فوتو: abdenkarakat
«بۇگىنگى قولدانىستاعى زاڭناماعا سايكەس اۋىل مۇعالىمدەرىنىڭ جالاقىسى مەن تاريفتىك ستاۆكالارى قالالالىق مۇعالىمدەردىڭ ستاۆكالارىمەن سالىستىرعاندا 25 پايىزعا كوتەرىلدى. اتالعان زاڭنىڭ ناتيجەسىندە اۋىل مۇعالىمىنىڭ جاعدايى تۇزەلدى. بۇل اۋىلداعى وقۋشىلارعا قالا مەكتەپتەرىمەن تەڭ دارەجەدە ءبىلىم بەرۋ ءۇشىن قابىلدانعان دۇرىس شەشىم ەدى. وكىنىشكە قاراي مۇندا ءبىر ماسەلە بار. تۇرعىلىقتى حالىق سانى ورتاشا اۋىلدان از بولسا دا مارتەبەسى قالا نەمەسە كەنت ستاتۋسىنا يە بولعان ەلدىمەكەن مۇعالىمدەرىنىڭ جاعدايى وسىنداي. بارلىق تالاپ بويىنشا اۋىلدىق ەلدىمەكەندەرگە جاتاتاتىن كەنتتەر مەن شاعىن قالاداعى مۇعالىمدەر زاڭدا بەكىتىلگەن 25 پايىزدىق قوسىمشا تولەم الاتىن اۋىلدىق كوەففيتسيەنتكە قول جەتكىزە الماي وتىر. ياعني ولار تۇراتىن ەلدىمەكەننىڭ قالا, كەنت دەگەن اكىمشىلىك مارتەبەسى تەك قاعاز جۇزىندە عانا. قالا نەمەسە كەنت بولعانىمەن شىنتۋايتىندا كادىمگى اۋىل. مىسالى ۇلىتاۋ وبلىسى قاراجال قالاسى مەن جايرەم كەنتى. قاراجالدا 8 مىڭ ادام, جايرەمدە 9 مىڭ تۇرعىن بار. وسى جەردەن 20 شاقىرىم جەردەگى جەڭىس اۋىلىنىڭ مۇعالىمدەرى اۋىلدىق كوەففيتسيەنتتى الادى. ال وبلىس ورتالىعى جەزقازعاننان 220 شاقىرىم, قاراعاندىدان 500 شاقىرىم قاشىقتىقتا ورنالاسقان قاراجال مەن جايرەمنىڭ مۇعالىمدەرى اتالعان ۇستەماقىلاردان, ءتيىستى الەۋمەتتىك كومەكتەن, قالالىق ەمحانالارعا قارالۋ سەكىلدى مۇمكىندىكتەردى الا المايدى. سول سەبەپتى دە جايرەم كەنتىنىڭ مۇعالىمدەرى كورشى اۋىلدارعا بارىپ جۇمىس ىستەۋگە ءماجبۇر.
«اۋىل» پارتياسى حالىق سانى 10 مىڭ ادامعا جەتپەيتىن كەنتتەر مەن اۋىلدىق ماڭىزى بار شاعىن قالالار بويىنشا ماسەلەنى مۇقيات زەرتتەدى. ۇلتتىق ستاتيستيكا بيۋروسىنىڭ مالىمەتتەرى بويىنشا حالىق سانى 10 مىڭعا جەتپەيتىن قالا, كەنت ستاتۋسىنا يە 36 ەلدىمەكەن بار. مۇندا 70-تەن استام جالپى ءبىلىم بەرەتىن مەملەكەتتىك مەكتەپ بار. وڭىرلەردەگى وسىنداي كەنتتەر مەن قالالالاردىڭ مۇعالىمدەرىن قولداۋ قاجەت. شالعايداعى مەكتەپتەردىڭ بارلىق اۋىلدىق بەلگىلەرى بار كونتسەپتسياعا تولىقتاي سايكەس كەلەتىن ەلدىمەكەن مۇعالىمدەرىنە اۋىلدىق كوەففيتسيەنت قولجەتىمدى بولۋى ءتيىس», دەدى ق.ابدەن.
دەپۋتات ۇكىمەت باسشىسىنان اكىمشىلىك مارتەبەسى قالا نە كەنت بولعانىنا قاراماستان كادىمگى اۋىل تىرلىگىن كەشىپ وتىرعان شالعايداعى ەلدىمەكەن مۇعالىمدەرى ءۇشىن اۋىلدىق كوەففيتسيەنتتى ەنگىزۋدى سۇرادى.
