اسكەري قىزمەت – بورىشىن وتەۋ ءۇشىن عانا ەمەس, سونىمەن بىرگە ەلىمىز بەن ونىڭ ازاماتتارى الدىنداعى جاۋاپكەرشىلىك ەكەنىن ايقىن كورسەتەدى. مۇنداي كەزدەسۋلەر ارقاسىندا ناعىز ەرلىك پەن قاھارماندىقتىڭ ءتىرى ۇلگىلەرىن كورگەن ساربازداردىڭ قىزمەتىنە جاعىمدى اسەر ەتەدى.
ساربازدارمەن كەزدەسىپ, ولاردىڭ قىزمەت ەتۋ جاعدايىمەن تانىسۋعا ينتەرناتسيونالدىق بورىشىن وتەپ, ءتۇرلى اسكەري قۇرامالاردا قىزمەتىن جالعاستىرعان اۋعان ارداگەرلەرى زاپاستاعى پولكوۆنيك ەربول مالىكوۆ پەن زاپاستاعى پودپولكوۆنيك نۇربەك جۇنىسبەكوۆ كەلدى. ولاردى قارۋلاس باۋىرلارى قارۋلى كۇشتەردىڭ ارداگەرلەرى, وتستاۆكاداعى پولكوۆنيك سەرىكباي وڭباەۆ, زاپاستاعى پولكوۆنيك تالعات كەنجەباەۆ جانە رەيىمباي حالمۇراتوۆ قولداپ, بىرگە ءجۇردى. ءار قوناقتىڭ تاجىريبەسى مول جانە قازاقستاننىڭ قورعانىس قابىلەتى مەن اسكەري قاۋىپسىزدىگىن نىعايتۋعا قوسقان ۇلەسى زور.
بريگادا كومانديرىنىڭ تاربيە جونىندەگى ورىنباسارى, پودپولكوۆنيك رينات قاليدولدين اتاپ وتكەندەي, اۋعان ارداگەرلەرىمەن كەزدەسۋ ءاربىر سارباز ءۇشىن ەرەكشە بولدى. ولار اعا بۋىننان اسكەردە ءجۇرىپ باسىنان وتكەن سىناقتار مەن قىزىقتى وقيعالارى تۋرالى اڭگىمەلەرىن تىڭدادى.
«ارداگەرلەر قىزمەتى, اتا-انالارعا جازعان حاتتارى, ەلگە ورالۋلارى, اسكەردە ءجۇرىپ العان ومىرلىك ساباق تۋرالى ەستەلىكتەرىمەن ءبولىستى. تاريحي وقيعالاردى ەستە ساقتاۋ ءۇشىن مۇنداي كەزدەسۋلەردىڭ ماڭىزى زور. ينتەرناتسيوناليست-جاۋىنگەرلەر تاريحتىڭ ءتىرى كۋاگەرلەرى جانە ولاردىڭ اڭگىمەلەرى جاستارعا بەيبىتشىلىكتىڭ قۇندىلىعىن شىنايى باعالاۋعا كومەكتەسەدى. سوعىس ارداگەرلەرىمەن كەزدەسۋ ولاردىڭ اڭگىمەلەرىن تىڭداۋ عانا ەمەس, سونىمەن بىرگە ەلىمىزدىڭ كەمەل, مىقتى, سانالى ازاماتى بولىپ قالىپتاسۋىمىزعا مۇمكىندىك بەرەدى», دەپ قوستى رينات قايساعالي ۇلى.
سوڭىندا اسكەري ءبولىم باسشىلىعى كەزدەسۋگە قاتىسقان ارداگەرلەرگە ريزاشىلىعىن ءبىلدىرىپ, ەستەلىك سىيلىقتار تابىس ەتتى.
