فوتو: primeminister.kz
ولجاس بەكتەنوۆ جەڭىمپازداردى ارنايى قابىلداپ, پرەزيدەنتتىڭ العىسىن جەتكىزدى. پرەمەر-مينيستر جاسوسپىرىمدەر اراسىنداعى وليمپيادادا ەل تاريحىندا تۇڭعىش التىن مەدال يەلەنگەن يليا ميزەرنىحتىڭ جەڭىسىن ەرەكشە اتاپ ءوتتى.
«سپورت – ەلدىڭ مارتەبەسىن بيىكتەتىپ, مەملەكەتتىڭ قۋاتى مەن ءوسىپ كەلە جاتقان الەۋەتىنە دەگەن ادامداردىڭ سەنىمىن نىعايتا تۇسەتىن ماڭىزدى فاكتور. ەل سىزدەردىڭ جەڭىستەرىڭىزدى ماقتان تۇتادى. وزدەرىڭىز سياقتى ەرىك-جىگەرى مىقتى جاس سپورتشىلاردىڭ ەلىمىزدىڭ بولاشاعى ەكەنىنە كامىل سەنەمىن. جەڭىس جولىندا قولداۋ كورسەتكەن تالىمگەرلەر مەن جاتتىقتىرۋشىلار ەرەكشە العىسقا لايىق. بۇگىنگى باعىندىرعان بيىك بەلەستەر الداعى وليمپيادالارداعى جەتىستىكتەردىڭ باستاۋى دەۋگە بولادى», دەدى ولجاس بەكتەنوۆ.
يليا ميزەرنىحتىڭ جاتتىقتىرۋشىسى قايرات بيەكەنوۆكە دە العىس حات تابىستالدى. ءوز كەزەگىندە سپورتشى قولداۋ بىلدىرگەن بارشا قازاق جۇرتىنا العىس ءبىلدىردى.
«التىن مەدال – مەنىڭ عانا جەڭىسىم ەمەس, بۇل بۇكىل كوماندا مەن جاتتىقتىرۋشىلار قۇرامىنىڭ جۇمىسىنىڭ ناتيجەسى. ەلىمىزدىڭ پرەزيدەنتى قاسىم-جومارت كەمەل ۇلى توقاەۆتىڭ قۇتتىقتاۋىن ەستىپ, توبەم كوككە جەتكەندەي بولدى. ول ماعان جانە باسقا قازاقستان سپورتشىلارىنا دا جاڭا جەڭىستەر تىلەدى. بۇل ءبىزدى ودان ءارى شابىتتاندىرا تۇسەدى. شالعايدا جۇرسەك تە, ءبىز ۇلكەن قولداۋدى سەزىندىك, بۇل – ءبىزدىڭ ورتاق جەڭىسىمىز! العا, قازاقستان!», دەدى ول.
سونىمەن قاتار شايبالى حوككەي بويىنشا قولا جۇلدە ولجالاعان ارسەني كۋچكوۆسكي, نيكيتا كۋلاكوۆ, تەمىرلان ايبول ۇلى, ماتۆەي رەشەتكو, راسۋل تۇرسىنوۆ, جاھانگەر تىلەۋحان, تاير بيگارينوۆ, ەگور كراۆچەنكو, رومان ميچۋروۆ, ءادىلحان ساتتار, ءانۋار احمەتجانوۆ جانە كوماندانى جاتتىقتىرۋشى رامازان قايداروۆتىڭ دا ەڭبەكتەرى باعالاندى.
ايتا كەتەيىك, قازاقستان قۇراماسى كانۆون وليمپياداسىندا الەمنىڭ 78 ەلى اراسىندا 20-شى ورىندى يەلەندى.
