قاراپايىم وتباسىنان شىققان تالانتتى ءجاسوسپىرىم كىشكەنتايىنان تسيفرلىق تەحنولوگيالارعا قىزىعىپ وسكەن. ول قازىر Python-دا كوديت جانە ويىن سەرۆەرلەرىن جاسايدى. وسى ارقىلى ەل بويىنشا ورتاشا جالاقىدان جوعارى تابىس تاۋىپ وتىر. ۇلتتىق ستاتيستيكا بيۋروسىنىڭ دەرەگىنە سۇيەنسەك, 2023 جىلدىڭ IV توقسانىندا قازاقستانداعى نومينالدى ورتاشا جالاقى 393 605 تەڭگەنى قۇرعان. بۇل – IT سالانىڭ ۇلكەن مۇمكىندىكتەرگە جول اشاتىنىنىڭ, جاقسى تابىس كوزى ەكەنىنىڭ دالەلى.
– 10 جاسىمدا الەۋمەتتىك جەلىلەر تۋرالى ءبىر فيلم كورىپ قالدىم. سول جەردەگى مارك تسۋكەربەرگتىڭ وقيعاسى مەنى تاڭعالدىردى. ول ينتەرنەتتەگى ادامدار اراسىنداعى قارىم-قاتىناستىڭ جاڭا داۋىرىنە اينالدىرۋدى جالعىز باستاعانىن ءتۇسىندىم. بۇل الەم مەنى وزىنە لەزدە تارتىپ الدى. وسىدان كەيىن باعدارلامالاۋدى, اتاپ ايتقاندا, ۆەب-ازىرلەمەلەردى زەرتتەۋگە كوشتىم, – دەيدى ءامىر.
ونىڭ العاشقى قادامى «YouTube-تە» «HTML» جانە «CSS» ساباقتارىن كورۋدەن باستالعان. سودان كەيىن ورالداعى «IQ Hub» روبوتتەحنيكا جانە باعدارلامالاۋ مەكتەبىنە بارا باستاعان. وندا «Python» نەگىزدەرىن ۇيرەنىپ, ساندىق سالاعا اياق باسقان. سولاي بۇل باعىتتى بارىنشا زەرتتەپ, مۇمكىندىگىنشە ءبىلىمىن جەتىلدىرە تۇسكەن. ەڭ قىزىعى, مۇنىڭ ءبارى 30 مىڭ تەڭگەلىك كۋرستان باستالعان. ءامىردىڭ ايتۋىنشا, ۇلكەن اعاسى قولداماسا, مۇنىڭ ءبارى بولماس ەدى. ول اناسىن باعدارلامالاۋ كۋرستارىن ساتىپ الىپ بەرۋگە كوندىرگەن. باستاپقىدا ۇلكەندەر نە ءۇشىن قاجەت ەكەنىن تۇسىنبەي, قارسى بولعان. الايدا اعاسى ولارعا كۋرستىڭ دامۋعا ماڭىزدى ەكەنىن جانە بولاشاقتا جوعارى جالاقى الاتىن مامان بولۋعا مۇمكىندىك بەرەتىنىن ايتقان. سولاي اتا-اناسى تسيفرلىق الەمدى مەڭگەرۋى ءۇشىن ءامىردىڭ بارلىق جاعدايىن جاساي باستاعان. بۇل – باسقا دا اتا-انالارعا ۇلگى بولاتىن ءىس.
– وسىلايشا, العاشقى جوبالاردى ازىرلەۋمەن اينالىسا باستادىم. ياعني ءارتۇرلى ويىندارعا ارنالعان سەرۆەرلەر (مىسالى, CS: GO جانە Minecraft) جانە الەۋمەتتىك جەلى چات-بوتتارى. كوپ ۇزاماي «اpexnodes» حوستينگىن ىسكە قوستىق. باسىندا كاپيتال جيناقتاردان الىندى. ءۇش ادامنان تۇراتىن كوماندا جيناپ, ودان كەيىن تمد ەلدەرىندەگى ويىن سەرۆەرلەرىن ساتۋ جانە تەحنيكالىق قولداۋمەن اينالىستىم. رەسەيدەن العاشقى تاپسىرىس العان كەزدە قالاي قۋانعانىم ەسىمدە. ول بىزگە شامامەن 45 مىڭ تەڭگە اكەلدى. كەيىنىرەك «Jaiq Hub» ايماقتىق تەحنوپاركىنىڭ قولداۋىمەن جوبانى كەڭەيتتىك, – دەپ تاجىريبەسىمەن ءبولىستى ول.
