گۇلنارا – بالا شاعىنان ءى توپتاعى مۇگەدەك جان. بيىل جاسى 38-گە كەلەدى. قوزعالىس جۇيەسى, سويلەۋ مۇمكىندىگى دامىماعان. قىزى ۇنەمى كۇتىمدى قاجەت ەتەتىندىكتەن, اناسى قارلىعاش جاناقوۆا جانىنان شىققان ەمەس. ۇدايى باعىپ-قاعىپ, كىشكەنتايىنان قىزىنىڭ ءومىرى ءۇشىن كۇرەسىپ كەلەدى.
اناسىنىڭ ايتۋىنشا, قىزىن جەرگىلىكتى مەملەكەتتىك ورگاندار وسىدان 25 جىل بۇرىن مۇگەدەكتىگى بويىنشا تۇرعىن ءۇي كەزەگىنە قويعان ەكەن. الايدا شيرەك عاسىر ۋاقىتتان بەرى جارىمجان جاندى قالا بيلىگى تيەسىلى پاتەرمەن قامتاماسىز ەتە الماي وتىر. ال تۇرىپ جاتقان ەكى بولمەلى پاتەر – اكەسى ءجۇسىپتىڭ اتىندا.
– كورولەۆ كوشەسى, 100 مەكەنجايىنداعى كوپقاباتتى ۇيدە التى جان ءبىر پاتەردى پانالاپ وتىرمىز. گۇلنارام – كىشكەنتايىنان وسىنداي مۇگەدەك بالا. ءاردايىم جانىندامىن, كۇتىم كەرەك. بۇعان قوسا بىزبەن بىرگە ۇلىم بەكتاس, كەلىنىم جانە نەمەرەمىز تۇرىپ جاتىر. ولاردىڭ باسقا بارار جەرى جوق. وتاعاسى ءجۇسىپ زەينەت جاسىندا, ءوزىم بۇل جاعدايدا جۇمىس ىستەي المايتىنىم انىق. سايىپ كەلگەندە, تەك مەملەكەتتىڭ جاردەماقىسىنا كۇنەلتىپ وتىرمىز. پاتەردى دە ءوز بەتىمىزبەن كەڭەيتۋگە مۇمكىندىگىمىز جوق. پاتەر كەزەگى جىلجيتىن ەمەس, – دەپ مۇڭىن شاقتى قارلىعاش اپاي.
اتالعان ماسەلە بويىنشا ەكىباستۇز قالاسىنىڭ اكىمدىگىنە حابارلاسىپ كوردىك. قالا باسشىسىنىڭ ورىنباسارى بيبىگۇل يمانعاليەۆا اتالعان ازاماتشانىڭ 2013 جىلعى 9 شىلدەدەن باستاپ ء«ى توپتاعى مۇگەدەك» ساناتىمەن مەملەكەتتىك تۇرعىن ءۇي قورىنان باسپانا الۋعا كەزەكتە تۇرعانىن راستادى.
– 2013 جىلى گۇلنارا جاناقوۆا №1752 بولىپ كەزەككە تىركەلگەن ەكەن. 2022 جىلى 446-شى بولىپ تۇرعان. قازىرگى ۋاقىتتا كەزەكتەگى ءنومىرى – 168. «تۇرعىن ءۇي قاتىناستارى تۋرالى» زاڭنىڭ 74-بابىنا سايكەس, مەملەكەتتىك تۇرعىن ءۇي قورىنان بولىنەتىن پاتەرلەر بەلگىلەنگەن كەزەكتىلىك تارتىبىمەن تۇرعىن ءۇي الۋعا مۇقتاجدار ەسەبىندە تۇرعان ازاماتتارعا بەرىلەدى. بۇل ازاماتشاعا ازىرشە كەزەگى جەتپەي ءۇي بەرۋ زاڭعا تومپاق كەلەدى. ءارى ول كەزەكتە تۇرعان وزگە جانداردىڭ زاڭدى قۇقىقتارىن بۇزعانىمىز بولار ەدى, – دەيدى ب.يمانعاليەۆا.
كەيىنگى جىلدارى كومىرلى شاھارداعى مۇگەدەكتەرگە پاتەر بەرۋ كورسەتكىشتەرىنە كوڭىل تولمايدى. 2022 جىلى ءى جانە ءىى توپتاعى مۇگەدەكتەرگە 23 پاتەر بەرىلسە, وتكەن جىلى نەبارى 10 مۇمكىندىگى شەكتەۋلى جان باسپانالى بولعان.
مۇگەدەكتەرگە مەملەكەتتىك تۇرعىن ءۇي قورىنان پاتەر ءبولۋ ءۇردىسى جالپى ەرتىس-بايان وڭىرىندە كەنەۋى كەتىپ تۇرعان ماسەلە سىندى. وڭىرلىك جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى الميرا ديسيۋپوۆانىڭ دەرەگىنشە, كەيىنگى 10 جىلدا ءبىرىنشى, ەكىنشى توپ مۇگەدەكتەرىنە جانە مۇگەدەكتىگى بار بالانى تاربيەلەپ وتىرعان وتباسىلارعا جالپى سانى 477 پاتەر بەرىلگەن.
الميرا امانقىزى جالعىز-اق وتباسى وزگە پاتەردى جالعا الاتىن بولسا, جالداۋ اقىسىنىڭ 50 پايىزىن مەملەكەت وتەپ بەرەتىنىن جەتكىزدى.
«2022 جىلدان بەرى ەلىمىزدە جالعا بەرىلەتىن تۇرعىن ءۇيدى سۋبسيديالاۋعا وتىنىمدەر قابىلدانىپ جاتىر. ءبىرىنشى جانە ەكىنشى توپتاعى مۇگەدەكتىگى بار ادامدار, مۇمكىندىگى شەكتەۋلى بالالاردى تاربيەلەپ وتىرعان وتباسىلار, جەتىم بالالار, كوپبالالى وتباسىلارعا تۇرعىن ءۇيدى جالعا الۋ شىعىستارىنىڭ 50 پايىزىن مەملەكەت تاراپىنان وتەۋ قاراستىرىلعان. ول ءۇشىن ءوتىنىش بەرەتىن جەرگە بارۋ كەرەك. مىسال ءۇشىن ول ەكىباستۇز قالاسىندا «Maxi Mall» ساۋدا ۇيىندە, «وتباسى بانك» اق بولىمشەسىندە بار», دەپ ءتۇسىندىردى باسقارما باسشىسى.
وسىلايشا, بۇل وتباسىنىڭ مەملەكەتتىڭ ۋادەلى پاتەرىن كۇتە-كۇتە كۇدەرى ۇزىلگەندەي. قارلىعاش اپايدىڭ ايتۋىنشا, ناۋقاس قىزى بارىن ەستىگەندەر جالدامالى پاتەرگە قابىلدامايدى. اتا-اناسى وسى ۋاقىتقا دەيىن تاپقان-تايانعاندارىن قىزىنىڭ دەنساۋلىعى ءۇشىن جۇمساپ تىنعان. قارتايعان ۋاقىتتا كەڭ پاتەرگە كوشىپ, قىزىنا جايلى جاعداي جاسايمىن دەگەن ۇمىتتەرى جاقىن ۋاقىتتا ورىندالمايتىن سياقتى.
پاۆلودار وبلىسى,
ەكىباستۇز قالاسى
