بۇل – مەملەكەت باسشىسىنىڭ «ادىلەتتى قازاقستاننىڭ ەكونوميكالىق باعىتى» اتتى جولداۋىندا ايتىلعان وتاندىق قورعانىس-ونەركاسىپ كەشەنىن دامىتۋ جونىندەگى مىندەتتەردى ىسكە اسىرۋعا باعىتتالعان جۇمىستىڭ ناتيجەسى.
بۇل قۇرىلعىلاردىڭ ۇشۋ-تەحنيكالىق تالاپتارعا سايكەستىگىن باعالاۋ ءۇشىن كوميسسيا تاعايىندالدى. ونىڭ قۇرامىنا قارۋلى كۇشتەر باس شتابى مەن اۋە قورعانىسى كۇشتەرىنىڭ ۇشقىشسىز باسقارىلاتىن اۆياتسيا جۇيەلەرىن دامىتۋ جانە ولاردى قولدانۋ دەپارتامەنتىنىڭ وفيتسەرلەرى كىردى.
بارلىق ۇشۋ تەحنيكاسى زاماناۋي بەينەباقىلاۋ قۇرالدارىمەن, داتچيكتەرمەن, قاشىقتىق ولشەگىشتەرمەن جانە تەپلوۆيزورلارمەن جابدىقتالعان. ساراپشىلاردىڭ نازارىنا ءارتۇرلى ۇشۋ اپپاراتى كورسەتىلدى. ولار ارنايى رەزەڭكە جولاقتىڭ كەرىلۋىمەن كوككە كاتاپۋلتا ارقىلى ۇشىپ, سونىمەن بىرگە ورنىنان تىكۇشاق سياقتى تىگىنەن كوتەرىلىپ, اۋەدە قالىقتادى.
– وتاندىق وندىرۋشىلەر ۇشقىشسىز باسقارىلاتىن قۇرىلعىلاردى قىسقا مەرزىمدە جاسادى. ولاردىڭ جۇمىسىنىڭ ناتيجەسىن كورىپ, باعالاي الدىق. ارينە, ءالى دە پىسىقتايتىن ماسەلەلەر بار. دەسەك تە, باستاماسى جاقسى, – دەپ اتاپ ءوتتى قارۋلى كۇشتەر باس شتابى ۇشقىشسىز باسقارىلاتىن اۆياتسيالىق جۇيەلەردى دامىتۋ جانە ولاردى قولدانۋ دەپارتامەنتىنىڭ وفيتسەرى, پولكوۆنيك ەرجان جاقاشەۆ.
وتاندىق ءوندىرۋشى كومپانيالار اسكەريلەردىڭ بارلىق تالابى مەن سۇرانىسىن ەسكەرۋگە تىرىستى. ەلىمىزدە وندىرىلگەن ۇشقىشسىز باسقارىلاتىن اپپاراتتاردى قارۋ-جاراق قۇرامىنا قابىلداۋ بيۋدجەت قاراجاتىن ەداۋىر ۇنەمدەۋگە, ولاردى كەيىننەن كۇتىپ ۇستاۋ جانە جاڭعىرتۋ ماسەلەلەرىن تەز ارادا شەشۋگە مۇمكىندىك بەرەدى.
– اپپاراتتاردىڭ كۇندىزگى جانە تۇنگى كامەرالارى وتە ءتيىمدى, كوورديناتتاردى انىقتاۋ فۋنكتسياسى, لازەرلىك قاشىقتىق ولشەگىش جانە وق-دارىلەردى تاستاۋ جۇيەسى دە بار. مۇنداي سيپاتتامالار ارتيللەريانى نىساناعا باعىتتاۋعا مۇمكىندىك بەرەدى. بۇنى قارۋلى كۇشتەردىڭ ماماندارى جاقسى باعالايدى دەپ ويلايمىن, – دەدى ءوندىرۋشى كومپانيا وكىلى ايبەك احىش.
سىناق اياقتالعاننان كەيىن كوميسسيا مۇشەلەرى وتاندىق ۇۇا ازىرلەۋشىلەرىنە ۇسىنىلعان قۇرىلعىلاردىڭ نۇسقالارىن پىسىقتاۋ جانە تولىقتىرۋعا قاتىستى ۇسىنىستار بەردى.
