جەرگىلىكتى اتقارۋشى ورگاندارمەن جانە سوت ورىنداۋشىلارىنىڭ بىرلەسكەن جۇمىسى ارقاسىندا الماتى قالالىق پروكۋراتۋراسى بىلتىر مىڭنان استام جۇمىسسىز اليمەنت تولەۋشىنى انىقتاپ, ەسەپكە الدى. جۇمىسسىز بولعاندىقتان, اليمەنتتى دە تولەمەي جۇرگەنى بەلگىلى. ولاردىڭ 657-ءسى جۇمىسقا تۇرعىزىلدى.
دەگەنمەن, شىن مانىندە, بۇلاردىڭ ءبارىن بىردەي جۇمىسسىز دەۋ قيىن. سەبەبى كوبى «ياندەكس.GO» قوسىمشاسى ارقىلى جولاۋشى تاسىمالداۋ قىزمەتىمەن اينالىسىپ, جاسىرىن تابىس تاۋىپ ءجۇر. پروكۋراتۋرا ورگاندارى اليمەنتتەن قاشقان وسىنداي 150-دەن استام بورىشكەردى انىقتادى.
2023 جىلى 14 بورىشكەرگە قاتىستى قىلمىستىق ىستەر تىركەلىپ, ولاردىڭ ىشىنەن 5 بورىشكەر قىلمىستىق جاۋاپكەرشىلىككە تارتىلدى. قازىرگى تاڭدا سوتقا دەيىنگى تەرگەپ-تەكسەرۋ ورگاندارىنىڭ وندىرىسىندە 9 قىلمىستىق ءىس بار.
سونىمەن قاتار اليمەنت ءوندىرۋ بويىنشا سوت شەشىمىن ورىنداماعان 112 بورىشكەر اكىمشىلىك قۇقىق بۇزۋشىلىق تۋرالى كودەكستىڭ 669-بابىمەن اكىمشىلىك جاۋاپكەرشىلىككە تارتىلدى.
جالپى, الماتى پروكۋراتۋراسىنىڭ مۇرىندىق بولۋىمەن 2023 جىلعى 16 مىڭ بالا تيەسىلى 2,5 ملرد تەڭگەدەن استام اليمەنت بويىنشا قارىزدار تولەندى. بۇل باعىتتا جۇمىستار جالعاسا بەرەدى.
