مايقايىڭ ءوز الدىنا ەلدى مەكەن بولعالى ونىڭ ەكونوميكاسى جەراستى بايلىعىنا تاۋەلدى. التىن كەنىشى جەرگىلىكتى حالىقتى اسىراپ وتىر. «مايقايىڭالتىن» اكتسيونەرلىك قوعامى ەرتىستىڭ پاۆلودار وڭىرىندەگى ەڭ العاش قۇرىلعان تاۋ-كەن ءوندىرىسى ەكەنىن دە اتاپ وتكەن ابزال. ونداعى كەنىشكە تۇڭعىش ەكسكاۆاتور 1940 جىلى تۇسىرىلگەن ەكەن. ول بۋمەن جۇمىس ىستەيتىن ەدى. بۇگىندە كاسىپورىنعا ەكى كەنىش جانە كەن-بايىتۋ فابريكاسى قارايدى. جەرگىلىكتى حالىقتىڭ دەنى بۇگىندە التىن وندىرىسىندە ەڭبەك ەتەدى.
– مايقايىڭ كەنتىنىڭ اكىمشىلىك اۋماعىنا مايكوبە, سۇلۋجون, ۇشق ۇلىن, شوپتىكول اۋىلدارى كىرەدى. بۇگىندە كەنت پەن وعان قاراستى اۋىلداردا «مايقايىڭالتىن» اق-نان بولەك, پايدالى قازبالار وندىرۋمەن 5 بىردەي كاسىپورىن اينالىسادى. ولار – كومىر وندىرەتىن «مايكۋبەن ۆەست» اكتسيونەرلىك قوعامى, «قازاقستان ءاليۋمينيى» اق-نىڭ فيليالى – «كەرەگەتاس» كەنىشى, «مايقايىڭ اقتاس ءوندىرۋ زاۋىتى» جشس, «پنەۆموسوققىش بۇرعىلاۋ» عىلىمي وندىرىستىك كاسىپورنى» جشس, «IBM Gold» جشس, – دەيدى باياناۋىل اۋدانىنىڭ اكىمى ارداق كىسەنتاەۆ.
بىلتىر «مايقايىڭالتىن» اق اۋداندىق بيۋدجەتكە 840 ملن 714 مىڭ تەڭگە سالىق تولەگەن. ەڭ ۇلكەن سالىق تولەۋشى – «مايكۋبەن ۆەست» اق, وتكەن جىلى بۇل ءوندىرىس ورنى جەرگىلىكتى قازىناعا 1 ملرد 681,3 ملن تەڭگە قارجى قۇيعان.
سونىمەن قاتار جەردى پايدالانعانى ءۇشىن 2023 جىلى كەلەسىدەي قوسىمشا سالىقتار تولەنگەن:
«مايقايىڭالتىن» اق – 6 ملن 739 مىڭ تەڭگە;
«مايكۋبەن ۆەست» اق – 46 ملن 314 مىڭ تەڭگە;
«كەرەگەتاس» كەنىشى – 8 ملن 329 مىڭ تەڭگە;
«پنەۆموسوققىش بۇرعىلاۋ» جشس – 1 ملن 531 مىڭ تەڭگە;
«گراۆەليت» جشس – 192 مىڭ تەڭگە. سوڭعى اتالعان ەكى كاسىپورىن جەرگىلىكتى كاسىپكەر تيمۋر قابدۋلوۆكە تيەسىلى. ول – «مايقايىڭالتىن» اق باس ديرەكتورىنىڭ كەڭەسشىسى ورىنجان قابدۋلوۆتىڭ ۇلى.
التىندى ايماقتىڭ دامۋىنا ۇلەس قوسقان ازاماتتار از ەمەس. بۇل تىزىمدە ەل اراسىندا «مايقايىڭنىڭ مۇحتارى» اتانعان مۇحتار ابەنوۆتىڭ ەسىمى العاش بولىپ اتالارى انىق. مۇحتار اعا دا بيىل 92 جاسقا تولعالى وتىر. كەن بايىتۋ كومبيناتىنىڭ بارلىق جۇمىس ساتىسىنان وتكەن ەڭبەك ارداگەرى – قۇرمەت دەمالىسىندا دا قاراپ قالماعان جان. ەلدى جۇمىلدىرىپ, كەنتتەگى يگى جۇمىستارعا باستاماشى بولدى. سوناۋ 1958 جىلى ۇلى جازۋشى مۇحتار اۋەزوۆ وسى وڭىرگە ارنايى كەلگەندە بىرگە ەرىپ ءجۇرىپ, كەيىن سول ساپار تۋرالى ەستەلىكتەر جازدى. الەم تانىعان الىپ قالامگەردىڭ ەسىمى مايقايىڭ №1 قازاق ورتا مەكتەبىنىڭ بەرىلۋىنە ءبىر ءوزى تۇرتكى بولدى. بەلسەندى قاريا كوپ جىلدار كەنتتەگى ارداگەرلەر كەڭەسىن باسقارىپ, ۇرپاق تاربيەسىنىڭ دامۋىنا مول ەڭبەك ءسىڭىردى. ول كىسىنىڭ باستاماسىمەن كەنتتە ۇلكەن مۋزەي اشىلدى.
پاۆلودار وبلىسى,
باياناۋىل اۋدانى,
مايقايىڭ كەنتى
