيالى قاۋىم وكىلدەرى قاتىستى. اكادەميك باۋىرجان ومار ۇلى, پروفەسسورلار ومىرزاق وزعانباي, امانتاي ءشارىپ, سەرىك نەگيموۆ بايانداما جاسادى.
ارحيۆ, قۇجاتتاما جانە كىتاپ ءىسى كوميتەتى توراعاسىنىڭ ورىنباسارى روللان قۇسپان ءوز سوزىندە ماقتىمق ۇلىنىڭ 300 جىلدىق مەرەيتويى يۋنەسكو-نىڭ 2024-2025 جىلدارعا ارنالعان مەرەيتويلىق كۇندەر تىزبەگىنە ەنگىزىلگەنىن اتاپ ءوتتى.
– ايتۋلى مەرەكە قازاق حالقى ءۇشىن دە ايتۋلى ءىس-شارا رەتىندە اتالىپ ءوتۋى ەرەكشە ماڭىزعا يە. قازاق ادەبيەتىنىڭ شوقتىعى بيىك تۇلعالارىمەن ۇندەس, پىكىرلەس سارىنى جانە تۇركى حالىقتارىنا ورتاق مۇراسىنىڭ ومىرشەڭدىگىمەن قۇندى. ماقتىمق ۇلىنىڭ مۇراسى حالقىمەن, تۇركى حالىقتارىمەن بىرگە جاساي بەرەدى, – دەدى روللان قۇسپان.
تۇرىكمەنستاننىڭ قازاقستانداعى ەلشىسى باتىر رەدجەپوۆ اقىننىڭ شىعارماشىلىعى كەيىنگى كەزەڭدەگى تۇرىكمەن پوەزياسىنىڭ دامۋىنا ەداۋىر اسەر ەتكەنىن جەتكىزدى.
– ونىڭ ولەڭدەرى مەن شاعىن پوەمالارى حالىق شىعارماشىلىعىنا ءتىلى بويىنشا جانە پوەتيكالىق تاسىلدەرىمەن جاقىن بولىپ, حالىقتىڭ جادىندا بۇگىنگى كۇنگە دەيىن ۇرپاقتار ءۇشىن دانالىق پەن پوەتيكالىق شابىت كوزى رەتىندە ساقتالعان. تۇركى حالقىنا ورتاق تۇلعانىڭ ومىرشەڭ شىعارماشىلىعىن ناسيحاتتاۋعا نازار اۋدارىپ, ايتۋلى مەرەيتويدى اتاپ وتۋگە قولداۋ بىلدىرگەن قازاقستاندىقتارعا العىس بىلدىرەمىن, – دەگەن ەلشى قولجازبالار جانە سيرەك كىتاپتار ۇلتتىق ورتالىعىنىڭ قورىنا اقىننىڭ تۇرىكمەن تىلىنەن اۋدارعان «ماقتىمق ۇلى پىراعى» تاڭدامالى ولەڭدەرىن تابىس ەتتى.
جيىن اياسىندا تۇرىكمەنستاننىڭ اكتەرى باتىر چارىەۆ «تۇرىكمەن» ولەڭىن وقىسا, «قازاقكونتسەرتتىڭ» ءارتىسى ءدىنيسلام جايلاۋباەۆ ماقتىمق ۇلىنىڭ ەل اراسىنا كەڭ جايىلعان تەرمەسىن ورىندادى.
ءىس-شارادا ماقتىمق ۇلىنىڭ شىعارماشىلىعىنا ارنالعان كورمە اشىلىپ, اقىننىڭ تۇپنۇسقاداعى قولجازبالارى مەن ولەڭ جيناقتارى تانىستىرىلدى.
