قۇتقارۋشىلار اۆتوبۋس قۇلاعان ويىقتاعى توپىراق اراسىنان 4 قاڭتار كۇنى 2 ازاماتتىڭ مۇردەسىن الىپ شىققان ەدى. ولار – سارقىت بەردىقان (1999 جىلعى) جانە تىشكەۆيچ ولەگ لەونيدوۆيچ (1970 جىلعى). وزگە ەكى قۇتقارۋشىنى ىزدەۋ جۇمىستارى جالعاسىپ جاتىر. ال بۇعان دەيىن جازعانىمىزداي, پاۆلودار وبلىسىنىڭ اكىمى اسايىن بايحانوۆ قازا تاپقان قۇتقارۋشىلاردىڭ وتباسىنا «مايقايىڭالتىن» اق جانە كاسىبي اسكەريلەندىرىلگەن اپاتتىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىنان 4,5 ملن تەڭگەدەن اسا مولشەردە ماتەريالدىق كومەك كورسەتىلەتىنىن ءمالىم ەتكەن ەدى.
الايدا مارقۇم ولەگ تىشكەۆيچتىڭ قىزى يانا وسولودكوۆا ۋادە ەتىلگەن قاراجاتتىڭ دۇرىس بولىنبەگەنىنە شاعىمدانىپ وتىر.
– اكەمنىڭ كەنەتتەن كوز جۇمعانى جايىندا كورشىلەرىمنەن ەستىدىم, كاسىپورىن بۇل جايىندا جاق اشپادى. مارقۇم اكەمدى جەر قوينىنا تاپسىرعان سوڭ ءبىزدى بارلىعى ۇمىتتى. ەشكىم بايلانىسپايدى, بەرگەن تەلەفون نومىرلەرى جاۋاپ بەرمەيدى. ۋادە ەتىلگەن 4,5 ملن تەڭگە بەرىلگەن جوق. تەك «مايقايىڭالتىن» كەنىشىنەن 2 ملن تەڭگە كومەك ءبولىندى. ماعان تەگىن قىزمەت كورسەتەتىن پسيحولوگتىڭ كومەگى قاجەت ەدى, ول دا ۇسىنىلمادى. قازىر قىزمەت قۇنى 20 مىڭ تەڭگە تۇراتىن پسيحوتەراپەۆتىڭ قىزمەتىن پايدالانىپ وتىرعان جايىم بار. اكەمنىڭ ولىمىنەن سوڭ جۇيكە جۇيەم بۇزىلىپ, كۇيزەلىسكە ۇشىرادىم. بۇدان 1,5 جىل بۇرىن اكەم ەكەۋمىز انامدى جوعالتىپ, قاتتى قينالعان ەدىك. ال قازىر قاتتى قامىعۋ ۇستىندەمىن, نە ىستەۋ كەرەك ەكەنىن بىلمەيمىن. اكەمدى جەرلەۋ شاراسىنا 1 ملن تەڭگە شىعىنداندىق. ءوزىم ءماجبۇرلى تۇردە الماتى قالاسىنداعى اقىلى ەمحاناعا بارىپ, 500 مىڭ تەڭگەگە ەمدەلدىم. بەلگىلى سەبەپتەرگە بايلانىستى قاڭتار ايىندا جۇمىس ىستەگەن جوقپىن. جوعارى تۇرعان ورگانداردان ەشبىر قارجىلاي جانە مورالدىق كومەك كورە الماي وتىرمىز. اكەمنىڭ ولىمىنە كاسىپورىن باسشىلىعىنىڭ نەمقۇرايدىلىعى سەبەپ بولدى. وبلىستىق توتەنشە جاعدايلار دەپارتامەنتى مەن «مايقايىڭالتىن» باسشىلىعىنان بىزبەن حابارلاسۋىن وتىنەمىز. اعامىز ەكەۋمىز قيىن جاعدايدا قالدىق, – دەپ شاعىمداندى مارقۇم قۇتقارۋشىنىڭ قىزى الەۋمەتتىك جەلىدە.
پاۆلودار وبلىسى اكىمىنىڭ ءباسپاسوز قىزمەتى مارقۇم قۇتقارۋشىنىڭ قىزىنا تيەسىلى كومەك كورسەتىلگەن دەپ وتىر.
«قازا تاپقان قۇتقارۋشىلاردىڭ وتباسىلارىنا 4,5 ملن تەڭگە كولەمىندە ماتەريالدىق كومەك كورسەتىلدى, ونىڭ ىشىندە «مايقايىڭالتىن» اق 2 ملن تەڭگە تولەدى. كاسىبي اسكەريلەندىرىلگەن اپاتتىق-قۇتقارۋ قىزمەتتەرىنىڭ رەسپۋبليكالىق ورتالىق شتابى 500 اەك نەمەسە 1 ملن 846 مىڭ تەڭگە مولشەرىندە ماتەريالدىق كومەك كورسەتتى. سونداي-اق جەرلەۋ راسىمدەرىنە 100 اەك نەمەسە 369 200 تەڭگە مولشەرىندە تولەم جاسالدى. بىرىڭعاي جيناقتاۋشى زەينەتاقى قورىنان جەرلەۋگە 94 اەك نەمەسە 347 000 تەڭگە مولشەرىندە تولەم جاسالدى», دەپ جاۋاپ بەردى اكىمنىڭ ءباسپاسوز قىزمەتى.
مۇنداي تولەمدەردى مۇردەلەرى تابىلعان 2 قۇتقارۋشىنىڭ وتباسىلارى العان. جەر استىندا جاتقان قۇتقارۋشىلاردى ىزدەستىرۋ جۇمىستارى اياقتالعاننان كەيىن, ولاردىڭ مۇردەسى تابىلعان جاعدايدا نەمەسە قايتىس بولدى دەپ تانىلسا, وزگە وتباسىلارعا دا وسىنداي كومەك بولىنەدى. سونىمەن قاتار وتباسىلارعا اسىراۋشىسىنان ايىرىلۋ بويىنشا مەملەكەتتىك الەۋمەتتىك جاردەماقى تاعايىندالادى (18 جاسقا تولعانعا دەيىن وتباسىنداعى ءاربىر كامەلەتكە تولماعان ادامعا اي سايىنعى تولەم).
«وتباسىلارعا بەرىلەتىن كومەك تەك وسى تولەمدەرمەن شەكتەلىپ قالمايدى. جەرگىلىكتى اتقارۋشى ورگان كاسىبي اسكەريلەندىرىلگەن اپاتتىق-قۇتقارۋ قىزمەتتەرىنىڭ رەسپۋبليكالىق ورتالىق شتابىنان قوسىمشا ساقتاندىرۋ تولەمدەرى جانە «مايقايىڭالتىن» اق-دان ءىرى ماتەريالدىق كومەك كورسەتۋ تۋرالى ماسەلەنى پىسىقتاپ جاتىر. بۇل تولەمدەر تولەنگەن سومادان بىرنەشە ەسەگە كوپ. تولەمدەردىڭ ناقتى سومالارى ىزدەستىرۋ جۇمىستارى اياقتالعاننان كەيىن حابارلاناتىن بولادى», دەپ مالىمدەدى ءباسپاسوز قىزمەتىنەن.
پاۆلودار وبلىسى
