قازاق كينوسى دەگەندە, دارا ساڭلاق, ءبىرتۋار تالانت شاكەن ايمانوۆ ويعا ورالادى. قۇداي تاعالا ەرەك تۋدىرعان شالقار شابىت يەسىنىڭ ءار قيمىلى, دەگدار بولمىسى ساحنا ءۇشىن جارالعانداي. ايمانوۆ تۇرپاتىنا قاراي وتىرىپ ايىزىڭ قانادى, تىنىسىڭ اشىلادى. مايتالمان ادىمىنىڭ ەڭ كەڭ كورىنەر تۇسى, دارىنىنىڭ سانسىز قىرى اشىلار شاعى – «الدار كوسە» ءفيلمى.
قايبىر تالانت بولسا دا ءوز ءداۋىرىنىڭ جەمىسى. «الدار كوسە» ءفيلمى ارقىلى جەكە باسىنىڭ قامىن كۇيتتەپ, تاپتىق بولىنۋشىلىك پەن داستۇردەن جەرۋگە ۇرىنا باستاعان قازاق حالقىنىڭ كەمشىن تۇستارى اشىلادى. باۋىرمالدىق پەن مەيىرىمنەن اتتاعان جۋان بايلاردىڭ مايلى جەلكەسى كۇلكىگە ۇشىراپ, ادام جۇرەگىندەگى ىزگىلىك, مەيىرىم, جاناشىرلىق سەكىلدى قاسيەتتەر دارىپتەلەدى. فيلمدە شاكەن ايمانوۆ الداردىڭ ءرولىن سومداپ, قيىننان قيىسقان وبرازدى شەبەر سومدايدى. حالىقتىڭ سۇيىكتى پەرزەنتى ءازىل-قالجىڭمەن جاپسارلاسقان اقىلدى شەشىمىمەن, تاپقىرلىعىمەن, كەڭ پەيىلدىلىگىمەن, ۇشقىر ويىمەن, دانالىعىمەن كورەرمەندى ءتانتى ەتەدى. حالىق ەرتەگىلەرىن جاڭا كەزەڭمەن بايلانىستىرىپ, الداردىڭ كوزقاراسىن, ءتالىم-تاربيەسىن دارا بۋىننىڭ تۇسىنىگىنە شاقتاپ بەرۋى – جەكە اڭگىمەگە جۇك. ايمانوۆتىڭ شىنايىلىعى سونشا, ەكراننان مەيىرىمدى, اقجۇرەك الداردىڭ ءوزىن كورگەندەي باۋىر باسىپ, سوڭىرا قيماي قوشتاساسىز. جۇرەگىڭىزدە ميفتىك قاھارمانعا ماحاببات ويانىپ, ەلدىك رۋحىڭىز اسپانداي تۇسەدى.
فيلمدەگى ەڭ شەبەر رولدەردىڭ ءبىرى – باقسى. شاعىن عانا ەپيزودتىق باقسى ءرولىن ويناعان ۇلى اكتەر ەلۋباي ومىرزاقوۆ قارا كوڭىلدى اعارتىپ, كىسىنى قايران قالدىرادى. شاكەن ايمانوۆ باقسى ەپيزودىن ارنايى ەلۋباي ومىرزاقوۆ ءۇشىن ەنگىزگەن دەسەدى. كەدەيدى قاناپ, مالىن قالتالاعان ساراڭ بايدىڭ اۋىلىنا تاپ بولعان الدار, ونى ءاجۋانىڭ استىنا الادى. جۋان باي ءان باستار تۇستا, الدار حالىقتى ازىلىمەن كۇلدىرىپ, قايتا-قايتا ءانىن ۇزەدى. مۇنى قورلىق كورگەن باي كوسەنىڭ سوڭىنا ادام سالادى. سولايشا قاپىدا ىزگىلىك جاقتاۋشىسىن قاراقشى سويىلعا جىعىپ, ايدالادا قالدىرادى. مىنە, وسى شاقتا جاپان كەزگەن جالعىز باقسى تاپ بولىپ, الداردى ەمدەپ جازادى. ەلسىزدە جالاڭ اياق جار كەزگەن, تازا جۇرەگىنەن, اق تىلەگىنەن وزگە ەشنارسەسى جوق باقسى كەيپى كوشپەندىلەردىڭ اڭسار-ارمانىن ەسكە سالادى. «ەشكىمگە سوقتىقپاي جاي جاتقان» قازاق حالقىنىڭ رۋحاني الەۋەتى, ادامشىلىق كۇيى الدار مەن باقسىنىڭ ديالوگىندە كەڭىنەن كورىنىس تابادى.
كوركەم ءفيلمنىڭ كىسىگە اقىل قوسىپ, جان ءيىرىمىن قوزعار ءساتى مول. ءفيلمنىڭ ستسەناريىن شاكەن ايمانوۆ لەۆ ۆارشاۆسكيمەن بىرىگىپ جازعان ەكەن. سۇبەلى تۋىندىعا سونداي-اق قالىبەك قۋانىشباەۆ, قۇرمانبەك جانداربەكوۆ, اتايبەك جولىمبەتوۆ, سەركە قوجامقۇلوۆ, بايان ءادىلوۆا سەكىلدى قاداۋ-قاداۋ ونەرپازدار تۇسكەن. ءبىر قىزىعى, فيلمدەگى الدار كوسەنىڭ بوركى بۇگىنگە دەيىن ساقتالعان. مايتالمان تۇلعانىڭ تەرى سىڭگەن قۇندى جادىگەردىڭ تاريحى قىزىق. 1969 جىلى «نايزاتاس باۋرايىندا» ءفيلمىنىڭ نەگىزگى سيۋجەتتەرىن ءتۇسىرىپ, رەجيسسەر ونەر ورداسىنا قايتادى. كەيىن الماتىدا ءفيلمنىڭ ءتۇسىرىلىمى ءبىتىپ, قوسىمشا كورىنىس قاجەتتىلىگىنەن باياناۋىلعا قايتا جولعا شىعادى. جولاي پاۆلودار قالاسىنا ايالداپ, نەمەرە اعاسى ورال مۇزاپاروۆتىڭ ۇيىنە تۇسەدى. رەجيسسەر ۇيدەن شىعاردا «بىرنەشە فيلمگە تۇسكەن ايگىلى بورىگىمدى تاستاپ كەتەيىن, مەنەن كادە بولسىن» دەپ بوركىن ءۇي يەسىنە تابىستاعان ەكەن. تۋىستارى قۇندى جادىگەردى كوزىنىڭ قاراشىعىنداي ساقتايدى. كورگەن جاننىڭ كوزى تويار قازاقى قالپاق ەرتە كۇندەردىڭ ەلەسىندەي, الپامسا ۋاقىت ادىمىنداي.
اۋمالى-توكپەلى كەزەڭدە ۇلت جانى ءۇشىن كۇرەسكەن شاكەن ايمانوۆ بولمىسى جىل سايىن بيىكتەي بەرمەك, ۇلعايا تۇسپەك. جۇرەگىنە بايتاق دالانى قوندىرعان الىپ ەردىڭ قاي ەڭبەگى دە كوپ جۇلدىز ىشىندەگى شوق جۇلدىزداي. ولار ءزاۋلىم كوكتەن بىزگە, تۋعان حالقىنا جارىق توگە بەرەرى اقيقات.