ءىسى وڭعا باسسا دا, ىزدەنۋدى توقتاتپاعان. تەحنوپاركتە وقىپ, ستارتاپتاردى ىسكە قوسۋ تۋرالى ءبىلىمىن تەرەڭدەتە تۇسكەن. قاشىقتىققا بيۋدجەتتى قالاي دۇرىس ءبولۋ كەرەكتىگىن ءبىلىپ, قارىم-قاتىناس داعدىلارىن جەتىلدىرگەن.
– كوپ ۇزاماي ەڭبەگىمدى ساتىپ, اي سايىن تۇراقتى تابىس اكەلەتىن جۇمىس تابۋعا كىرىستىم. ول كەزدە جاسىم 13-تە ەدى. سودان «Millida» كومپانياسىنان ۇسىنىس كەلدى. ولار ويىن ىشىندەگى ەلەمەنتتەردىڭ تەحنيكالىق اكىمشىسى مەن جاساۋشىسى جۇمىسىن ۇسىندى. مەنى «Discord» ارقىلى وتكەن سۇحباتقا شاقىردى. سولاي ىستەگەن باسقا جوبالارىم تۋرالى ايتتىم. ولار جوبالارىمدى كورىپ, تاجىريبە الماسۋعا, ۇيرەتۋگە دايىن بولدى. اڭگىمەلەسۋدە جاس تۋرالى اڭگىمە بولعان جوق. شاماسى, جاقسى ستۋديالىق ميكروفوننىڭ ارقاسىندا مەنەدجەرلەر مەنى 16-دا دەپ ويلادى. تەك ءبىر ايدان كەيىن, جالاقى تولەۋ ءۇشىن ءوزىمنىڭ دەرەكتەرىمدى جىبەرگەن كەزدە, كومپانيا مەنىڭ ناقتى جاسىمدى ءبىلدى. بىراق ەشقانداي تەرىس رەاكتسيا بولعان جوق. كەرىسىنشە, جالاقىنى 20 پايىزعا ءوسىردى, – دەدى جاس تالاپ.
كومپانيا مەنەدجمەنتى وقۋشىنىڭ ۋنيۆەرسيتەتتى بىتىرگەن باسقا مامانداردان ەش كەم تۇسپەيتىنىنە قاتتى تاڭ قالعان. باستاپقىدا امىرگە جۇمىستى مەكتەپتەگى وقۋمەن ۇيلەستىرۋ قيىن بولدى. مۇعالىمدەر تاراپىنان كوپ ەسكەرتۋلەر جاسالىپ, ماسەلەلەر شىعا باستادى. كەيدە ءۇي تاپسىرماسىن ورىنداۋعا مۇرشاسى بولمادى. سول سەبەپتى دە قازىر شتاتتان تىس جۇمىس ىستەپ ءجۇر. كومپانيادا جاقسى تاجىريبە جيناپ, 13 مىڭ كود جولىن جازعان. الايدا ونىمەن توقتاپ قالماي, باسقا دا جوبالاردى ىسكە اسىرىپ, جاڭا تاجىريبە العىسى كەلەدى.
ءامىر IT بىلىكتىلىگىن ودان ءارى ارتتىرىپ, بولاشاقتا «DevOps» ينجەنەرى بولعىسى كەلەدى. ونىڭ ايتۋىنشا, مەكتەپ بىتىرگەننەن كەيىن مانساپتى دامىتۋدىڭ ەكى جولى بار. ءبىرىنشىسى – ەۋروپا نەمەسە اقش-قا كەتىپ, جوعارى وقۋ ورنىنا ءتۇسۋ. ەكىنشىسى – تاجىريبە جيناقتاۋ. ەلىمىزدەگى ءىرى كومپانيالاردان تاعىلىمدامادان ءوتىپ, سودان كەيىن «Google», «Microsoft» سياقتى حالىقارالىق كورپوراتسيادا جۇمىس ىستەۋدى ارماندايدى. اتا-اناسى ونىڭ جەتىستىكتەرىن ماقتان تۇتادى. ول ءوزى دە جەكە باسىن قامتاماسىز ەتە الاتىنا ريزا. ال دوستارى دانىشپان كورەدى. بىراق ءامىر ءوز ءىسىن ەشقانداي ەرەكشەلىككە بالامايدى. ءوزىنىڭ تسيفرلىق سالاداعى تاجىريبەسىمەن ءبولىسىپ بولعان سوڭ, ءسوزىن «تاباندىلىق پەن ىنتا, ەڭبەكقورلىق ارقىلى اركىم بۇعان قول جەتكىزە الادى. ەڭ باستىسى – باستاۋدان قورىقپاۋ جانە وزىڭىزگە سەنۋ», دەپ اياقتادى ءسوزىن. بۇل ءسوزىنىڭ جانى بار.
