سۋرەتتى تۇسىرگەن – ۆالەري بۋگاەۆ
پاۆلودار اۋدانىنىڭ سىچەۆكا اۋىلىندا جاڭا مەكتەپ ەسىگىن ايقارا اشتى. عيمارات 1975 جىلى سالىنعان, اپاتتىق جاعدايدا تۇرعان ەسكى ءبىلىم بەرۋ وشاعىنىڭ ورنىندا بوي كوتەردى. زاماناۋي ۇلگىدەگى مەكتەپتىڭ سالتاناتتى اشىلۋ راسىمىنە قاتىسقان پاۆلودار وبلىسىنىڭ اكىمى اسايىن بايحانوۆ وقۋشىلارعا جاقسى ءبىلىم الىپ, زور جەتىستىكتەرگە جەتۋگە تىلەكتەستىك ءبىلدىردى.
– مەملەكەت باسشىسى «ەلىمىزدىڭ دامۋى جاس ۇرپاققا بايلانىستى» دەپ اتاپ وتكەن بولاتىن. ءبىز وقۋ ورىندارىنىڭ ينفراقۇرىلىمىن جاڭارتۋعا كوپ كوڭىل بولۋدەمىز. سىچەۆكا اۋىلىنداعى مەكتەپ – ايماعىمىز بويىنشا اپاتتى جاعدايداعى ەسكى عيماراتتاردىڭ ورنىنا سالىنعان ءۇشىنشى ءبىلىم ورداسى. ءبىز وسى جىلى دا باسقا ەلدى مەكەندەردە مەكتەپتەر مەن بالاباقشالار سالۋدى جالعاستىرامىز. بۇل بالالارىمىز ءۇشىن اۋىلدا جايلى جاعداي جاساۋدىڭ تاعى ءبىر قادامى بولماق, – دەدى اكىم.
سونىمەن قاتار ول ERG توبىنىڭ اكتسيونەرلەرىنە دە العىسىن ءبىلدىردى. جاڭا مەكتەپتىڭ قۇرىلىسى ERG مەن پاۆلودار وبلىسىنىڭ اكىمدىگى اراسىنداعى مەموراندۋم اياسىندا جۇرگىزىلدى. جوباعا سالىنعان ينۆەستيتسيا 1,08 ملرد تەڭگەنى قۇرادى. اۋماعى 1 498 شارشى مەتردى الىپ جاتقان ەكى قاباتتى عيماراتتا led-ديسپلەيى بار ءماجىلىس زالى, سپورتزالى, اسحانا جانە كىتاپحانا بار. تسيفرلى ميكروسكوپتار مەن ۆيرتۋالدى-تسيفرلىق زەرتحانا ساتىپ الىندى. سونداي-اق مەكتەپتە «ەركەتاي» شاعىن ورتالىعى مەن مەكتەپكە دەيىنگى ءبىلىم بەرۋ ورتالىعى اشىلدى.
پاۆلودار وبلىسى
