وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ازامات مامبەتوۆتىڭ دەرەگىنە سۇيەنسەك, 16 مىڭ ادامنىڭ جالاقىسىنا ءىشىنارا سۋبسيديا بەرىلەدى. مەملەكەت تاراپىنان كورسەتىلەتىن مۇنداي كومەكتى الەۋمەتتىك جانە قوعامدىق جۇمىستارعا, جاستار تاجىريبەسىنە, «العاشقى جۇمىس ورنى» مەن «كۇمىس جاس», «ۇرپاقتار كەلىسىمشارتى» جوبالارى اياسىندا جۇمىسقا ورنالاسقاندار الادى. بۇعان قوسا قىسقامەرزىمدى وقۋ كۋرستارىندا 585 ادام بىلىكتىلىك شىڭداپ, ونلاين Skills ارقىلى 1 880 ادام قامتىلادى. ال 72 ادام ۆاۋچەردەن وتكىزىلەدى. «باستاۋ-بيزنەس» جوباسىمەن كاسىپكەرلىك نەگىزدەرىن مەڭگەرۋ ءۇشىن 2 615 ادام وقۋعا جىبەرىلەدى. ءوز ءىسىن اشۋ باعىتىندا الەۋمەتتىك وسال ساناتتارىنداعى 291 ادامعا قايتارىمسىز گرانتتار مەن 2,5 پايىزدىق جەڭىلدىك, 142 جاسقا ميكروكرەديت بەرۋ كوزدەلىپ وتىر. كاسىپتىك باعدارلاۋدان 15 041 ادامدى وتكىزۋ كوزدەلگەن.
مۇنايلى وڭىردە مۇمكىندىگى شەكتەۋلى جاندار مەن پروباتسيا ەسەبىندە تۇرعان, جازاسىن وتەۋ ورىندارىنان بوساپ شىققان ادامدار ءۇشىن جۇمىسقا ورنالاستىرۋ كۆوتاسى بەلگىلەنىپ وتىر. ولاردى جۇمىسقا قابىلدايتىن مەكەمەلەر تىزبەسى بەكىتىلگەن.
قازىر وڭىردە مۇمكىندىگى شەكتەلگەن 24 534 ادام بار. ونىڭ ىشىندە ءبىرىنشى توپتاعى مۇگەدەكتەر – 2 293, ەكىنشى توپتاعىلار سانى – 8 789, ءۇشىنشى توپتاعىلار – 9 254. ال 4 198 بالاعا مۇگەدەكتىك ساناتى بەرىلگەن. مۇمكىندىگى شەكتەلگەنىمەن, تابىس تاپقىسى كەلەتىندەر از ەمەس. ماسەلەن, بىلتىر جۇمىسپەن قامتۋ ورتالىقتارىنا مۇمكىندىگى شەكتەلگەن, بىراق جۇمىس ىستەۋگە قابىلەتتى 1 182 ادام جۇگىنگەن. ونىڭ ىشىندە 1 019 ادامعا الەۋمەتتىك قولداۋ كورسەتىلگەن.
«بىلتىر باسقارماعا جۇگىنگەن مۇمكىندىگى شەكتەۋلى جانداردىڭ اراسىنان 273 ادام تۇراقتى جۇمىسقا ورنالاستى. ونىڭ 77-ءسى كۆوتامەن قامتىلدى. ال اقىلى قوعامدىق جۇمىسقا 328 ادام تارتىلدى. الەۋمەتتىك جۇمىس ورنىنا 17 ادام, جاستار تاجىريبەسىنە 35 تۇلەك جىبەرىلدى. «العاشقى جۇمىس ورنى» جوباسى ارقىلى – 7, «كۇمىس جاس» جوباسى شەڭبەرىندە جاسى 50-دەن اسقان 18 ادام جۇمىس تاپتى. «باستاۋ-بيزنەس» جوباسىمەن كاسىپكەرلىك نەگىزدەرى كۋرسىنان مۇگەدەكتىك ساناتىنداعى 289 ادام ءوتتى», دەپ حابارلادى باسقارمانىڭ ءباسپاسوز قىزمەتى.
سونداي-اق «تەڭىزشەۆرويل» كومپانياسىنىڭ قولداۋىمەن وقۋ كۋرسىنا – 4, ارنايى جۇمىس ورنىنا 7 ادام جىبەرىلگەن. ال 41 ادامعا 400 ايلىق ەسەپتىك كورسەتكىش كولەمىندە مەملەكەتتىك گرانت بەرىلگەن. مۇمكىندىگى شەكتەلگەن 7 ادامنىڭ جۇمىس ورنى ارنايى قۇرال-جابدىقتارمەن قامتاماسىز ەتىلىپ وتىر.
اتىراۋ وبلىسى
