قالا اكىمى شاكىر كەيكيننىڭ دەرەگىنە سۇيەنسەك, «نۇرسايا» شاعىن اۋدانىنداعى «لاتيفا» تۇرعىن ءۇي كەشەنىنەن 38 پاتەر بەرىلدى. وزگە وتباسىلارعا باسقا تۇرعىن ءۇي كەشەندەرىنەن پاتەر ۇسىنىلعان.
«قازىر اتىراۋ قالاسىندا 21 مىڭنان اسا ادام تۇرعىن ءۇي الۋ كەزەگىندە تۇر. ونىڭ بارىنە ءبىر كۇندە پاتەر بەرۋ مۇمكىن ەمەس. جەرگىلىكتى اتقارۋشى ورگان مۇقتاج جانداردى باسپانامەن قامتۋدى قولعا الىپ وتىر. جىل سوڭىنا دەيىن تاعى 100 وتباسى جاڭا باسپاناعا يە بولادى», دەيدى ش.كەيكين.
جاڭا باسپاناعا يە بولعانداردىڭ قاتارىندا جانسەرىك دارعوجيننىڭ وتباسى دا بار. ول يندەردە ەر جەتكەنىمەن, قازىر اتىراۋ قالاسىنا كوشىپ كەلگەن. بۇل وتباسىعا ءۇش بولمەلى پاتەر بەرىلدى. «پاتەر كەزەگىندە 2015 جىلدان بەرى تۇرمىن. وسى كەزگە دەيىن پاتەر جالداپ ءجۇر ەدىك. جاڭا پاتەر الدىق, قۋانىشىمىزدا شەك جوق», دەدى ول.
وسىنداي قۋانىشقا كوپبالالى انا اسەمگۇل رىسماعامبەتوۆا دا كەنەلدى. وسى كەزگە دەيىن وتباسىمەن اعايىن-تۋىستارىنىڭ ۇيىندە تۇرعان. ء«وز باسپانامىز بولعانىن ارمانداپ ءجۇر ەدىك. بالالارىمىزدىڭ نەسىبەسى شىعار, جاڭا پاتەرگە يە بولدىق», دەيدى كوز جاسىنا ەرىك بەرگەن كوپبالالى انا.
«لاتيفا» تۇرعىن ءۇي كەشەنىنىڭ قۇرىلىسىن «نۇر اتىراۋ قۇرىلىس» جشس جۇرگىزگەن. سەرىكتەستىك ديرەكتورى نۇرلان نۇرمۇحانوۆتىڭ ايتۋىنشا, تۇرعىن ءۇي كەشەنىنە ۇلەسكەرلەردەن قارجى الىنباعان.
«تۇرعىن ءۇي كەشەنىنىڭ قۇرىلىسىن ءوز قارجىمىزعا جۇرگىزدىك. ويتكەنى بىزگە ۇلەسكەرلەردىڭ قارجىسىن الۋعا رۇقسات بەرىلگەن جوق. قالالىق اكىمدىكتىڭ كوپبالالى وتباسىلار مەن مۇمكىندىگى شەكتەۋلى جاندارعا پاتەر ساتىپ الۋ ءۇشىن جاريالاعان تەندەرىنە قاتىستىق. اشىق تەندەردەن 42 پاتەرگە تاپسىرىستى ۇتىپ الدىق. مۇندا ءبىر بولمەلى پاتەردىڭ اۋماعى – 40 شارشى مەتر, ەكى بولمەلى – 60 شارشى مەتر, ءۇش بولمەلى – 80 شارشى مەتر. ءار پاتەر اۆتونومدى جىلۋ جۇيەسىمەن جابدىقتالعان. ءار وتباسىنىڭ پاتەرىندەگى جىلۋدى قالاعان ۋاقىتىندا قوسىپ, اجىراتۋىنا مۇمكىندىك جاسالعان», دەپ ءمالىم ەتتى ن.نۇرمۇحانوۆ.
اتىراۋ وبلىسى
