وسى 6 اي ۋاقىتتىڭ ءۇش ايى جاۋىنگەرلىك دايارلىق باعدارلاماسى بويىنشا جانە ءۇش ايى بىتىمگەرشىلىك دايارلىق بويىنشا ءوتتى. كونتينگەنت جەكە قۇرامى اعىلشىن ءتىلى, كۇش قولدانۋ ەرەجەلەرى بويىنشا وقىتىلىپ, حالىقارالىق, گۋمانيتارلىق زاڭناما نورمالارىن زەردەلەدى. وفيتسەرلەر مەن سەرجانتتار بىتىمگەرشىلىك بازانى كۇزەتۋدى قامتاماسىز ەتۋ, بلوكپوستتاردى ۇيىمداستىرۋ, پاترۋلدەۋ, جارىلعىش قۇرىلعىلاردى زالالسىزداندىرۋ, بەيبىت تۇرعىندارعا كومەك كورسەتۋ جانە ەۆاكۋاتسيالاۋ جونىندەگى مىندەتتەردى تاجىريبە جۇزىندە پىسىقتادى.
سونىمەن بىرگە سوعىس قيمىلدارىن جۇرگىزۋدىڭ قاعيدالارى مەن ەرەجەلەرىن, قۇرالدارى مەن ادىستەرىن, گۋمانيتارلىق كومەك پەن بەيبىت تۇرعىنداردى قورعاۋ جولدارىن تەرەڭنەن زەرتتەدى. كونتينگەنت شتابىنىڭ وفيتسەرلەرى پراكتيكالىق داعدىلار مەن جەدەل ۇيلەسىمدىلىك دەڭگەيىن ارتتىرۋ ماقساتىندا جەدەل-تاكتيكالىق دەڭگەيدەگى بىتىمگەرشىلىك بولىمشەلەر (باتالون, بريگادا) ءۇشىن اسكەري شەشىمدەر قابىلداۋ بويىنشا ساباقتار وتكىزدى.
ۇلتتىق اسكەري كونتينگەنتتى ورنالاستىرۋ الدىندا بىتىمگەرشىلىك دايارلاۋ تولىق كولەمدە جانە بۇۇ تالاپتارى مەن ستاندارتتارىنا سايكەس جۇرگىزىلدى. جالپى, كونتينگەنتتىڭ جەكە قۇرامى دالالىق داعدىلارىن, موتيۆاتسيا مەن دايىندىقتىڭ جوعارى دەڭگەيىن كورسەتتى.
اسكەري قىزمەتشىلەردى وقىتۋعا ورتالىقتىڭ نۇسقاۋشى قۇرامى عانا ەمەس, سونىمەن قاتار مينادان تازارتۋ جانە اسكەري مەديتسينا ورتالىقتارىنىڭ وكىلدەرى دە قاتىستى. «كوگىلدىر تۋ» كەشەندى بىتىمگەرشىلىك وقۋ-جاتتىعۋىنىڭ قورىتىندىسى بويىنشا كونتينگەنتتىڭ جەكە قۇرامى بىتىمگەرشىلىك كۇشتەر قۇرامىندا قويىلعان مىندەتتەردى ورىنداۋعا «دايىن» دەگەن باعا الدى.
