وبلىستىق ءماسليحاتىنىڭ دەپۋتاتى باقىت قامەتوۆتىڭ ايتۋىنشا, كيىكتىڭ ۇشالارى ماحامبەت اۋدانىنداعى تاڭداي اۋىلدىق وكرۋگىنە قارايتىن قالماقتى ەلدى مەكەنىنىڭ تۇسىندا جاتقانى انىقتالعان. دالادا جاتقان كيىكتىڭ كەيبىرى باۋىزدالعان. كەيبىرىنىڭ قارنى جارىلعان. ءماسليحات دەپۋتاتى 26 قاڭتاردا كيىكتىڭ ءۇيىلىپ جاتقان ۇشاسى تۇسىرىلگەن ۆيدەونى الەۋمەتتىك جەلىدەگى پاراقشاسىنا جۇكتەدى.
«بەينەجازبا 26 قاڭتار ساعات 19:30-دا تۇسىرىلگەن. تانداي سەلولىق وكرۋگىنە قاراستى قالماقتى ەلدى مەكەنىندە 38 كيىكتىڭ ولەكسەسى تابىلدى. بارلىعىنىڭ ءمۇيىزىن كەسىپ العان. ىشكى قۇرىلىسى جوق. شارۋاگەرلەردىڭ ايتۋىنشا, 25 قاڭتاردا ورمان جانە جانۋارلار دۇنيەسىن قورعاۋ مەكەمەسىنىڭ مەملەكەتتىك قىزمەتكەرلەرى جانە اڭشىلارى اتىپ كەتكەن. پوليتسيا قىلمىستى تىركەپ, زاڭدى شارا قولدانادى», دەپ حابارلادى باقىت قامەتوۆ. ورمان شارۋاشىلىعى جانە جانۋارلار دۇنيەسى كوميتەتىنىڭ مالىمەتىنە سۇيەنسەك, اتالعان دەرەك ماحامبەت اۋداندىق ىشكى ىستەر ءبولىمى تەرگەۋ جۇرگىزىپ جاتىر. ءىس ماتەريالدارى قىلمىستىق كودەكستىڭ 339-بابىنىڭ 2-بولىگىمەن تىركەلگەن.
«كيىك سانىن رەتتەۋ «وحوتزووپروم» ينسپەكتورلارىنىڭ تىكەلەي قاتىسۋىمەن جۇزەگە اسادى. بەكىتىلگەن الگوريتمگە سايكەس رەتتەۋ ناتيجەسىندە الىنعان كيىك ۇشالارى مىندەتتى تۇردە اسقازان-ىشەك جولىن الىپ تاستاپ, ىشكى مۇشەلەرى, باسى جانە تەرىسىمەن ۆەتەرينارلىق باقىلاۋ ءۇشىن ەت كومبيناتىنا جىبەرىلەدى. مال دارىگەرلەرى ۇشالاردى قاراپ بايقاعان سوڭ ۆەتەريناريالىق انىقتاما بەرەدى. كيىك مۇيىزدەرى بەلگىلەنگەن تالاپتاردى ساقتاي وتىرىپ, «وحوتزووپروم» دەريۆاتتارعا ەسەپ جۇرگىزەتىن جاۋاپتى قىزمەتكەرىنىڭ, اۋماقتىق ورمان شارۋاشىلىعى جəنە جانۋارلار دۇنيەسى ينسپەكتسياسى مەملەكەتتىك ينسپەكتورلارىنىڭ باقىلاۋىمەن بولىنەدى. كەيىننەن «وحوتزووپروم» ساقتاۋعا جىبەرۋ ءۇشىن مىندەتتى تۇردە تاڭبالاۋعا جاتادى», دەپ حابارلادى كوميتەتتەن.
اتىراۋ وبلىسى
