ونەر يەسىنىڭ ايتۋىنشا, ونىڭ قالتاسىندا سوڭعى 30 تەڭگەسى عانا قالىپ, نە ىستەرىن بىلمەي جۇرگەن كەزدەرى دە بولعان.
- الماتى قالاسىندا اباي كوشەسىنىڭ بويىمەن كەلە جاتقان ەدىم. قالتامدا 30 تەڭگەم بولدى, سول 30 تەڭگەم ءتۇسىپ قالماسىن دەپ سىرتىنان ۇستاپ قويامىن. قارىن دەگەن اشىپ كەتكەن. ەكى باتەڭكەمنىڭ تابانى جىرتىق, ال ىشىندەگى ش ۇلىق اياق كيىم جىرتىق بولعان سوڭ, مىندەتتى تۇردە جىرتىق بولادى عوي. ءسويتىپ جەردى تابيعي تەرىممەن باسىپ كەلە جاتىرمىن, - دەدى ءانشى.
الماتىعا كەلمەس بۇرىن وعان شاتتىق دەگەن قۇرداسى قالادا تۇراتىن قۇدا بالاسىنىڭ ءنومىرىن بەرگەن.
- حابارلاسساڭ بولدى, ساعان كومەكتەسەدى دەگەن ەدى. مەن ول جىگىتتى اقتاۋعا ءبىر-ەكى رەت كەلگەن كەزىندە كورگەن ەدىم, ازداپ تانيمىن. كۇن باتىپ, كەش بولىپ قالعان, سارىارقا بازارىنان سامسا الىپ, ەندى نە ىستەيمىن دەپ جەپ كەلە جاتىرمىن. ءبىر كەزدە الدىمنان جاڭاعى جىگىتكە ۇقسايتىن ءبىر بالا ۇشىراسا كەتتى. قاراپ تۇرسام, سول جىگىت. ول ورىسشا سويلەيتىن, ول گاديلبەك دەپ, مەن المات دەپ, ەكەۋمىز مارە-سارە بولدىق. كورەي سەريالدارىنداعىداي دەسە دە بولادى. سودان مەنى ۇيىنە اپارىپ, ورنالاستىرىپ, كوپ كومەگى ءتيدى, - دەدى عادىلبەك جاناي.
ول وسىنداي ساتتەر باسىنان كوپ وتكەنىن جەتكىزدى. باراتىن جەر تاپپاي, ساياباقتارعا دا قونعان.
- كافەلەردەن ءبىر كەسە شاي الىپ, سول جەردە تاڭدى اتىراتىن ەدىك. مەن مۇنى جاستارعا كەڭەس رەتىندە ايتىپ وتىرمىن, جاستاردىڭ ەسىندە بولسىن, بۇل ءبىر قۇدايدىڭ وسىرەم دەپ بەرەتىن سىناعى-ساباعى. قازىر وسىنداي ءساتتى باستان كەشىپ جۇرسەڭىزدەر, بولاشاقتا, جاقىندا بيىكتى باعىندىرامىن دەپ ويلاڭىزدار, كۇتىڭىزدەر, - دەدى ول.
