فوتو: ken-zhyloi.kz
«بۇيىرتسا شەتەلدەگى قازاق بالالارى قازاقستانعا كەلەدى! قازاق ءتىلىن وقيدى, قازاق مادەنيەتىمەن تانىسادى, قازاقتىڭ تاريحىن بىلەدى. قازىرگى ۋاقىتتا ءال-فارابي اتىنداعى قازاق ۇلتتىق ۋنيۆەرسيتەتى رەسمي حات دايىنداپ جاتىر. ۋنيۆەرسيتەتتىڭ اتىنان گۇلشارا اسىلبايقىزى وسى ىسكە جانىن سالىپ, كىرىسىپ جاتىر. حات دايىن بولعان سوڭ شەت ەلدەگى قازاقستان ەلشىلىكتەرىنە جولدايمىز. @sheteldegi_qazaq_balalary جوباسىنىڭ وسىلاي جالعاسىپ جاتقانىنا بەك ريزامىن!», دەپ جازدى جانار بايسەمىز.
ونىڭ حابارلاۋىنشا شەتەلدىكتەر اسىراپ العان قازاقستان بالالارىنىڭ ەلدە قينالماي جۇرۋىنە بارلىق جاعداي جاسالادى. ولاردىڭ جول شىعىنى, ۆيزاسى تولەنەدى. ءۇش مەزگىل تاماق, جاتاقحانا تەگىن بەرىلەدى جانە ستيپەنديا الادى. ۇزاق ۋاقىتقا كەلە المايتىندارى ءۇش اي, ۋاقىتى بارلارى توعىز اي وقيدى.
«ەلگە كەلىپ, انا ءتىلىن ۇيرەنۋگە تالعات, ساردار, انەل, سۇلتان قۇلشىنىپ وتىر. سابينا دا كەلۋى مۇمكىن. انەل توعىز ايعا كەلگىسى كەلىپ جاتىر. تالعات, بۇگىن قاشان كەلە الامىز دەپ سۇراپ جاتىر», دەلىنگەن اتالعان ينستاگرام پاراقشادا.
