تالانتتى ءانشىنىڭ تۋعان جەرى, وسكەن ورتاسى, وقىعان جەرى تۋرالى بىلگىسى كەلەتىن شەتەلدىك تۋريستەر ءۇشىن اشىلاتىن مۇمكىندىكتەر تۋرالى «Visit Aktobe» تۋريستىك اقپاراتتىق ورتالىعىنىڭ ديرەكتورى ەرسايىن ءسۇيىنوۆ ايتىپ بەردى.
– «Dimash tour» جوباسىنا اقتوبەدەگى ديماش قۇدايبەرگەننىڭ وسكەن ءۇيى, وقىعان مەكتەبى مەن العاشقى مۋزىكالىق قابىلەتىن اشقان احمەت جۇبانوۆ اتىنداعى مۋزىكا كوللەدجىن دە قوسىپ وتىرمىز. ەڭ الدىمەن, قوناقتار اقتوبەدەگى وبلىستىق تاريحي-ولكەتانۋ مۋزەيىنە كەلىپ, حالقىمىزدىڭ تاريحىمەن, ەتنوگرافياسىمەن تانىسادى. سودان كەيىن ديماش وقىعان مەكتەپتى كورىپ, ءارى قاراي مۋزىكا كوللەدجىنە كەلەدى. بۇل جەردە ديماشتىڭ ۇستازى, ءانشى ءارى وقىتۋشى, قازاقستاننىڭ ەڭبەك سىڭىرگەن قايراتكەرى مارات ايتىموۆپەن كەزدەسۋ ۇيىمداستىرىلىپ, ول ديماش وقىعان ءدارىسحانادا قوناقتارعا شەبەرلىك ساباعىن وتكىزەدى. كوللەدج عيماراتىندا كونتسەرت ۇيىمداستىرىلىپ, قويىلىمدار ۇسىنىلادى. ودان كەيىنگى باعىت – ديماش قۇدايبەرگەننىڭ تۋعان ءۇيى. بۇل ءۇي قازىر مۋزەيگە اينالعان. شەتەلدىكتەرگە اقتوبەنىڭ كورىكتى جەرلەرى مەن تاريحي ورىندارى دا تانىستىرىلادى. وعان تاحاۋي احتانوۆ اتىنداعى دراما تەاترى, «نۇر-عاسىر» مەشىتى, كافەدرالدى شىركەۋ كىرەدى. وڭتۇستىك كورەيا مەن قىتايعا بارعان توپتىڭ ىشىندە ديماش قۇدايبەرگەننىڭ ۇستازى مارات ءايتىموۆ تە بولدى, – دەدى ە.ءسۇيىنوۆ.
كەيىنگى جىلدارى اقتوبە وبلىسىندا تاريحي, ەكولوگيالىق تۋريزم باعىتى ءبىرشاما دامىپ كەلەدى. بايعانين اۋدانىنداعى اقتولاعاي بورلى قىراتتارى مەن اققۇم قۇمدارى, قارعالى اۋدانىنداعى مىلقاۋ تاۋ, قارعالى سۋ قويماسى مەن قاسقىر سارقىراماسى, مارتوك اۋدانىنداعى اققايىڭ توعايى, مۇعالجار اۋدانىنداعى ورقاش تابيعي قورىعى, ويىل اۋدانىنداعى بارقىن قۇمدارى, ىرعىز اۋدانىنداعى «ىرعىز-تورعاي» تابيعي رەزەرۆاتى اقتوبەلىكتەر مەن ەكولوگيالىق ءتۋريزمدى ۇناتاتىندارعا جاقسى تانىمال. اسىرەسە جاز ايلارىندا تابيعاتى ءبىر-بىرىنە ۇقسامايتىن وسى جەرلەردى تاماشالاعىسى كەلەتىندەر سانى ارتادى. كەي تۋريستەر جەردىڭ شالعايلىعىنا قاراماستان بايعانين اۋدانى مەن ىرعىز اۋدانىنداعى تابيعات اياسىنا ەكى-ءۇش كۇن قونىپ, تاۋ-تاسىن ارالاپ كەلۋگە وتە ىقىلاستى.
