قاڭتار تۋا كوكشە دالاسىنا ەلىك قاپتاعان. اڭ جايىن بىلەتىندەر الۋان ءتۇرلى جورامال ايتىپ جاتىر. ىرگەدەگى ءسىبىردىڭ يت تۇمسىعى وتپەيتىن قالىڭ ورمانىنىڭ باۋىرىندا ءوسىپ-ونگەن, بيىل ءبىزدىڭ جاققا اۋا كوشكەن اڭ دەسكەن. بالكىم ول جاقتا دا ءبىر زوبالاڭ تۋدى ما ەكەن, كىم ءبىلسىن؟ بۇرىنعى قازاق «ارقادا قىس جايلى بولسا, ارقار اۋىپ نەسى بار؟» دەمەۋشى مە ەدى. بۇعان دەيىن ەلىك ىلۋدە بىرەۋ عانا كەزدەسەتىن. ونىڭ وزىندە دە ەكەۋ-ۇشەۋ. ال قازىر قوي ءتارىزدى تابىن-تابىنىمەن بوسىپ ءجۇر.
ورمان ءىشى جەلسىز, تىمىق ەكەن. ماڭگى جاسىل قاراعايلار اق تىماعىن باسا كيىپ, اپپاق شاپانىن جامىلىپ مۇلگىپ تۇر. قىراتتا قار از بولعانىمەن, ۇيىتقي سوققان جەل قار اتاۋلىنى ورمان ىشىنە قۋىپ تىعىپ, نىعىزداي كەپتەپ, مەلدەكتەتە تولتىرىپ تاستاپتى. كۇنگە بوي ساپ بيىك وسكەن قاراعايدىڭ ۇيىسا بىتكەن قالىڭ بۇتاعىنىڭ اراسىنان الدەبىر قوڭىر اڭ جاي وعىنداي جىلت ەتتى دە, جوق بولدى. توسىن جايدى قالتا تەلەفونىمىزعا ءتۇسىرىپ الماق بولىپ جانۇشىرا جان قالتامىزعا قول سالىپ ەدىك, ۇلگەرمەدىك.
– سىزدەن اڭشى شىقپايدى ەكەن, – دەپ كۇلدى «كوكشەتاۋ» مەملەكەتتىك ۇلتتىق تابيعي پاركىنىڭ باس ديرەكتورى ەربول ساعديەۆ. – ورمان سۋسارى عوي. ادامدى جاقىنداتپايدى, وتە ساق اڭ. ءوز باعاسىن بىلەتىن بولۋى كەرەك, وقشاۋ جۇرەدى.
– قىزىل كىتاپقا ەنگەن اڭ ەمەس پە؟ – دەپ سۇرادىق ءبىز.
– ءيا, بىزدە وننان اسا وسىنداي اڭ ءتۇرى بار. بارلىعى قاتاڭ قاداعالانادى. جىل سايىن كوبەيىپ, ءوسىپ كەلەدى, – دەدى پاركتىڭ باس ديرەكتورى.
ءتۇسىرىپ ۇلگەرمەگەنمەن, كەسكىنى كوز الدىمىزدا. دەنەسىنىڭ ۇزىندىعى – 50-60 سانتيمەتر شاماسىندا. كەۋدەسىندە بۇرشاق تاڭباسىنداي اعى بار ەكەن.
– بيىلعى قىس قاۋىپ ءتوندىرىپ تۇرعان جوق پا؟ – دەپ سۇرادىق ءبىز پارك باسشىسىنان.
– ءار جىل سايىن قىسقا قاپىسىز قامدانامىز. بيىل 277 توننا ءشوپ, 109 توننا جەم, 31 مىڭنان اسا جاپىراق بۋمالارى دايىندالدى. ودان وزگە دە بىرنەشە ءتۇرلى اڭ ازىقتارى قامدالعان. قىس بويى اڭداردى ازىقتاندىراتىن القاپتار قاردان ارشىلىپ, تازالانىپ وتىرىلادى. پارك اۋماعىندا 500-گە تارتا الاڭ بار. سول جەرلەرگە جەمشوپتىڭ وتتىقتارى ورناتىلىپ, تۇز قويىلعان, – دەيدى ەربول بولات ۇلى.
الاڭقايدا ماڭ-ماڭ باسقان بۇعى كەتىپ بارادى. ادام قاراسىن كورسە دە جاتىرقايتىن ەمەس. بالكىم, ءتۇز تاعىسى ازىعىن ۇسىنعان ادامدى قامقورشىم دەپ تانيتىن شىعار. كورىكتى كوكشەنىڭ لايىقتى ماقتانىشىنا اينالعان ۇلتتىق پاركتىڭ اڭ-قۇسى عانا ەمەس, ەن دالادا ەركىن جايىلعان, وسى توپىراقتا ءوسىپ-ونگەن بارشاسى ارقانىڭ ايازىنان امان بولسا ەكەن.
اقمولا وبلىسى
