فوتو: neuron-toys.com
اتىراۋ وبلىستىق ەكونوميكالىق تەرگەپ-تەكسەرۋ دەپارتامەنتىنىڭ شتاب باستىعى بەكبولات انەسوۆتىڭ ايتۋىنشا, بۇل دەرەك وبلىستىق پروكۋراتۋرانىڭ ۇيلەستىرۋىمەن جۇرگىزىلگەن جەدەل-ىزدەستىرۋ ءىس-شاراسى كەزىندە انىقتالعان.
«اتىراۋ قالاسىندا 2023 جىلدىڭ مامىر ايىنان وسى كەزگە دەيىن زاڭسىز ويىن بيزنەسىن ۇيىمداستىرۋ دەرەگى انىقتالدى. مۇندا پوكەر ويىنى ويناتىلعان. نىسانعا ءتىنتۋ جۇرگىزىلدى. مەكەنجايدان 440 دانا پوكەر فيشكاسى, 294 دانا ويىن كارتاسى, ويىن توسەنىشتەرى, ۇيالى تەلەفوندار مەن 2 ملن 660 مىڭ تەڭگە, باسقا دا ماڭىزدى زاتتار الىندى», دەپ ءمالىم ەتتى بەكبولات انەسوۆ.
قازىر كۇدىكتىلەرگە قاتىستى قر قىلمىستىق كودەكسىنىڭ 307-بابىنىڭ 1-بولىگىمەن (زاڭسىز ويىن بيزنەسىن ۇيىمداستىرۋ) قىلمىستىق ءىس قوزعالدى. سوتقا دەيىنگى تەرگەپ-تەكسەرۋ جۇرگىزىلىپ جاتىر.