كونتينگەنتتىڭ دايىندىعىن باعالاۋداعى شەشۋشى ءسات وتكەن جىلدىڭ جەلتوقسان ايىندا بىرىككەن ۇلتتار ۇيىمى دەلەگاتسياسىنىڭ ساپارى بولدى. ساراپشىلار بىتىمگەرشىلىك وپەراتسيالارعا قاتىسۋعا جوسپارلانعان قازاقستاندىق اسكەري قىزمەتشىلەردىڭ ماتەريالدىق-تەحنيكالىق بازاسىنىڭ جاي-كۇيىن جانە دايىندىق دەڭگەيىن جان-جاقتى تەكسەردى. ءبىر اپتا ىشىندە بىتىمگەرلەردى جاراقتاندىرۋعا, تەحنيكامەن, قارۋ-جاراقپەن, وق-دارىلەرمەن, زاتتاي, ينجەنەرلىك, مەديتسينالىق مۇلىكپەن جانە رحب-قورعانىس قۇرالدارىمەن جابدىقتالۋىنا ينسپەكتسيا جۇرگىزىلدى. بىتىمگەرشىلىك دايىندىق ادىستەمەسى مەن جۇيەسىنە, اعىلشىن ءتىلىن مەڭگەرۋ دەڭگەيىنە ەرەكشە نازار اۋدارىلدى. سونداي-اق بۇۇ ينسپەكتورلارى بىتىمگەرلەردىڭ ءارتۇرلى پراكتيكالىق مىندەتتى ورىنداۋ جانە كىرىسپە تاپسىرمالاردى ورىنداۋ كەزىندەگى ۇيلەسىمدىلىگىن تەكسەردى.
ايتا كەتۋ كەرەك, ءبىزدىڭ كونتينگەنت بۇۇ ستاندارتتارىنا سايكەس كەلەتىن قارۋ-جاراق پەن اسكەري تەحنيكانىڭ زاماناۋي ۇلگىلەرىمەن جابدىقتالعان. بۇۇ ساراپشىلارى دا بىتىمگەرشىلىك كونتينگەنتتىڭ جەكە قۇرامىن دايارلاۋدىڭ جانە نۇسقاۋشىنىڭ كاسىبيلىگىنىڭ جوعارى دەڭگەيىن اتاپ ءوتتى.
وتكەن جىلدىڭ جەلتوقسان ايىندا جانە وسى جىلدىڭ قاڭتارىندا قم بىتىمگەرشىلىك وپەراتسيالار ورتالىعىنا سەنات پەن ءماجىلىس دەپۋتاتتارى كەلىپ, ونىڭ قىزمەتىمەن, سونداي-اق بىتىمگەرلەردى دايارلاۋ ۇدەرىسىمەن جانە اسكەري قىزمەتشىلەردى قارۋ-جاراقپەن, اسكەري تەحنيكامەن جانە م ۇلىكپەن جاراقتاندىرۋ بارىسىمەن تانىستى.
قازاقستان بىتىمگەرلەرىنىڭ بۇۇ ميسسيالارىنا قاتىسۋ تاريحىنا قىسقاشا توقتالىپ وتسەك, ەڭ العاش رەت 2007-2009 جىلدارى نەپال مەملەكەتىندەگى بىتىمگەرشىلىك ميسسياسىنا قاتىسقان بولاتىن. ودان سوڭ 2014 جىلدان باستاپ باتىس ساحاراداعى, 2018 جىلدان بەرى ليۆان رەسپۋبليكاسىنداعى, 2022 جىلدان بەرى ورتالىق افريكا رەسپۋبليكاسىنداعى, 2023 جىلدان كونگو دەموكراتيالىق رەسپۋبليكاسىنداعى ميسسيالارعا جىل سايىن قاتىسىپ كەلەدى. ونىڭ اراسىندا 2015-2017 جىلدارى كوت-د'يۆۋار جانە 2022-2023 جىلدارى مالي رەسپۋبليكاسىندا دا ءبىزدىڭ بىتىمگەرلەرىمىز ءوز مىندەتتەرىن ءساتتى ورىنداپ شىقتى. جالپى, وسى 16 جىل ىشىندە 600-دەن استام اسكەري قىزمەتشىمىز بىرىككەن ۇلتتار ۇيىمىنىڭ بىتىمگەرشىلىك ميسسيالارىنا قاتىسقان.
ال بيىل ەلىمىزدىڭ بىتىمگەرشىلىك قىزمەتى تاريحىندا تۇڭعىش رەت ۇلتتىق كونتينگەنت بۇۇ بىتىمگەرشىلىك وپەراتسياسىنا ءوز بەتىنشە قاتىسادى. بۇل ءبىزدىڭ بەيبىتشىلىك پەن قاۋىپسىزدىكتى قامتاماسىز ەتۋگە قوسقان ەلەۋلى ۇلەسىمىز بولماق.
