سالتاناتتى شاراعا ۋنيۆەرسيتەت رەكتورى ەرلان سىدىقوۆ باستاعان راقىمجان تۇرىسبەك, قايرات ساق, جانات اسكەربەقىزى, قايىربەك كەمەڭگەر, داۋلەتكەرەي كاپ ۇلى سىندى عالىمدار مەن قالامگەرلەر قاتىستى. كەشتى جۇرگىزگەن – اباي اتىنداعى مەملەكەتتىك سىيلىقتىڭ لاۋرەاتى, پروفەسسور كەنجەعالي مىرجىقباي.
سۇحبات ۋنيۆەرسيتەت ستۋدەنتتەرىنىڭ اقىن ولەڭدەرىن جاتقا وقۋىمەن باستالدى. ازاماتتىق جانە ليريكالىق باعىتتاعى جىر شوعىرى كورەرمەننىڭ ىستىق ىقىلاسىنا بولەندى.
ەڭ اۋەلى پروفەسسور راقىمجان تۇرىسبەك بايانداما جاساپ, اقىن شىعارماشىلىعىنىڭ ەرەكشەلىگىنە توقتالدى.
– سەرىك اعامىزدىڭ ەپيكالىق قۋاتىنا نازار اۋدارماي بولمايدى. اسىرەسە «ماحامبەت پەن جاڭگىر حان», «كەيكى باتىر» داستاندارىنداعى ءداۋىر داۋىسىمەن جاڭعىرعان ازاتشىل يدەيا وقىرمان ساناسىنا ەرەكشە سىلكىنىس اكەلگەنى اقيقات, – دەدى ول.
اقىننىڭ داستان داستۇرىندەگى بۇل شىعارمالارىنا ادەبيەت الىپتارىنىڭ ءوزى ەرەكشە نازار اۋدارعان. «كەيكى باتىر» داستانى جارىققا شىعاردان بۇرىن قولجازبامەن تانىسقان ءابىش كەكىلباەۆتىڭ اتالى دا, باتالى ءسوزى شىعارمانىڭ باعىن اشتى دەۋگە بولادى. ءابىش العىسوزىندە «...قازان توڭكەرىسىنىڭ بىزگە جاساعان ەڭ ۇلكەن قياناتى – حالقىمىزدى ءوز-وزىنەن ەكى ايىرىپ, ءبىرىن-ءبىرى تومپەشتەيتىن الەۋمەتتىك قانىپەزەرلىككە باۋلىعانى. اتالعان داستان وسى ءبىر اششى اقيقاتتى قاز-قالپىندا جەتكىزەدى», دەپتى. ال وسى داستاندى وقىپ پىكىر جازعان اتاقتى عالىم-جازۋشى. اقسەلەۋ سەيدىمبەك قانداي پىكىر ايتادى؟ «اۆتور كەڭ تىنىستى ەپيكالىق قارىممەن قالام تارتا وتىرىپ, كەيكىنىڭ عۇمىر كەشكەن زامانى مەن قوعامىنا قاتىستى تاريحي دەرەكتەردى كوسىپ پايدالانادى. قۇجاتقا تۇسپەگەنىمەن قۇلاقتان كەتپەگەن عيبراتتى وقيعالار مەن قيماس ەستەلىكتەر داستاننىڭ سيۋجەتتىك ارقاۋىنا اينالىپ, كەيكىنامالىق جىر – شەجىرەسى جاسالعان», دەيدى.
ءارى قاراي ساحناعا ايتىسكەر اقىن توبا وتەپباي شاقىرىلدى. ونەرپاز حالىق اقىنى نۇرحان احمەتبەكتىڭ «تورعاي تولعاۋىن» ورىندادى. وسى ورايدا تورعاي ءان مەكتەبى ەرەكشەلىگىنە توقتالعىمىز كەلەدى. اتالعان ءوڭىر ماقامىندا ارقا ءان ايتۋ داستۇرىنە ءتان سالتانات پەن ءوزى شەكتەسىپ جاتقان باتىس ءوڭىرىنىڭ جاۋىنگەرلىك رۋحى دا بار. سەرىك تۇرعىنبەك ۇلى شىعارماشىلىعىندا دا وسى ەكى سارىن قاتار جۇرەدى دەپ ايتا الامىز. ول تۋرالى ءوزى «تورعاي ەلىنىڭ ءوز ماقامى بار. جاسىمدا ءوزىمنىڭ دومبىرا تارتاتىنىم بولدى. سول ماقامعا, جىراۋلاردىڭ سارىنىنا سالاتىنمىن. سونىڭ ءبارى اقىندىققا اكەلەتىن جول» دەپ تولعانادى.
جۋرناليستيكا جانە ساياساتتانۋ فاكۋلتەتىنىڭ دەكانى قايرات ساق اقىننىڭ «اقان سەرى – بالقاديشا», «بالۋان شولاق – عاليا» اتتى عاشىقتىق داستاندارىن ايتا كەلىپ, سەرىلىك مازمۇنىنا بايلانىستى وي قوزعادى.
– سەرىلىكتىڭ ەڭ باستى قاسيەتى – تازالىق. رۋح تازالىعى. سەراعامىزدىڭ دا بويىنان قاسيەتتى ولەڭگە دەگەن وسى تازالىقتى بايقاۋعا بولادى – دەپ باعا بەردى عالىم.
كەش سوڭىندا اقىن تىلەگىن ايتىپ, كەلگەن قاۋىمعا اقىندىق ءارى ازاماتتىق العىسىن ءبىلدىردى.