بۇگىندە اقتوبە وبلىسىنداعى كيەلى جەرلەرگە اپاراتىن مارشرۋتتار دا جاقسى جولعا قويىلدى. ماسەلەن, ويىل اۋدانىنداعى كوكجار جارمەڭكەسى, تەمىر اۋدانىنداعى دوسجان يشان مەشىتى, العا اۋدانى بەستاماق اۋىلىنداعى ەسەت كوكى ۇلى كەسەنەسى, قوبدا اۋدانىنداعى ابات بايتاق پەن قوبىلاندى باتىر كەسەنەسى, ايتەكە بي اۋدانىنداعى حان مولاسى, شالقار اۋدانىنداعى ەسەت-ءدارىباي كەسەنەسى كيەلى ورىنداردى زيارات ەتۋشىلەرگە جاقسى تانىمال.
ە.ءسۇيىنوۆتىڭ ايتۋىنشا, 2023 جىلى اقتوبە وبلىسىنا كەلگەن تۋريستەر سانى 2022 جىلمەن سالىستىرعاندا 33,5%-عا كوبەيگەن. رەسمي ستاتيستيكا بويىنشا 2023 جىلدىڭ العاشقى توعىز ايىندا وڭىرگە 36 668 تۋريست كەلسە, باسقا ەلدەرگە تۋريستىك جولدامامەن 34 542 اقتوبەلىك شىققان. وسى مالىمەت وڭىردە ىشكى تۋريزم باعىتىنىڭ جىلما-جىل دامىپ كەلە جاتقانىن كورسەتەدى. ديماشتىڭ تابيعي تالانتىنا, جوعارى ورىنداۋشىلىق ونەرىنە ءتانتى بولعاندار ونىڭ ۇشقان ۇياسىن كورۋگە, قازاق حالقىنىڭ مادەنيەتىمەن تانىسۋعا اسىعادى. جىل سايىن ديماشتىڭ تۋعان جەرىن كورۋگە شەتەلدەن 100-دەن اسا تۋريست كەلەدى. بىلتىر ديماشتىڭ ءانى ارقىلى قازاق مادەنيەتىن تانۋعا قۇشتار بولىپ كەلگەن شەتەلدىكتەر ءۇشىن اقتوبەدە بىرنەشە تۋر ۇيىمداستىرىلدى.
سەۋل قالاسىندا وتكەن «Road Show» شاراسى كەزىندە وڭتۇستىككورەيالىق ءانشى سون ۆون ساب اقتوبە وبلىسىنىڭ تۋريستىك امباسسادورى بولۋعا نيەت بىلدىرگەن. قازاق جانە كورەي اندەرىن شىرقايتىن سون اقتوبەگە كەلىپ «Visit Aktobe» تۋريستىك ورتالىعىمەن ىنتىماقتاستىقتى دامىتۋ جونىندە مەموراندۋمعا قول قويدى. امباسسادور وڭتۇستىك كورەيادا قازاق ونەرى مەن مۋزىكاسىن ناسيحاتتاپ قانا قويماي, ءبىزدىڭ جاققا تۋريستەر باعىتتاپ وتىرماقشى.
وسىلايشا, ونەر ارقىلى حالىقتار مادەنيەتىن جاقىنداستىرۋ «اقتوبە وبلىسىنىڭ تۋريستىك امباسسادورلارى» مەن «Dimash tour» ارقىلى جالعاسپاقشى. ماقسات – تانىمال تۇلعالار ارقىلى ايماقتىق ءتۋريزمدى دامىتۋ. سىرتتان كەلەتىن تۋريستەردى وزگەشە جولمەن, تىڭ ماركەتينگتىك ستراتەگيالار ارقىلى تارتۋ تەز ناتيجە بەرەدى.
اقتوبە وبلىسى
