سۋرەتتى تۇسىرگەن – ەرلان ومار, «EQ»
وڭىردە 300-دەن اسا ستۋدەنت وبلىستىق جۇمىسپەن قامتۋ ورتالىعى ارقىلى ءار قيلى جۇمىسقا ورنالاسىپ, تابىس تاۋىپ ءجۇر. ءبىلىم الۋعا دا ۇلگەرىپ, اتا-انالارىنا قاراپ قول جايا بەرمەي, قاجەتتى قارجىنى وزدەرى تابۋعا داعدىلانۋ – جاقسى قاسيەت. ورتالىقتا بۇگىندە جۇمىس ىستەگىسى كەلىپ ىنتالانعان جاستارعا ارنالعان ون باعىتتان تۇراتىن باعدارلاما بار. ورتالىق ماماندارىنىڭ ايتۋىنا قاراعاندا, مەكتەپ وقۋشىلارىنا دا قولىنان كەلەتىن جۇمىس تاۋىپ بەرە الادى ەكەن. بۇل تالپىنىس حالىقتىڭ الەۋمەتتىك-تۇرمىستىق جاعدايىن جاقسارتادى. ءارى جاستارعا شاراپاتى تيەتىن شارۋا. جۇمىس ىستەيمىن دەگەن ىنتا دا بار. ەڭ باستىسى, وسى. ماسەلەن, وتكەن جىلى ورتالىق ارقىلى 35 مىڭنان اسا ادام تۇراقتى تابىسى بار جۇمىسقا ورنالاسقان. بۇل – 35 مىڭ وتباسىنىڭ داستارقانى جۇدەمەيدى دەگەن ءسوز. «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا 600-گە جۋىق ادام جۇمىسپەن قامتىلىپ وتىر. اقىل تارازىسىنا سالىپ قاراساڭىز, بۇرىن ەكى قولعا ءبىر كۇرەك تابا الماي جۇرگەن وسىنشاما ادامنىڭ جۇمىسقا ورنالاسۋى – ءتاپ-ءتاۋىر جەتىستىك.
– جۇمىسپەن قامتۋدا نەگىزگى ءتورت جوبا بار, – دەيدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى باسشىسىنىڭ مىندەتىن اتقارۋشى ەرلان مۇحامەدين. – اگروونەركاسىپ كەشەنىن دامىتۋدىڭ 2021-2025 جىلدارعا ارنالعان ۇلتتىق جوباسى اياسىندا 2 مىڭنان اسا جاڭا جۇمىس ورنى اشىلدى. بۇل جوبا اتباسار, زەرەندى جانە ساندىقتاۋ اۋداندارىندا جاقسى ناتيجە كورسەتىپ جاتىر. «قازاقستاندىقتاردىڭ ءال-اۋقاتىن ارتتىرۋعا باعىتتالعان تۇراقتى ەكونوميكانىڭ ءوسۋى» ۇلتتىق جوباسى اياسىندا 1 مىڭنان اسا جۇمىس ورنى بار.
وسىنداي يگىلىكتى شارالار ەل ىشىندەگى جۇمىسسىزدىق دەيتىن كەسەلدى جويۋعا ءتيىس. بۇل ارادا جاستارعا جەتكىلىكتى كوڭىل ءبولىنىپ وتىرعانىن ايتا كەتۋىمىزگە بولادى. «جاستارعا شاعىن نەسيە بەرۋ» باعدارلاماسى بويىنشا وتكەن جىلى 150-دەن اسا جاس مامان ءوز كاسىبىن اشۋ ءۇشىن 2,5 پايىز ۇستەمەمەن جەڭىلدەتىلگەن نەسيە الدى. ال بيىل 200-گە جۋىق ادامعا نەسيە بەرۋ جوسپارلانىپ وتىر. ءبىر اتاپ ايتا كەتەرلىگى, ءوز ءىسىن باستاۋ ءۇشىن كاسىبىن اشامىن دەگەن جاستارعا 5 ملن تەڭگەگە دەيىن نەسيە بەرىلمەك. قىزمەت كورسەتۋ سالاسىنا – 35, ازىق-ت ۇلىك جانە بولشەك ساۋداعا – 17, وسىمدىك شارۋاشىلىعىنا – 4, جەڭىل جانە اۋىر ونەركاسىپكە 18 نەسيە ءبولىنىپ وتىر. وسى ارادا ماڭىزدى ءبىر سالا مال شارۋاشىلىعىن دامىتۋ دا مىقتاپ ەسكەرىلگەن. ءتورت ت ۇلىك مالدى وسىرۋمەن اينالىسسا, اۋىلداعى جاستار دا قاتاردان قالماي ءوز قولدارى ءوز اۋىزدارىنا جەتىپ قالار ەدى. بيىل مال شارۋاشىلىعىن دامىتۋعا نەسيە السام دەپ نيەتتەنىپ وتىرعاندار سانى – 111 ادام نەسيە الماق.
