الدىمەن بۇرىنعى قورعانىس ءمينيسترى, گەنەرال-پولكوۆنيك ساكەن جاسۇزاقوۆ باستاعان قارۋلى كۇشتەر ارداگەرلەرى اۋعان سوعىسىندا وپات بولعان قارۋلاس جولداستارىن ءبىر مينۋت ۇنسىزدىكپەن ەسكە الىپ, رۋحتارىنا تاعزىم ەتتى.
ينتەرناتسيوناليست-جاۋىنگەرلەردىڭ سوزىمەن ايتقاندا, «وزەننىڭ ارعى بەتىنەن» ورالماعان وتانداسىمىز از ەمەس. رەسمي مالىمەتكە سۇيەنسەك, گيندۋكۋش وڭىرىنە ەلىمىزدەن شامامەن 20 مىڭنان اسا ادام اتتانىپ, مىڭعا جۋىعى (920–950-ءدىڭ ارالىعىندا) ەلگە مىرىش تابىتپەن ورالدى. 20-عا جۋىق سولداتتىڭ تاعدىرى ءالى كۇنگە دەيىن بەيمالىم. 2 مىڭعا تارتا ادام اۋىر جاراقات الدى. كىم ءبىلسىن, ەگەر دە اسكەري مەديتسينا قىزمەتكەرلەرى تاباندىلىق تانىتىپ, ءومىر مەن ءولىمنىڭ اراسىندا جۇرگەن جاۋىنگەرلەردىڭ جانىنا اراشا تۇسپەگەندە, بۇل سان بۇدان دا كوپ بولار ما ەدى؟ سول سەبەپتى دە 35 جىلدىققا ارنالعان يگىلىكتى كەشتىڭ استانا مەديتسينا ۋنيۆەرسيتەتىندە ءوتۋى زاڭدىلىق.
اتاقتى «قارا مايور» بوريس كەرىمباەۆتىڭ سەنىمدى سەرىگى بولعان بىلىكتى قولباسشى ساكەن ءادىلحان ۇلىنىڭ ايتۋىنشا, كەز كەلگەن قارۋلى قاقتىعىستا «التىن ساعات» قاعيداسىنىڭ ماڭىزدىلىعى ارتا تۇسەدى. نەگە دەسەڭىز, جان الىسىپ, جان بەرىسكەن ايقاستا اۋىر جاراقاتتانعان ادامعا العاشقى ساعاتتاردا شۇعىل كومەك كورسەتىلمەسە, ونىڭ ءومىرىن ساقتاپ قالۋ قيىنعا سوعادى. سوندىقتان دا تار جول تايعاق كەشكەن ارداگەرلەر بەيبىت ءومىر مەن قارۋلى جانجال جاعدايىندا ءوز مىندەتتەرىن قالتقىسىز اتقاراتىن ىزگىلىكتى ماماندىقتىڭ بولاشاق وكىلدەرىنە ساتتىلىك تىلەدى.
«سوعىستىڭ قاسىرەتى قاشاندا اۋىر. كەز كەلگەن قارۋلى قاقتىعىستىڭ سالدارى ۇزاق ۋاقىتقا سوزىلاتىنىن ەستەن شىعارماعان ءجون. وعان الەمدە بولىپ جاتقان جاعدايلار دالەل. وسى ورايدا مەديتسينا قىزمەتكەرلەرىنە ايتار العىسىمىز شەكسىز. ولار قارشا بوراعان وققا دا, زەڭبىرەك سناريادتارىنا دا قاراماي, قانشاما ادامنىڭ ءومىرىن ولىمنەن قۇتقارعانىن ءوز كوزىمىزبەن كوردىك. سىزدەر كەلەشەكتە دارىگەر اتاناسىزدار. سول سەبەپتى وسى ابىرويلى ماماندىقتىڭ تۋىن بيىك ۇستاۋعا ءتيىس ەكەندەرىڭىزدى ۇمىتپاڭىزدار. بۇل كەشتى ۇيىمداستىرعان ۋنيۆەرسيتەت باسشىلىعىنا العىس ايتامىز», دەدى س.جاسۇزاقوۆ.
سونداي-اق تاعىلىمدى كەزدەسۋدە مەديتسينالىق قىزمەتتىڭ وتستاۆكاداعى پولكوۆنيگى اسىلحان وتەەۆتىڭ «نا وستريە سكالپەليا» كىتابى كوپشىلىككە تانىستىرىلدى. ول – اۋعان جەرىندە تالاي كەڭەس جاۋىنگەرى مەن جەرگىلىكتى حالىقتى ولىمنەن ساقتاپ قالعان اسكەري-حيرۋرگتىڭ ءبىرى دە بىرەگەيى. ءوز ەڭبەگىندە بىلىكتى مامان اسكەري مەديتسينانىڭ قىر-سىرىنا جان-جاقتى توقتالعان. اسىرەسە ب.كەرىمباەۆ باسقارعان 177-ارنايى جاساقتىڭ اسكەري حيرۋرگى رەتىندە نەبىر جارالىنى كورىپ, ولاردى قالاي ەمدەگەنىن بايانداعان. ونىڭ ىشىندە جارىلىس كەزىندە اياق-قولىنان ايىرىلعان جاۋىنگەرلەرگە قاتىستى جانتۇرشىگەرلىك وقيعالاردى كەلتىرگەن.
«بىردە اۋعانستاندىق ازاماتتىڭ قولىندا گراناتا جارىلىپ, ساۋساقتارى ج ۇلىنىپ تۇسەدى. ونى بىزگە دەرەۋ جەتكىزىپ, شۇعىل وپەراتسيا جاسادىق. وپەراتسيا ويداعىداي ءوتتى. اۋعاندىقتاردىڭ اعزالارى مىقتى بولادى. جاراقاتتارى تەز جازىلىپ كەتەدى. ءبىر اپتادان كەيىن الگى ازامات نەمەرەسىن ەرتىپ, بىزگە راحمەتىن ايتىپ, قولىنداعى قاپشىقتى ۇستاتتى. قيىن ساتتە قولۇشىن سوزعانىمىز ءۇشىن ريزاشىلىعىن وسىلايشا بىلدىرمەك ەكەن. قاپشىقتى اشساق, ءىشى تولعان اناشا ءشوبى. سول ارادا سانيتارلىق ءبولىم بۇل «سىيلىقتى» وتقا جاعىپ جىبەردى», دەگەن ا.وتەەۆ بەينەبايلانىس ارقىلى قىزىقتى ەستەلىكتەرىمەن ءبولىستى.
بۇل كەشكە وتستاۆكاداعى گەنەرال-مايور مۋسليم دايىروۆ, مايدانگەر جازۋشى, وتستاۆكاداعى پولكوۆنيك امانگەلدى جانتاسوۆ سىندى اۋعان جەرىندە وت كەشكەن ارداگەرلەر مەن ولاردىڭ جانىنا اراشا تۇسكەن اسكەري مەديتسينانىڭ مايتالماندارى قاتىسقانىن ايتا كەتكەن ورىندى. قادىرلى قوناقتارعا ۋنيۆەرسيتەت پرورەكتورى ۆيتالي كويكوۆ وقۋ ورنىنىڭ باسشىلىعى اتىنان العىسحات تابىستادى. كەش سوڭى پاتريوتتىق اندەرگە ۇلاسىپ, ەلوردانىڭ دارىندى وقۋشىلارى شىعارماشىلىق قويىلىممەن جينالعانداردى ءتانتى ەتتى.
