سۋرەتتە: تراكتورشى مەدەت نۇربولات
ال الماتى مەگاپوليسىنە تاياق تاستام جەردە جاتقان تالعار اۋدانى قاينار اۋىلدىق وكرۋگىنە قاراستى شاعىن عانا كوكتال اۋىلىنىڭ كوشەلەرى تىزەگە جۋىق جاۋعان قاردان لەزدە تازارتىلدى. وعان تراكتور تىزگىندەگەن مەدەت نۇربولاتتىڭ قايىرىمدىلىعى مەن ەرىنبەيتىن ەڭبەكقورلىعى سەپ بولعان.
«جاقسىنىڭ جاقسىلىعىن ايت, نۇرى تاسىسىن» دەگەن. اۋىلىمىزدىڭ تۇرعىنى مەدەت ءارى-بەرى جۇرگەندە تراكتورىنا تىركەلگەن كۇرەگىشىن ءتۇسىرىپ, جولدى كۇرەپ كەتۋدى ادەتكە اينالدىرعان. تەحنيكاسىنا جۇمسالاتىن جانار-جاعارمايدىڭ قىمباتشىلىعىنا قاراماستان بۇل ءىسىن ول ەشۋاقىتتا پۇلداعان ەمەس, «وسىنى مەن ىستەپ ءجۇرمىن» دەگەنىن ەستىپ تە كورمەپتىك. جاڭاقۇرىلىستا 50 شاقتى ءۇي ءتۇتىن تۇتەتەدى. كەيدە ءوزىمىزدى «ارالدا» قالعانداي سەزىنەمىز. سەبەبى شاعىن اۋدانعا كوممۋنالدىق قىزمەت كورسەتىلمەيدى. قوعامدىق كولىك تە كىرمەي, قانشا جىلدان بەرى جاياۋلاپ 2-3 شاقىرىم جول ءجۇرىپ, ورتالىققا شىعامىز. اۋا رايى جاۋىن-شاشىندى بولعاندا كورەر قيىندىعىمىزدى ايتۋدان جالىقتىق. قار جاۋعان سايىن تاڭبوزىنان جولىمىزدى اشىپ كەتەتىن كورشىمىز مەدەت نۇربولاتقا تۇرعىندار ءدان ريزا, ۇنەمى العىسىن جاۋدىرىپ جاتادى. كەشەگى قالىڭ قاردان ەسىك الدىن تازارتۋدىڭ وڭايعا سوقپاعانىن جاسىرماعان جۇرت كوشەمىزدىڭ كۇرەلگەنىنە بالاشا قۋاندىق. اۋىلدىڭ چاتىندا مەدەتتىڭ اتىنا ايتىلعان العىس تا قارشا بورادى», دەيدى كوكتالدىق ءاليا ابىلسەيىتقىزى.
تۇراقتى جۇمىسى جوق اۋىل ازاماتى مەنشىگىندەگى كوك تراكتورىمەن ناپاقاسىن تاۋىپ, اناسىنا قولعابىس كورسەتىپ ءجۇر. سويتە ءجۇرىپ, ءوزى تۇراتىن ەلدى مەكەننىڭ جولىن تازارتىپ كەتۋدى ارتىق جۇمىس سانامايدى. جاقسىلىق جاساۋعا جانى قۇمار مەدەت مۇنىمەن عانا شەكتەلمەيدى. تابيعات توسىنە شىقسا دا شاشىلعان قوقىس, سىنعان شىنىلاردى جيناپ الىپ, كولىگىنىڭ جۇكسالعىشىنا تيەپ, ءتيىستى ورىنعا تاستاۋدى داعدىعا اينالدىرعان ەكەن. قاراپايىم ازاماتتىڭ قورشاعان ورتاعا دەگەن قايىرىمدىلىعى مەن مەيىرىمدىلىگىنە دوس-جاران, تۋىستارى قانىق.
الماتى وبلىسى