جاستارعا جاناشىرلىق كورسەتىپ, قوعامداعى ءوز ورنىن تابۋعا جاردەمدەسۋ – مەملەكەتتىڭ باستى ۇستانىمى. وسى ورايدا بيىل «العاشقى جۇمىس ورنى» جانە «جاستار تاجىريبەسى» باعدارلامالارىنا باسىمدىق بەرىلەدى.
جاستارعا قولداۋ بارىن سەزىنگەن اۋىلداعى ازاماتتار وزدەرى قالاعان, كەلەشەگىن بارلاپ, كوڭىلگە تۇيگەن شارۋالارىمەن اينالىسىپ جاتىر. ءبىرجان سال اۋدانىندا اۋىلدىق جەرلەردەگى بيزنەستى دامىتۋعا ايرىقشا باسىمدىق بەرىلىپ وتىر. تۇپتەپ كەلگەندە بۇل نيەتتىڭ اۋىلداعى اعايىننىڭ الەۋمەتتىك تۇرمىسىن جاقسارتىپ, ەلدە تۇراقتاپ قالۋىنا كومەك قولىن سوزۋ دەپ تۇيسىنۋگە بولادى. وسى اۋداندا كاسىپكەرلىكتى دامىتۋ اياسىنداعى ۇلتتىق جوبانىڭ 2021-2025 جىلدارعا ارنالعان باعدارلاماسى بويىنشا وتكەن جىلى التى گرانت بەرىلىپتى. ەل ىشىندەگى جاقسىلىق حابار ەستىلمەي جاتا ما؟ قامقورلىق جايلى قۇلاقتانعان, ءبىر كەزدە ءىرى قالالارعا كوشىپ كەتكەن جاستاردىڭ الدىڭعى لەگى اتامەكەنگە ات باسىن بۇرىپ قايتىپ كەلىپ جاتىر. بۇل – وتە قۋانىشتى جاعداي. ولاردىڭ كەيبىرى ءوز قاراجاتتارىن سالىپ كاسىپپەن اينالىسىپ جاتىر. سولاردىڭ ءبىرى – تەمىرلان حافيزوۆ. جاس كاسىپكەر وتكەن جىلى ستەپنياك قالاسىندا جارتىلاي فابريكاتتار شىعاراتىن تسەح اشقان. دەس بەرگەندە ءىسى وڭىنان وڭعارىلا باستاعانعا ۇقسايدى. ارينە, كەز كەلگەن سونى سوقپاقتىڭ كەدەرگىسى بولارى داۋسىز. ايتسە دە ەكپىنى ءۇي جىققانداي جاستىق جىگەرمەن ءوز شارۋاسىن باستاعان ورىمدەي جاس قازىر ءونىمنىڭ 15 ءتۇرىن شىعارىپ, 22 دۇكەندە تۇتىنۋشىلارعا ۇسىنادى. سەگىز ادامدى جۇمىسپەن قامتاماسىز ەتىپ وتىر.
– ەلگە كوشىپ كەلىپ, شاعىن شارۋامەن اينالىستىم, – دەيدى جاس كاسىپكەر تەمىرلان حافيزوۆ. – الدىمەن دۇكەندەرمەن كەلىستىك تە, ءوزىمىز نان ءپىسىرىپ جەتكىزىپ بەرىپ وتىردىق. كەيىن باعدارلاما ارقىلى نەسيە الىپ, تسەح سالىپ الدىق. كوپ كومەك بولدى. ايتپەسە, قارجىنى قايدان الارىمىزدى بىلمەي قينالىپ ءجۇر ەدىك. الداعى ۋاقىتتا كورشىلەس وبلىستارعا دا ءوز ونىمدەرىمىزدى جەتكىزەمىز بە دەپ ۇمىتتەنىپ وتىرمىز.
ۇمتىلعان جاننىڭ جۇمىسى العا باسارى داۋسىز. ستەپنياك قالاسىن «ەڭبەك استىق» كاسىپورنى نان ونىمدەرىمەن حالىقتى قامتاماسىز ەتەدى. بۇل دا – كاسىپكەردىڭ ءوز قاراجاتىمەن باستالعان شارۋا. كاسىپورىن بولاشاقتا نان ونىمدەرىنىڭ تۇرلەرىن كوبەيتپەك.
– بۇرىن ستەپنياك قالاسىنا نان ونىمدەرىن وزگە وڭىرلەردەن تاسىمالداناتىن, – دەيدى «ەڭبەك استىق» سەرىكتەستىگىنىڭ باسشىسى كۇلزيا ساۋىرباەۆا. – كەيدە قالا تۇرعىندارى نان ونىمدەرى قاشان جەتكىزىلەدى ەكەن دەپ الاڭداپ وتىراتىن. قازىر نان ونىمدەرى جەرگىلىكتى جەردە شىعارىلىپ, تۇتىنۋشىلارعا ۇسىنىلىپ جاتىر.
ءدال قازىر جۇمىس ىستەيمىن دەگەن جاننىڭ الدىنان سارا جول اشىلىپ تۇر. ەندىگىسى تەك اركىمنىڭ وزىنە, تالپىنىسىنا بايلانىستى.
اقمولا وبلىسى
